AKP ភ្នំពេញ ថ្ងៃទី១១ ខែមិថុនា ឆ្នាំ២០២៥–ឯកឧត្តម ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាល បានបញ្ជាក់ថា សំណុំរឿង តំបន់មុំបី ប្រាសាទតាមាន់តូច ប្រាសាទតាមាន់ធំ និងប្រាសាទតាក្របី ប្ដឹងទៅតុលាការយុត្តិធម៌អន្តរជាតិ (ICJ) គឺកម្ពុជានឹងមិនដកថយនោះទេ។

ក្នុងបទសម្ភាសន៍ពិសេសជាមួយទូរទស្សន៍ជាតិកម្ពុជានៅថ្ងៃទី១១មិថុនាឆ្នាំ២០២៥នេះ ឯកឧត្តម ប៉ែន បូណា បានថ្លែងរម្លឹកឡើងវិញថា«ខ្ញុំសូមជម្រាបជូនថា នៅថ្ងៃទី០១ ខែមិថុនា សម្តេចធិបតីនាយករដ្ឋមន្ត្រី បានសរសេរនៅក្នុងគណនីរបស់សម្តេច ដោយបានបញ្ជាក់យ៉ាងច្បាស់ថា កម្ពុជានឹងនាំយកសំណុំរឿងទាំង៤នេះ ទៅតុលាការយុត្តិធម៌អន្តរជាតិ។ ដោយឡែកនៅថ្ងៃទី០២ ខែមិថុនា សម្តេចធិបតីនាយករដ្ឋមន្ត្រី ក៏បានបញ្ជាក់ជាថ្មីថានឹងនាំបញ្ហានេះទៅតុលាការយុត្តិធម៌អន្តរជាតិម្តងទៀត ហើយស្នើសុំការសម្រេចពីអង្គសមាជរដ្ឋសភា និងព្រឹទ្ធសភា ហើយត្រូវបានអង្គសមាជចេញសេចក្តីថ្លែងការណ៍គាំទ្រជាឯកច្ឆន្ទ»។

បើតាម ឯកឧត្តម ប៉ែន បូណា ការប្តឹងទៅតុលាការយុត្តិធម៌អន្តរជាតិ ICJ ករណីតំបន់មុំបី ប្រាសាទតាមាន់តូច ប្រាសាទតាមាន់ធំ និងប្រាសាទតាក្របី,  រាជរដ្ឋាភិបាលកម្ពុជា បានធ្វើការងារនេះរហូតដោយឥតឈប់ឈរ គឺរាជរដ្ឋាភិបាលចាប់ផ្តើមធ្វើការងារនេះតាំងពីថ្ងៃទី២៨ ខែឧសភា ឆ្នាំ២០២៥ នៅពេលដែលកងទ័ពថៃលួចចូលមកបាញ់កងទ័ពរបស់យើង នៅក្នុងទឹកដីរបស់យើង ដែលបណ្តាលឱ្យកងទ័ពយើងម្នាក់ស្លាប់យ៉ាងអយុត្តិធម៌។ ហើយនៅថ្ងៃទី២៩ ខែឧសភា, ក្រសួងការបរទេសរបស់យើងបានធ្វើកំណត់ទូតទៅកាន់ស្ថានទូតថៃ ដោយបញ្ជាក់ថាកម្ពុជាតវ៉ាយ៉ាងខ្លាំង ហើយស្នើសុំឱ្យមានការស៊ើបអង្កេតមួយស៊ីជម្រៅ ដើម្បីឈានទៅចាប់យកជនដៃដល់ទៅផ្តន្ទាទោស៕

ដោយ៖ គង់ សិរីរ័ត្ន