AKP ព្រះសីហនុ ថ្ងៃទី១១ ខែមិថុនា ឆ្នាំ២០២៥-- ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធ និងជំងឺអេដស៍ អញ្ជើញបើកកិច្ចប្រជុំពេញអង្គអាជ្ញាធរជាតិប្រយុទ្ធនឹងជំងឺអេដស៍លើកទី១ ឆ្នាំ២០២៥ នៅសណ្ឋាគារឯករាជ្យ ស្ថិតនៅសង្កាត់លេខ៣ ក្រុងព្រះសីហនុ ដោយមានការចូលរួមពីប្រធានគណ:កម្មាធិការប្រយុទ្ធនឹងជំងឺអេដស៍ អភិបាលរងខេត្តព្រះសីហនុ លោក លោកស្រី ភ្ញៀវជាតិ អន្តរជាតិ នាថ្ងៃពុធទី១១ ខែមិថុនា ឆ្នាំ២០២៥។

ឯកឧត្តមទេសរដ្ឋមន្ត្រី អៀង មូលី បានលើកឡើងថា គោលបំណងនៃកិច្ចប្រជុំ ដើម្បីធានាបាននូវភាពម្ចាស់ការរបស់ខ្លួនលើយន្តការឆ្លើយតបមេរោគអេដស៍ និងជំងឺអេដស៍ អាជ្ញាធរជាតិប្រយុទ្ធនឹងជំងឺអេដស៍ក្នុងការជំរុញតាមដានចូលរួមអនុវត្តគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨។ ផែនការយុទ្ធសាស្ត្រសកម្មភាពរួមជាមួយនឹងការតាមដាន វាយតម្លៃការឆ្លើយតបដោយផ្តោតលើគោលដៅ៩៥-៩៥-៩៥ ព្រមទាំងចំនួនប្រជាជនគន្លឹះដែលរកឃើញថា មានផ្ទុកមេរោគអេដស៍ និងអត្រានៃការប្រើស្រោមអនាម័យ។

ក្នុងឱកាសនោះដែរ ឯកឧត្តមទេសរដ្ឋមន្ត្រីបានកោតសរសើរចំពោះក្រសួង ស្ថាប័នពាក់ពន្ធ័ទាំងអស់ដែលបានខិតខំប្រឹងប្រែង និងសហការជាមួយអាជ្ញាធរជាតិប្រយុទ្ធនឹងជំងឺ អេដស៍ក្នុងការជំរុញ និងចូលរួមអនុវត្តន៍គោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨។ ការមកចូលរួមយ៉ាងសកម្មក្នុងការឆ្លើយតបប្រកបដោយថាមវ័ន្តពិតជាមានមោទនភាពចំពោះវឌ្ឍនភាព និងសមិទ្ធផលប្រកបដោយជោគជ័យដែលកម្ពុជាទទួលបានក្នុងពេលថ្មីៗនេះ។ គោលនយោបាយវិមជ្ឈការ និងវិសហមជ្ឈការវិស័យសុខាភិបាលបានផ្ដល់នូវសិទ្ធិ និងការទទួលខុសត្រូវពេញលេញដល់អាជ្ញារធរគ្រប់លំដាប់ថ្នាក់ ក្នុងការគ្រប់គ្រងមុខងារ និងធនធានសុខាភិបាលរបស់ខ្លួន ដើម្បីឆ្លើយតបជាពហុវិស័យចំពោះការរីករាលដាលមេរោគអេដស៍ និងជំងឺអេដស៍ប្រកបដោយចីរភាពនៅកម្ពុជា។ លទ្ធផលនៃទស្សនកិច្ចអង្គការ UNAIDS បានកោតសរសើរកម្ពុជាលើ ៤ចំណុច រួមមាន៖ ១-ជោគជ័យក្នុងការឆ្លើយតបនឹងមេរោគអេដស៍ដែលទទួលបាន៩២-១០០-៩៨ លើគោលដៅ ៩៥-៩៥-៩៥ លទ្ធផលនេះខ្ពស់ជាងលទ្ធផលនៅក្នុងពិភពលោក និងខ្ពស់ជាង ៣ដង នៃលទ្ធផលរបស់ប្រទេសនានាក្នុងតំបន់អាស៊ីប៉ាស៊ីហ្វិក។ ២-លើកយកមកផ្សព្វផ្សាយប្រសាសន៍សម្ដេចមហាបវរធិបតី “បើនិយាយពីការកសាងធនធានមនុស្សយើងត្រូវយកចិត្តទុកដាក់លើសុខភាពរបស់ប្រជាជន”។ ៣- ការផ្តល់វិភាគទានផ្នែកហិរញ្ញវត្ថុ ១០០.០០០ដុល្លារអាមេរិករបស់កម្ពុជា ដល់អង្គការ UNAIDS ជានិមិត្តរូបនៃសារដ៏សំខាន់មួយដែលកម្ពុជាបានផ្ដល់ដល់ UNAIDS ដល់ការឆ្លើយតបនឹងមេរោគអេដស៍ និងដល់ប្រព័ន្ធពហុភាគីនិយម។ ៤-អបអរសាទរការរៀបចំទិវា ម=ម (មើលមេរោគមិនឃើញ=មិនចម្លងមេរោគអេដស៍ទៅអ្នកដទៃ (Undetectable=Untransmittable)) ដែលរៀបចំបានល្អនៅខេត្តសៀមរាប។

ឯកឧត្តមទេសរដ្ឋមន្ត្រីក៏បានបញ្ជាក់ថា កិច្ចប្រជុំពេញអង្គនាពេលនេះធ្វើឡើងដើម្បីពិនិត្យមើលរួមគ្នានូវវឌ្ឍនភាព សមិទ្ធផល និងប្រសិទ្ធភាពក្នុងការប្រយុទ្ធនឹងជំងឺអេដស៍សម្រាប់រយៈពេល៦ខែ ដើមឆ្នាំ២០២៥ និងធ្វើការប្រមូល និងពិភាក្សាលើធាតុចូល ដើម្បីរួមជាមួយនឹងអនុសាសន៍មួយចំនួនតាមរយៈការចូលរួមរបស់លោក លោកស្រី ដែលមានវត្តមានក្នុងពេលនេះ។ កម្ពុជាបាននឹងកំពុងកសាងបាននូវចីរភាពនៃការឆ្លើយតបជាពហុវិស័យពីគ្រប់ស្ថាប័នជាតិ ដៃគូអភិវឌ្ឍ សង្គមស៊ីវិល វិស័យឯកជន ជាពិសេសបណ្តាញអ្នកផ្ទុកមេរោគអេដស៍ ហើយយើងបានបង្កើតបាននូវស្ថាប័នដឹកនាំគ្រប់គ្រង និងសម្រប សម្រួលតែមួយទាំងនៅថ្នាក់ជាតិ និងថ្នាក់ក្រោមជាតិ ជាពិសេសមានផែនការយុទ្ធសាស្ត្រជាតិតែមួយមានប្រព័ន្ធតាមដាន និងវាយតម្លៃជាតិតែមួយដោយប្រសិទ្ធភាពខ្ពស់។

ទន្ទឹមនឹងនេះ ឯកឧត្តមទេសរដ្ឋមន្ត្រីសង្ឃឹមយ៉ាងមុតមាំថា លទ្ធផលដែលទទួលបានពីកិច្ចប្រជុំនេះ ពិតជាមានសារៈសំខាន់ដែលនឹងផ្តល់ជូនក្រុមការងារបច្ចេកទេសអាចយកទៅប្រើប្រាស់ក្នុងការអនុវត្តការងារឆ្លើយតបនឹងការរាលដាលមេរោគអេដស៍ និងជំងឺអេដស៍នៅក្នុងពេលខាងមុខឱ្យស្របទៅតាមអនុសាសន៍ដែលនឹងផ្តល់ក្នុងអង្គប្រជុំ ហើយការពិភាក្សាផ្លាស់ប្តូរយោបល់ និងបទពិសោធន៍ការងារពីបណ្តាសមាជិក សមាជិកាអាជ្ញាធរជាតិប្រយុទ្ធនឹងជំងឺអេដស៍ទទួលបានលទ្ធផលផ្លែផ្កាសម្រាប់ធ្វើការអនុវត្តរួមគ្នាទទួលបានលទ្ធផលតាមការគ្រោងទុក៕

ដោយ ងូ សុមុនី