AKPបន្ទាយមានជ័យ ថ្ងៃទី១១ខែមិថុនា ឆ្នាំ២០២៥--លោកស្រី រស់ សុផានី អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់ឯកឧត្តម អ៊ុំ រាត្រី អភិបាលនៃគណៈអភិបាលខេត្តបានមានប្រសាសន៍ថារាជរដ្ឋាភិបាលកម្ពុជា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត តែងតែយកចិត្តទុកដាក់ខ្ពស់ចំពោះសុខុមាលភាព និងជីវភាពរស់នៅរបស់ប្រជាពលរដ្ឋគ្រប់រូប ជាពិសេសមនុស្សវ័យចាស់ ដែលជាធនធានដ៏មានតម្លៃសម្រាប់សង្គមជាតិនោះ។

ការថ្លែងយ៉ាងដូច្នេះរបស់ លោកស្រី រស់ សុផានីបានធ្វើឡើងក្នុងសិក្ខាសាលាពិគ្រោះយោបល់មួយ ដើម្បីបូកសរុបលទ្ធផលនៃគម្រោង “ការរៀបចំគំរូសហគមន៍អន្តរជំនាន់ ដើម្បីជីវិតថ្លៃថ្នូររបស់មនុស្សវ័យចាស់កម្ពុជា និងការអភិវឌ្ឍប្រកបដោយនិរន្តរភាព”។ សិក្ខាសាលាដ៏មានសារៈសំខាន់នេះត្រូវបានរៀបចំឡើងនៅមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបន្ទាយមានជ័យកាលពីថ្ងៃទី១០ខែមិថុនាឆ្នាំ២០២៥នេះដែលមានគ្រប់ភាគីពាក់ពន្ធ័បានចូលរួមជាច្រើននោះ។

លោកស្រីរស់ សុផានីបានមានប្រសាសន៍ថាគម្រោងនេះមានគោលបំណងបង្កើតគំរូសហគមន៍មួយដែលលើកកម្ពស់ការរស់នៅប្រកបដោយសេចក្តីថ្លៃថ្នូរសម្រាប់មនុស្សវ័យចាស់ តាមរយៈការជំរុញទំនាក់ទំនងល្អរវាងជំនាន់ និងការចូលរួមចំណែកក្នុងការអភិវឌ្ឍសង្គមប្រកបដោយនិរន្តរភាព។

គម្រោងសហគមន៍អន្តរជំនាន់នេះ មិនត្រឹមតែជួយឱ្យមនុស្សវ័យចាស់មានជីវិតថ្លៃថ្នូរប៉ុណ្ណោះទេ ថែមទាំងបានរួមចំណែកយ៉ាងសកម្មក្នុងការផ្ទេរបទពិសោធន៍ និងចំណេះដឹងទៅកាន់ជំនាន់ក្រោយៗទៀត ដើម្បីការអភិវឌ្ឍប្រកបដោយនិរន្តរភាព។ ខ្ញុំសូមកោតសរសើរចំពោះកិច្ចខិតខំប្រឹងប្រែងរបស់ក្រុមការងារ និងដៃគូពាក់ព័ន្ធទាំងអស់ ដែលបានធ្វើឱ្យគម្រោងនេះទទួលបានជោគជ័យគួរជាទីមោទនៈ។

លោកស្រីអភិបាលរងខេត្តបន្ទាយមានជ័យក៏បានបន្ថែមទៀតថា គម្រោងនេះគឺស្របតាមគោលនយោបាយជាតិស្តីពីមនុស្សវ័យចាស់ ដែលមានចក្ខុវិស័យធានាបាននូវការរស់នៅប្រកបដោយសុវត្ថិភាព សុខភាពល្អ និងសេចក្តីថ្លៃថ្នូររបស់មនុស្សវ័យចាស់។

ចំណែកឯ លោក ឃុន វុទ្ធី ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបន្ទាយមានជ័យ បានធ្វើរបាយការណ៍បូកសរុបលទ្ធផលគម្រោង ដោយលើកបង្ហាញពីសមិទ្ធផលសំខាន់ៗដែលទទួលបាន។ 

លោកបានបញ្ជាក់ថាក្នុងរយៈពេលនៃការអនុវត្តគម្រោងកន្លងមក យើងសង្កេតឃើញថាមានការផ្លាស់ប្តូរជាវិជ្ជមានជាច្រើននៅក្នុងសហគមន៍គោលដៅ។ មនុស្សវ័យចាស់កាន់តែមានឱកាសក្នុងការចូលរួមក្នុងសកម្មភាពសង្គមនានា ដូចជាការបង្រៀនមុខវិជ្ជាប្រពៃណី ការចែករំលែកបទពិសោធន៍កសិកម្ម និងការចូលរួមក្នុងកិច្ចប្រជុំពិភាក្សារបស់ភូមិជាដើម។ ទំនាក់ទំនងរវាងក្មេង និងចាស់ក៏កាន់តែមានភាពស្និទ្ធស្នាល និងយល់ចិត្តគ្នាទៅវិញទៅមក ដែលនេះគឺជាសញ្ញាណដ៏ល្អប្រសើរសម្រាប់ការពង្រឹងសាមគ្គីភាពក្នុងសហគមន៍។ យើងជឿជាក់ថា គំរូសហគមន៍អន្តរជំនាន់នេះ នឹងក្លាយជាគំរូដ៏ល្អសម្រាប់អនុវត្តនៅទូទាំងប្រទេស។

លោក ឃុន វុទ្ធី ក៏បានថ្លែងអំណរគុណដល់គ្រប់ភាគីពាក់ព័ន្ធទាំងអស់ ដែលបានរួមចំណែកធ្វើឱ្យគម្រោងនេះសម្រេចបានជោគជ័យ ជាពិសេសប្រជាពលរដ្ឋក្នុងសហគមន៍ដែលបានចូលរួមយ៉ាងសកម្ម។

សូមជម្រាបថាសិក្ខាសាលានេះបានបិទបញ្ចប់ដោយជោគជ័យ ជាមួយនឹងការប្តេជ្ញាចិត្តរួមគ្នាដើម្បីបន្តពង្រីកគំរូសហគមន៍អន្តរជំនាន់នេះឱ្យបានកាន់តែទូលំទូលាយ។ តាមរយៈកិច្ចសហការល្អរវាងរាជរដ្ឋាភិបាល អាជ្ញាធរមូលដ្ឋាន អង្គការដៃគូ និងប្រជាពលរដ្ឋ ការរៀបចំសហគមន៍ដែលយកចិត្តទុកដាក់ចំពោះមនុស្សវ័យចាស់ និងជំរុញការអភិវឌ្ឍប្រកបដោយនិរន្តរភាព នឹងក្លាយជាការពិត៕

ដោយ៖ ឈុនសារ៉ាត