AKP កំពង់ធំ ថ្ងៃទី១០ ខែមិថុនា ឆ្នាំ២០២៥ -- រដ្ឋបាលស្រុកបារាយណ៍ កាលពីថ្ងៃទី០៩ ខែមិថុនា ឆ្នាំ២០២៥ បានរៀបចំកិច្ចប្រជុំស្តីពីការពង្រឹងកិច្ចសហការ និងការអនុវត្តច្បាប់ព្រហ្មទណ្ឌ ក្រោមអធិបតីភាពឯកឧត្តម រស់ សារាំ ព្រះរាជអាជ្ញានៃអយ្យការអមសាលាដំបូងខេត្តកំពង់ធំនិងលោក ឃន ចាន់ថៃ អភិបាល នៃគណៈអភិបាលស្រុកបារាយណ៍ក្រោមការឧបត្ថម្ភគាំទ្រពីឯកឧត្តមបណ្ឌិត ថោង ខុន ទេសរដ្ឋមន្ត្រីនៅក្នុងអគារសាលប្រជុំរបស់ឯកឧត្តមបណ្ឌិតទេសរដ្ឋមន្ត្រីស្ថិតនៅភូមិស្វាយ ឃុំបារាយណ៍ ស្រុកបារាយណ៍ ខេត្តកំពង់ធំដោយមានការអញ្ជើញចូលរួមពីលោកព្រះរាជអាជ្ញារង លោកអភិបាលរងស្រុក លោកប្រធាន-អនុប្រធាន មន្ត្រីនៃលេខាធិការដ្ឋាន លោកក្រឡាបញ្ជី កងកម្លាំងនៃអធិការដ្ឋាននគរបាលស្រុក  កងរាជអាវុធហត្ថស្រុក ផ្នែកប្រតិបត្តិការសឹករងស្រុក មេឃុំ មេភូមិ មន្រ្តីជលផល មន្រ្តីភូមិបាល និងមន្ត្រីនៃរដ្ឋបាលស្រុកបារាយណ៍ សរុបចំនួន ១២៣នាក់ (ស្រី១២នាក់)។

ឯកឧត្តម រស់ សារាំ បានមានមតិស្វាគមន៍ និងបានលើកឡើងអំពីគោលបំណងសំខាន់ៗមួយចំនួនរួមមាន÷ ១. ផ្សព្វផ្សាយអំពីក្រមនីតិវិធីព្រហ្មទណ្ឌកម្ពុជា ដោយធ្វើបទបង្ហាញសង្ខេបដោយលោក សាយ វាសនា ព្រះរាជអាជ្ញារង។ ២. ពង្រឹងទំនាក់ទំនងនិងពង្រីកកិច្ចសហការក្នុងការអនុវត្តច្បាប់ព្រហ្មទណ្ឌ។ ៣. ជំរុញ បង្ការ និងបង្ក្រាបបទល្មើសចាំបាច់សំខាន់ៗ រួមមាន បទល្មើសគ្រឿងញៀន, ក្មេងទំនើង, ចរាចរណ៍, ឃាតកម្ម,ហិង្សា,  លួចឆក់ប្លន់, ឆបោកតាមប្រព័ន្ធទំនាក់ទំនងសង្គម, ល្បែងស៊ីសង, កម្ចីក្រៅផ្លូវការគ្មានអាជ្ញាបណ្ណ, ជលផល និងនេសាទខុសច្បាប់, ធនធានធម្មជាតិ, ក្លែងបន្លំឯកសារ, ផ្តល់ឯកសារដោយទុច្ចរិត,សុំផ្តល់ឯកសារដោយទុច្ចរិតនិងបទល្មើសសុំផ្តល់លិខិតបញ្ជាក់មិនពិត។ ៤. ដោះស្រាយបញ្ហាប្រឈមនានារវាងស្ថាប័នអយ្យការអមសាលាដំបូងខេត្តនិងអាជ្ញាធររដ្ឋបាលភូមិ ឃុំ ស្រុក។

ទន្ទឹមនឹងនេះ ឯកឧត្តម រស់ សារាំ ស្នើសុំឱ្យថ្នាក់ដឹកនាំរដ្ឋបាលស្រុកបារាយណ៍ កងកម្លាំងទាំងបី មេឃុំ មេភូមិ  មន្រ្តីជលផល មន្ត្រីភូមិបាល និងមន្ត្រីទាំងអស់ ចូលរួមផ្តល់កិច្ចសហការគាំទ្រនូវយុទ្ធនាការនិងការអនុវត្តគោលនយោបាយនានា របស់ក្រសួងយុត្តិធម៌ ដើម្បីបម្រើសេវាយុត្តិធម៌ជូនប្រជាពលរដ្ឋឱ្យបានឆាប់រហ័ស ត្រឹមត្រូវ តម្លាភាព និង ប្រសិទ្ធភាព ព្រមទាំងបន្តធ្វើកិច្ចសហការឱ្យកាន់តែស្អិតរមួត ក្នុងការបង្ការទប់ស្កាត់ និងបង្ក្រាបបទល្មើសទាំងឡាយ ក្នុងដែនសមត្ថកិច្ចស្រុកបារាយណ៍ នៃខេត្តកំពង់ធំឱ្យកាន់តែមានប្រសិទ្ធភាពខ្ពស់៕

ដោយ ស៊ុម វណ្ណា