AKP ភ្នំពេញ ថ្ងៃទី១០ ខែមិថុនា ឆ្នាំ២០២៥ -- ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានថ្លែងបញ្ជាក់ថា  បណ្តាញទំនាក់ទំនងសង្គម រួមមាន ហ្វេសប៊ុក តិកតុកជាដើម គឺមិនអាចដើរតួជំនួសឱ្យប្រព័ន្ធផ្សព្វផ្សាយតាមបែបបុរាណ ដែលរួមមាន វិទ្យុ ទូរទស្សន៍ កាសែត ទស្សនាវដ្តីបានទេ ហើយក៏សូមជឿតាមការផ្សព្វផ្សាយរបស់បណ្តាញសង្គមត្រឹមតែ៣ ឬ៤ភាគរយបានហើយ ព្រោះការផ្សព្វផ្សាយនៅលើបណ្តាញសង្គមភាគច្រើនបំផុតគឺជាការមិនពិត មិនអាចជឿទុកចិត្តបានឡើយ។ ការថ្លែងបញ្ជាក់របស់ឯកឧត្តមយ៉ាងដូច្នេះធ្វើឡើងក្នុងពិធីជួបជាមួយសិស្សនិស្សិតប្រមាណ៤០អង្គ/នាក់ មកពីសាកលវិទ្យាល័យប៊ែលធីអន្តរជាតិ ដែលបានចុះហ្វឹកហាត់ការងារតាមអគ្គនាយកដ្ឋានជំនាញរបស់ក្រសួងព័ត៌ មានរយៈពេល៤ថ្ងៃ ពីថ្ងៃទី១០ ដល់ថ្ងៃទី១៣ ខែមិថុនា ឆ្នាំ២០២៥។

ឯកឧត្តម ទេព អស្នារិទ្ធ បានលើកឡើងថា នៅខណៈនេះបញ្ហាព្រំដែនកម្ពុជា-ថៃកំ ពុងក្លាយជាប្រធានបទក្តៅ និងមានការផ្សព្វផ្សាយជាច្រើនពីបញ្ហានេះ តែសំខាន់សូមសាធារណជនតាមដានព័ត៌មានឱ្យបានគ្រប់ជ្រុងជ្រោយពីប្រភពផ្លូវការរបស់រដ្ឋ ចៀសជាងការទទួលយកប្រភពព័ត៌មានតាមរយៈបណ្តាញសង្គម រួមមាន ហ្វេសប៊ុក តិកតុកជាដើម ព្រោះវាមិនអាចចូលមកដើរតួជំនួសប្រព័ន្ធផ្សព្វផ្សាយតាមបែបបុរាណ ដែលរួមមាន វិទ្យុ ទូរទស្សន៍ កាសែត ទស្សនាវដ្តីបានទេ។ ឯកឧត្តមអ្នកនាំពាក្យបានបញ្ជាក់ថា បញ្ហាព្រំដែននៅតំបន់មុំ៣ បន្ទាប់ពីមានភាពតានតឹងមួយរយៈរាជរដ្ឋាភិបាលនៃប្រទេសទាំងពីរកម្ពុជា-ថៃ បានខិតខំក្នុងការដោះស្រាយ សម្របសម្រួល ដែលនៅពេលនេះ ភាគីទាំងពីរបានសម្រេចធ្វើការសម្រួលការឈរជើងរបស់កងទ័ពទាំងសងខាងនៅក្នុងតំបន់មានជម្លោះ ដើម្បីសម្រួលស្ថានការណ៍កុំឱ្យមានភាពតានតឹង ដែលអាចឈានទៅជម្លោះប្រដាប់អាវុធធ្ងន់ធ្ងរ តែវាមិនមែនមានន័យថាជាការដកទ័ពដូចការចោទប្រកាន់ពីអ្នកមួយចំនួននោះទេ។

ទាក់ទងទៅនឹងជម្លោះព្រំដែនកម្ពុជា-ថៃនេះ ឯកឧត្តម អ្នកនាំពាក្យរូបនេះ ក៏សូមឱ្យមានការជឿជាក់មកលើរាជរដ្ឋាភិបាល សូមតាមដានព័ត៌មានពីប្រភពព័ត៌មានរបស់រាជរដ្ឋាភិបាល ចៀសជាងការទទួលព័ត៌មានពីប្រភពព័ត៌មាននៅលើបណ្តាញសង្គម ដែលមានភាពច្របូកច្របល់ មិនអាចយកជាការបានឡើយ។ ឯកឧត្ដមបន្ដថា ការទទួលបានព័ត៌មានតាមរយៈបណ្ដាញសង្គមនេះ គឺអាចជឿជាក់យ៉ាងច្រើន ត្រឹម៣ ឬ៤ភាគរយបានហើយ ព្រោះនៅរាល់មានបញ្ហាម្តងៗគឺតែងតែមានជនឆ្លៀតឱកាសដើម្បីកេងចំណេញផលប្រយោជន៍ណាមួយសម្រាប់ពួកគេ ក្នុងការផ្សព្វផ្សាយតាមបណ្ដាញសង្គមនេះ ដែលយើងត្រូវតែមានការប្រុងប្រយ័ត្ន។

ក្នុងឱកាសនោះ ឯកឧត្តមអនុរដ្ឋលេខាធិការ និងជាអ្នកនាំពាក្យក្រសួងព័ត៌មានក៏បានជម្រាបជូនដល់ថ្នាក់ដឹកនាំ លោកគ្រូ អ្នកគ្រូ សិស្ស និស្សិតសាកលវិទ្យាល័យប៊ែលធីអន្តរជាតិអំពីតួនាទីរបស់ក្រសួងព័ត៌មានផងដែរថា ជាស្ថាប័នទំនាក់ទំនងសាធារណៈរបស់រាជរដ្ឋាភិបាលប្រកបដោយបុរេសកម្ម សកម្ម អន្តរសកម្ម ប្រសិទ្ធភាព និងគុណភាព ដើម្បីគ្រប់គ្រងលំហរព័ត៌មាន និងសន្តិសុខព័ត៌មាន និងឈរលើអភិក្រម «ថ្មី ពិត លឿន និងទូលំទូលាយ ប្រកបដោយជំនឿទុកចិត្ត និងវិជ្ជាជីវៈ ដើម្បីផ្សារភ្ជាប់មជ្ឈដ្ឋាន»៕

ដោយ៖ ចាន់ សុភឿន, រូបថត៖ សួស សាវី