AKP ភ្នំពេញ ថ្ងៃទី១០ ខែមិថុនា ឆ្នាំ២០២៥ -- ឯកឧត្តម សុខ ប៊ុនថា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានអញ្ជើញបើកសិក្ខាសាលាពិគ្រោះយោបល់លើវិធានការគន្លឹះរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា ដើម្បីដាក់បញ្ចូលក្នុងផែនការជាតិរួមចំណែកឆ្លើយតបនឹងការប្រែប្រួលអាកាសធាតុនៅកម្ពុជា (NDC 3.0) ដែលរៀបចំដោយនាយកដ្ឋានអភិវឌ្ឍន៍គោលនយោបាយ សហការជាមួយ UNDP នៅសណ្ឋាគារ Novotel រាជធានីភ្នំពេញ កាលពីថ្ងៃទី០៩ ខែមិថុនា ឆ្នាំ២០២៥។

សិក្ខាសាលាត្រូវបានរៀបចំឡើងក្នុងគោលបំណង៖ ១. ផ្តល់ឱកាសឱ្យភាគីពាក់ព័ន្ធដើម្បីផ្តល់នូវធាតុចូល និងបញ្ជាក់អំពីការរួមចំណែកនៃសេវាសង្គមកិច្ច ក្នុងការចូលរួមជាផ្នែកមួយនៃ NDC 3.0។ ២. ឯកភាពលើចំណងជើងវិស័យដែលបានស្នើថ្មីនៅក្នុង NDC 3.0 ថាជាវិស័យសេវាសង្គមកិច្ច បន្ថែមពីលើវិស័យកិច្ចការពារកុមារ។ ៣. ពិភាក្សាអំពីតួនាទីសំខាន់របស់អ្នកសង្គមកិច្ចក្នុងការចូលរួមកាត់បន្ថយភាពងាយរងគ្រោះដែលបង្កឡើងដោយការប្រែប្រួលអាកាសធាតុ។ ៤. ប្រមូលអនុសាសន៍ដែលអាចអនុវត្តបានសម្រាប់ការបញ្ចូលសេវាសង្គមកិច្ចទៅក្នុងក្របខ័ណ្ឌ NDC របស់កម្ពុជា និង៥. ពង្រឹងភាពជាដៃគូសហការក្នុងចំណោមក្រសួង ស្ថាប័នរបស់រដ្ឋាភិបាល សង្គមស៊ីវិល និងអង្គការអន្តរជាតិ ដើម្បីគាំទ្រគំនិតផ្តួចផ្តើមអាកាសធាតុប្រកបដោយបរិយាបន្ន។

សូមជម្រាបជូនថា សិក្ខាសាលាទទួលបានការចូលរួមពីឯកឧត្តម ប៉ាក សុខារ៉ាវុត អនុរដ្ឋលេខាធិការក្រសួងបរិស្ថាន ឯកឧត្ដម នាក់ ថារ៉ែន អនុរដ្ឋលេខាធិការ ឯកឧត្តម អគ្គនាយកគោលនយោបាយសង្គមកិច្ច អគ្គនាយកសេវាសង្គមកិច្ច អគ្គលេខាធិការរងក្រុមប្រឹក្សាសកម្មភាពជនពិការ លោកស្រី Alissar Chaker តំណាងកម្មវិធីអភិវឌ្ឍន៍សហប្រជាជាតិប្រចាំកម្ពុជា លោក លោកស្រីអគ្គនាយករង  លោកប្រធាន អនុប្រធាននាយកដ្ឋាន និងមន្ត្រីពាក់ព័ន្ធសរុបប្រមាណ៤០រូប៕

ដោយ៖ ពេជ្រ សំអឿន (ប្រភព៖ ក្រសួងសង្គមកិច្ច)