AKP កំពង់ធំ ថ្ងៃទី១០ ខែមិថុនា ឆ្នាំ២០២៥ -- នៅទីបញ្ជាការដ្ឋានតំបន់ប្រតិបត្តិការសឹករងកំពង់ធំយោធភូមិភាគទី៤ កាលពីរសៀលថ្ងៃទី០៩ ខែមិថុនា ឆ្នាំ២០២៥ លោក ឡុង គីសឹង អភិបាលនៃគណៈអភិបាលស្រុក និងលោក នៅ សៈមៈ ប្រធានក្រុមប្រឹក្សាស្រុកសន្ទុក បានដឹកនាំកងកម្លាំងប្រដាប់អាវុធទាំងបី មន្ត្រីរាជការក្រោមឱវាទនាំយកថវិកាចំនួន២លានរៀល អង្ករចំនួន២តោន មីជាតិចំនួន៥០កេស និងទឹកត្រីទឹកស៊ីអ៊ីវចំនួន៦០យូរ មកប្រគល់ជូនឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ដើម្បីបម្រើសេចក្តីត្រូវការក្នុងភារកិច្ចការពារជាតិនិងការចូលរួមបង្ក្រាបបទល្មើសធនធានធម្មជាតិនៅក្នុងខេត្តកំពង់ធំ។

លោក ឡង គីសឹង បានមានប្រសាសន៍ថា ដោយឃើញពីសកម្មភាពដ៏មមាញឹករបស់បញ្ជាការដ្ឋានតំបន់ប្រតិបត្តិការសឹករងកំពង់ធំ ក្នុងភារកិច្ចត្រៀមបម្រុងកម្លាំង ក្នុងវិស័យការពារជាតិ ការពារបូរណភាពទឹកដី និងសកម្មភាពដ៏មមាញឹក ជាកម្លាំងស្នូលឱ្យកងកម្លាំងចម្រុះក្នុងភារកិច្ចការពារទប់ស្កាត់ និងបង្ក្រាបបទល្មើសធនធានធម្មជាតិ ក្នុងភូមិសាស្ត្រខេត្តកំពង់ធំ ទទួលបានជោគជ័យ គួរជាទីមោទនៈ និងបានសូមជូនពរដល់នាយទាហាន នាយទាហានរងនិងពលទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំទាំងអស់ សូមទទួលជោគជ័យក្នុងភារកិច្ចការពារជាតិ ការពារបូរណភាពទឹកដី និងការបង្ក្រាបបទល្មើសធនធានធម្មជាតិ នៅក្នុងភូមិសាស្ត្រខេត្តកំពង់ធំឱ្យទទួលបានជោគជ័យថ្មីៗបន្ថែមទៀត។

ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានបញ្ជាក់ជូនអំពីសភាពការណ៍ថ្មីៗមួយចំនួន នៅតាមខ្សែបន្ទាត់ព្រំដែនកម្ពុជា-ថៃ និងបានថ្លែងអំណរគុណដ៏ជ្រាលជ្រៅជាទីបំផុត ចំពោះលោក ឡង គីសឹង អភិបាលស្រុក និងលោក នៅ ស:ម: ប្រធានក្រុមប្រឹក្សាស្រុកសន្ទុកនិងប្រតិភូទាំងអស់ ដែលបានយកចិត្តទុកដាក់ ជួយឧបត្ថម្ភថវិកា ស្បៀងអាហារគ្រឿងឧបភោគបរិភោគដល់បញ្ជាការដ្ឋានតំបន់ប្រតិបត្តិការសឹករងកំពង់ធំ ក្នុងភារកិច្ចការពារជាតិ សាសនា ព្រះមហាក្សត្រ ការពារបូរណភាពទឹកដី និងភារកិច្ចការពារទប់ស្កាត់ និងបង្ក្រាបបទល្មើសធនធានធម្មជាតិ នៅទូទាំងខេត្តកំពង់ធំនិងបានសូមជូនពរ ប្រតិភូអភិបាលស្រុកនិងក្រុមប្រឹក្សាស្រុកសន្ទុក ខេត្តកំពង់ធំ ទាំងអស់ និងក្រុមគ្រួសារ សូមទទួលបាននូវសុខភាពល្អ ព្រមទាំងពុទ្ធពរទាំងបួនប្រការកុំបីឃ្លៀងឃ្លាតឡើយ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)