AKP ភ្នំពេញ ថ្ងៃទី១០ ខែមិថុនា ឆ្នាំ២០២៥-- ឯកឧត្តម សរ គឹមសាន្ត អគ្គលេខាធិការអាជ្ញាធរទន្លេសាប នៅថ្ងៃទី០៩ ខែមិថុនា ឆ្នាំ២០២៥ ឯកឧត្តម បានដឹកនាំក្រុមការងារបច្ចេកទេសអន្តរក្រសួង សហការជាមួយមន្ទីរ អង្គភាពជំនាញពាក់ព័ន្ធ អាជ្ញាធរមូលដ្ឋានគ្រប់លំដាប់ថ្នាក់ បានចុះកំណត់និយាមកាបោះបង្គោលជំហាន២ បង្គោលព្រំការពារដីតំបន់កាត់ឆ្វៀល (តំបន់១ និងតំបន់២ ស្ថិតក្នុងតំបន់៣) ក្នុងភូមិសាស្រ្តខេត្តកំពង់ឆ្នាំង។

បន្ទាប់ពីអាជ្ញាធរទន្លេសាប បានអនុវត្តការងារបោះបង្គោលជំហាន១ បង្គោលព្រំតំបន់៣ ដើម្បីការពារដែនព្រៃលិចទឹក និងព្រៃលិចទឹក នៅខេត្តទាំង៦ ជុំវិញបឹងទន្លេសាបបានជោគជ័យ ១០០ភាគរយ ចំនួន ១ ២២៤បង្គោល តាមរយៈសេចក្តីជូនដំណឹងលេខ ១៨៨ សជណ.ដប ចុះថ្ងៃទី៩ ខែកុម្ភៈ ឆ្នាំ២០២៤ របស់ទីស្តីការគណៈរដ្ឋមន្រ្តី អាជ្ញាធរទន្លេសាប នឹងបន្តបោះបង្គោលជំហ៊ាន២ បង្គោលព្រំការពារដីតំបន់កាត់ឆ្វៀល (តំបន់១ និងតំបន់២ ស្ថិតក្នុងតំបន់៣) នៅខេត្តទាំង៦ ជុំវិញបឹងទន្លេសាបដោយក្នុងឆ្នាំ២០២៥ នេះ ហើយពេលនេះអាជ្ញាធរទន្លេសាប អនុវត្តការងារបោះបង្គោលព្រំនៅខេត្តកំពង់ឆ្នាំង និងខេត្តកំពង់ធំបន្តទៀត៕

ដោយ ណយ នឿន (ប្រភព៖ អាជ្ញាធរទន្លេសាប)