AKP ខេត្តកំពង់ចាម ថ្ងៃទី៩ ខែមិថុនា ឆ្នាំ២០២៥--

       នៅរសៀលថ្ងៃចន្ទ ទី៩ ខែមិថុនា ឆ្នាំ២០២៥ លោក ស្រី សុភ័ក្ត្រ អភិបាលរងខេត្តជាលេខាធិការសាខា តំណាង ឯកឧត្តម   អ៊ុន ចាន់ដា ប្រធានគណៈកម្មាធិការសាខា  បាននាំយកសម្ភារ និងបច្ច័យរបស់ ឯកឧត្តម អ៊ុន ចាន់ដា រួមទាំង អំណោយរបស់ សាខាកាកបាទក្រហមកម្ពុជាខេត្ត ទៅចូលរួមបុណ្យសពយុវតី ២នាក់ ជាសិស្សថ្នាក់ទី១២ នៃ វិទ្យាល័យ ហ៊ុនសែន ផ្តៅជុំ    ដែលបានរងគ្រោះថ្នាក់ចរាចរណ៍បាត់បង់ជីវិត កាលពីម៉ោង ៧ព្រលប់ ថ្ងៃទី ៤ ខែមិថុនា ឆ្នាំ ២០២៥ កន្លងទៅ បន្ទាប់ចេញពីរៀនបន្ថែមម៉ោង នៅសាលា។  

       ក្នុងឱកាសនោះ  លោក ស្រី សុភ័ក្ត្រ  លេខាធិការសាខាបានសម្តែងការសោកស្តាយយ៉ាងខ្លាំងជាមួយក្រុមគ្រួសារសព  ដែលបានបាត់បង់ កូនស្រី ក្មួយ ចៅ ជាទីស្រឡាញ់របស់ខ្លួន  ព្រមទាំងបាន ពាំនាំនូវប្រសាសន៍ផ្តាំផ្ញើសួរសុខទុក្ខ និង ចូលរួមរំលែកមរណៈទុក្ខ យ៉ាងក្រៀមក្រំបំផុត ពី សំណាក់ឯកឧត្តម អ៊ុន ចាន់ដា ប្រធានគណៈកម្មាធិការសាខា និង ឯកឧត្តមសន្តិបណ្ឌិត នេត សាវឿន ប្រធានកិត្តិយសសាខា ជាពិសេស ពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន  ប្រធានកាកបាទក្រហមកម្ពុជា ចំពោះគ្រួសារសព ដោយក្តី អាណិតអាសូរចំពោះការបាត់បង់កូនជាទីស្រឡាញ់របស់ខ្លួន។

   លោក ស្រី សុភ័ក្ត្រ   ក៏បានអំពាវនាវដល់មាត បិតា ឪពុកម្តាយ អាណាព្យាបាល ទាំងអស់  ត្រូវអប់រំណែនាំកូន ចៅ ឲ្យមានការប្រុងប្រយ័ត្នខ្ពស់ ក្នុងពេលធ្វើដំណើរ ត្រូវចូលរួមគោរពច្បាប់ចរាចរណ៍ទាំងអស់គ្នា ដើម្បីជៀសវាងការគ្រោះថ្នាក់ អាចបណ្តាល ឲ្យមានជា របួស ពិការ ឬ បាត់បង់ជីវិដោយត្រូវបើកបរត្រូវពាក់មួកសុវត្ថិភាព  កុំបើកវ៉ាជែង ឬ បើកបរលើសល្បឿនកំណត់ ។

      សម្ភារដែលបាននាំទៅចូលរួមរំលែក មរណទុក្ខ ចំពោះគ្រួសារសពយុវសិស្សទាំង ២ នាក់ ក្នុង ១គ្រួសារ ទទួលបាន    ៖  អង្ករ ៥០គក្រ  ,  មី ២កេស ,ត្រីខ ២០កំប៉ុង , ទឹកក្រូច ២កេស, ទឹកពិសាប្រណិត V-Active ២កេស  និង ថវិកាចំនួន ៤០០ ០០០រៀល ។ក្នុងការចូលរួម មរណទុក្ខ ឯកឧត្តម អ៊ុន ចាន់ដា អភិបាលខេត្ត បានបរិច្ចាគថវិកាផ្ទាល់ខ្លួន ចូលបុណ្យ ក្នុង ១គ្រួសារសព ចំនួន ១,០០០,០០០រៀល  និង ក្រុមការងារចុះជួយឃុំ បាន ចូលបុណ្យ សរុប ១,៥០០,០០០រៀល ក្នុងនេះ ចូលបុណ្យ គ្រួសារយុវតី ធី លីអឺ ដែលមានជីវភាពលំបាកជាងគេ ចំនួន ១,០០០,០០០រៀលផងដែរ ៕ ដោយ៖ ឆាយ ម៉ុត