AKP កណ្ដាល ថ្ងៃទី៩ ខែមិថុនា ឆ្នាំ២០២៥--

ឯកឧត្តម គួច ចំរើន អភិបាលខេត្តកណ្ដានិងឯកឧត្តម ម៉ក់ ពេជ្ជរិទ្ធ រដ្ឋលេខាធិការក្រសួងពាណិជ្ជកម្ម រួមជាមួយអាជ្ញាធរស្រុកកៀនស្វាយ នាថ្ងៃទី៩ ខែមិថុនា ឆ្នាំ២០២៥ បានអញ្ជើញចុះពិនិត្យស្ថានភាពជាក់ស្ដែង និងសំណេះសំណាលជាមួយអាជីវករ កំពុងប្រកបរបរលក់ដូរនៅរមណីយដ្ឋានកៀនស្វាយក្រៅ។

ក្នុងឱកាសចុះពិនិត្យនេះដែរ ឯកឧត្តម គួច ចំរើន អភិបាលខេត្តកណ្ដាល បានមានប្រសាសន៍ថា ដោយសង្កេតឃើញរមណីយដ្ឋានកៀនស្វាយក្រៅ ក្រៅពីថ្ងៃសៅរ៍ ថ្ងៃអាទិត្យ និងថ្ងៃឈប់សម្រាកផ្សេងៗ មិនសូវមានភ្ញៀវទេសចរមកកំសាន្តនៅទីនេះឡើយ ដូច្នេះយើងទាំងអស់គ្នាជាអាជ្ញាធរ ក៏ដូចជាអាជីវករផ្ទាល់ ត្រូវខិតខំកែលម្អនៅតំបន់នេះឱ្យទាក់ទាញ ពិសេសផ្សព្វផ្សាយនូវអ្វីដែលល្អ អ្វីដែលទាក់ទាញ ដល់ភ្ញៀវទេសចរណ៍របស់យើង ដើម្បីមកកំសាន្ត និងលំហែកាយនៅតំបន់នេះ ឱ្យបានកាន់តែច្រើនដោយមិនគិតថ្ងៃឈប់សម្រាកឡើយ។

 ឯកឧត្តមថាតំបន់រមណីយដ្ឋានកៀនស្វាយក្រៅនេះ គឺជាទីតាំងដែលមានសក្ដានុពល នៅជិតរាជធានីភ្នំពេញ ក៏ដូចជាក្រុងតាខ្មៅ ដែលងាយស្រួលក្នុងការធ្វើដំណើរមកពិសាខាពេលរសៀល ក៏ដូចជាមកលំហែកាយ ដូច្នេះប្រសិនបើយើងបានរៀបចំឱ្យមានសណ្ដាប់ធ្នាប់ របៀបរៀបរយ សោភ័ណភាព សុវត្ថិភាព និងសុគតភាព នោះភ្ញៀវទេសចរណ៍នឹងមកកម្សាន្តនៅទីនេះកាន់តែច្រើនជាងមុន។ ដើម្បីឱ្យតំបន់នេះកាន់តែទាក់ទាញភ្ញៀវទេសចរណ៍បន្ថែមទៀត អាជ្ញាធរស្រុកកៀនស្វាយ ត្រូវខិតខំផ្សព្វផ្សាយដល់អាជីវករយើងទាំងអស់ មិនត្រូវដំឡើងថ្លៃហួសហួសហេតុ ដែលធ្វើឱ្យបាត់បង់ភ្ញៀវទេសចរណ៍របស់យើងឡើយ។ បើយើងដំឡើងថ្លៃខ្ពស់ហួសហេតុ នោះយើងបានចំណេញតែមួយពេលនេះទេ តែប្រសិនបើយើងលក់តម្លៃសមរម្យ នោះយើងនឹងទទួលបានការចំណេញជារៀងរហូត។ 

មានជាមួយគ្នានេះដែរ ឯកឧត្តមអភិបាលខេត្ត បានណែនាំដល់អធិការនគរបាលស្រុក ត្រូវដាក់កម្លាំងប្រចាំការនៅស្នាក់ការរមណីយដ្ឋាន ដោយសហការជាមួយប្រជាការពារឃុំ ប្រចាំការសម្រាប់មើលការខុសត្រូវ ដោយធ្វើឱ្យកន្លែងនេះជាពហុវិស័យ ដោយត្រូវដោះស្រាយគ្រប់ទាំងការងារសន្តិសុខ ការផ្ដល់ព័ត៌មានសម្រាប់ទេសចរណ៍ ការដោះស្រាយបញ្ហាមួយចំនួនជាមួយអាជីវករផងដែរ ៕

ដោយ៖ណយ នឿន (ប្រភព៖រដ្ឋបាលខេត្តកណ្តាល)