AKP ភ្នំពេញ ថ្ងៃទី០៩ ខែមិថុនា ឆ្នាំ២០២៥--

ឯកឧត្តម ចាយ បូរិន រដ្ឋមន្រ្តីក្រសួងធម្មការនិងសាសនា អនុញ្ញាតឱ្យព្រះគ្រូ វ៉ាដា មេហ្វូមី ជាអនុប្រធានមូលនិធិអត់អាហារមួយពេលដើម្បីសន្តិភាព (Donate- a-Meal Fund for Peace) របស់អង្គការ រីស្ស កូសេ-កៃ (Rissho Kosei-kai) នៃប្រទេសជប៉ុន ចូលជួបសម្តែងការគួរសម និងពិភាក្សាការងារ នាទីស្តីការក្រសួង ព្រឹកថ្ងៃទី០៩ ខែមិថុនា ឆ្នាំ២០២៥។ 

ព្រះគ្រូ វ៉ាដា មេហ្វូមី អនុប្រធានមូលនិធិអត់អាហារមួយពេលដើម្បីសន្តិភាពរបស់អង្គការ រីស្ស កូសេ-កៃ នៃប្រទេសជប៉ុន បានជម្រាបជូនឯកឧត្តមរដ្ឋមន្រ្តី អំពីសកម្មភាពការងាររបស់អង្គការនាពេលកន្លងមក ចាប់តាំងពីឆ្នាំ១៩៩២មក អង្គការ រីស្សកូសេ-កៃ នៃប្រទេសជប៉ុន ទទួលបានសហការយ៉ាងជិតស្និទជាមួយក្រសួងធម្មការនិងសាសនា លើការងារអប់រំ បោះពុម្ពសៀវភៅសម្រាប់វត្តអារាមនិង សាលាពុទ្ធិកសិក្សានានាទូទាំងប្រទេសកម្ពុជា ដោយប្រជាជនជប៉ុនបានស្ម័គ្រចិត្តចូលរួមយ៉ាងពេញចិត្តក្នុងមូលនិធិអត់អាហារមួយពេលដើម្បីសន្តិភាព របស់អង្គការ រីស្ស កូសេ-កៃ នៃប្រទេសជប៉ុន។

ឯកឧត្តម ចាយ បូរិន បានមានប្រសាសន៍ថា រាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតី ហ៊ុន សែន អតីតនាយករដ្ឋមន្រ្តី បច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា និងបន្តដឹកនាំប្រកបដោយចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានយកចិត្តទុកដាក់លើគ្រប់វិស័យ ពិសេសវិស័យព្រះពុទ្ធសាសនានៅកម្ពុជា ដែលត្រូវបានបំផ្លាញខ្ទេចខ្ទីក្នុងរបបប្រល័យពូជសាសន៍ ប៉ុល ពត។

ក្នុងន័យនេះ ឯកឧត្តមរដ្ឋមន្រ្តីបានថ្លែងអំណរគុណដល់រដ្ឋាភិបាល និងប្រជាជនជប៉ុន ដែលតែតែងគាំទ្រដល់រាជរដ្ឋាភិបាលកម្ពុជាលើកគ្រប់វិស័យ និងបានសហការយ៉ាងជិតស្និទជាមួយក្រសួងធម្មការនិងសាសនា បានរៀបចំគម្រោងស្តារព្រះពុទ្ធសាសនាឡើងវិញនៅ កម្ពុជា ក៏ដូចជាពុទ្ធសាសនបណ្ឌិត្យ ដោយបានចូលរួមចំណែកក្នុងការបោះពុម្ព និងចែកចាយសៀវភៅព្រះពុទ្ធ សាសនា, សៀវភៅពាក់ព័ន្ធវប្បធម៌ និងសៀវភៅអក្សរសាស្ត្រចំនួនរាប់រយពាន់ម៉ឺនក្បាល សម្រាប់វត្តអារាមនិង សាលាពុទ្ធិកសិក្សានានាទូទាំងប្រទេស និងកសាងអគារពុទ្ធសាសនបណ្ឌិត្យជាដើម។

ទន្ទឹមនឹងនេះ ឯកឧត្តមរដ្ឋមន្រ្តីបានស្នើដល់អង្គការរីស្ស កូសេ-កៃ នៃប្រទេសជប៉ុន តាមរយៈព្រះគ្រូ វ៉ាដា មេហ្វូមី ពិនិត្យលទ្ធភាពក្នុងការជួយជុសជុលអគារពុទ្ធសាសនបណ្ឌិត្យ ដែលមានសភាពទ្រុឌទ្រោមខ្លាំងឱ្យបានល្អប្រសើរឡើងវិញ ព្រោះពុទ្ធសាសនបណ្ឌិត្យជាទីតាំងមួយដ៏សំខាន់ដែលក្រសួងធម្មការ និងសាសនា មានគម្រោងយាង និងនិមន្តគណៈសង្ឃទាំងពីរគណៈ អញ្ជើញក្រុមអ្នកស្រាវជ្រាវទំនៀមទម្លាប់ប្រពៃណី ចងក្រងអក្សរសាស្រ្ត ភាសាបាលី គម្ពីរក្បួនច្បាប់ផ្សេងៗ ដែលបានបាត់បង់កាលពីសម័យសង្រ្គាមឡើងវិញ ដើម្បីទុកជាកេរ្តិ៍ដំណែលដ៏ល្អផូរផង់របស់ជាតិ។ 

នាឱកាសនេះ ឯកឧត្តមរដ្ឋមន្រ្តីបានមានប្រសាសន៍បញ្ជាក់ថា អង្គការ រីស្ស កូសេ-កៃ នៃប្រទេសជប៉ុន បានចូលរួមចំណែកមិនត្រឹមតែសម្រាប់ការយោគយល់គ្នា និងការផ្លាស់ប្តូររវាងពុទ្ធសាសនិកប៉ុណ្ណោះទេ គឺថែមទាំងបានរក្សាសុខសន្តិភាពពិភពលោកផងដែរ និងសូមជូនពរព្រះគ្រូ វ៉ាដា មេហ្វូមីនិងគណប្រតិភូរបស់អង្គការ រីស្ស កូសេ-កៃ នៃប្រទេសជប៉ុនទាំងអស់ជួបតែសុខសុវត្ថិភាព ពិសេសសម្រេចបានគ្រប់ភារកិច្ចបេសកកម្មការងារជួយគាំទ្ររាជរដ្ឋាភិបាលកម្ពុជាកាន់តែរីកចម្រើនបន្ថែមទៀត៕

ដោយ ទេស ច័ន្ទសុធារី (ប្រភព៖ ក្រសួងធម្មការ)