AKP បន្ទាយមានជ័យ ថ្ងៃទី០៩ ខែមិថុនា ឆ្នាំ២០២៥--លោកស្រី ព្រំ ស៊ីណា ប្រធានមន្ទីរផែនការខេត្តបន្ទាយមានជ័យ ព្រឹកថ្ងៃទី០៩ ខែមិថុនា ឆ្នាំ២០២៥  បានអញ្ជើញដឹកនាំកិច្ចប្រជុំពិភាក្សា និងពិគ្រោះយោបល់យ៉ាងស៊ីជម្រៅស្តីពីការប្រមូលទិន្នន័យសម្រាប់ចងក្រងផលិតផលក្នុងស្រុកសរុប (GDP) និង សន្ទស្សន៍ថ្លៃទំនិញប្រើប្រាស់ (CPI) សម្រាប់ខេត្តបន្ទាយមានជ័យ ដោយកិច្ចប្រជុំដ៏សំខាន់នេះធ្វើឡើងនៅសាលប្រជុំមន្ទីរផែនការខេត្ត ដោយមានការចូលរួមពីលោក លោកស្រី ប្រធាន-អនុប្រធានមន្ទីរអង្គភាពនានាជុំវិញខេត្ត។

កិច្ចប្រជុំនេះមានគោលបំណងពិនិត្យ និងពិភាក្សាលើវិធីសាស្ត្រនៃការប្រមូលទិន្នន័យឱ្យកាន់តែមានប្រសិទ្ធភាព និងភាពត្រឹមត្រូវ ដើម្បីធានាថាការគណនា GDP និង CPI របស់ខេត្តបន្ទាយមានជ័យ មានភាពឆ្លុះបញ្ចាំងពីសភាពការណ៍សេដ្ឋកិច្ចជាក់ស្តែង។ 

ក្នុងឱកាសនោះ លោកស្រី ព្រំ ស៊ីណា បានសង្កត់ធ្ងន់លើសារៈសំខាន់នៃទិន្នន័យទាំងពីរនេះ ដែលជាសូចនាករសេដ្ឋកិច្ចដ៏សំខាន់សម្រាប់រៀបចំផែនការអភិវឌ្ឍន៍ សិក្សាពីកំណើនសេដ្ឋកិច្ច និងវាយតម្លៃពីផលប៉ះពាល់នៃការប្រែប្រួលតម្លៃទំនិញលើជីវភាពរស់នៅរបស់ប្រជាពលរដ្ឋ និងបានជំរុញឱ្យមន្ទីរអង្គភាពពាក់ព័ន្ធទាំងអស់ បង្កើនកិច្ចសហការ និងទទួលខុសត្រូវខ្ពស់ក្នុងការផ្តល់ទិន្នន័យឱ្យទាន់ពេលវេលា និងមានភាពសុក្រឹត។ ទិន្នន័យដែលទទួលបានពីមន្ទីរនីមួយៗ គឺមានសារៈសំខាន់ណាស់ក្នុងការផ្សារភ្ជាប់គ្នាបង្កើតបានជាទិន្នន័យសេដ្ឋកិច្ចរួមរបស់ខេត្ត។

លោកស្រីបានបញ្ជាក់ថា គុណភាពនៃទិន្នន័យគឺជាមូលដ្ឋានគ្រឹះសម្រាប់ការគណនា GDP និង CPI ប្រកបដោយភាពជឿទុកចិត្ត។ ការប្រមូលទិន្នន័យត្រូវតែធ្វើឡើងដោយប្រុងប្រយ័ត្ន ផ្អែកលើមូលដ្ឋានជាក់ស្តែង និងចៀសវាងរាល់កំហុសឆ្គងដែលអាចនាំឱ្យមានការប៉ះពាល់ដល់លទ្ធផលចុងក្រោយ និងបានគូសបញ្ជាក់អំពីតម្រូវការក្នុងការធ្វើបច្ចុប្បន្នភាពទិន្នន័យជាប្រចាំ និងការពង្រីកវិសាលភាពនៃការប្រមូលទិន្នន័យ ដើម្បីឱ្យ GDP និង CPI អាចឆ្លុះបញ្ចាំងបាននូវគ្រប់សកម្មភាពសេដ្ឋកិច្ច និងការប្រែប្រួលតម្លៃទំនិញនៅក្នុងខេត្ត។

ជាមួយគ្នានោះដែរ លោកស្រីបានលើកទឹកចិត្តឱ្យមានការប្រើប្រាស់បច្ចេកវិទ្យាទំនើបក្នុងការប្រមូល និងគ្រប់គ្រងទិន្នន័យ ដើម្បីបង្កើនប្រសិទ្ធភាព និងកាត់បន្ថយកំហុសឆ្គងដោយកត្តាមនុស្ស និងបានអំពាវនាវឱ្យមន្ត្រីពាក់ព័ន្ធទាំងអស់ យល់ដឹងកាន់តែច្បាស់ពីសារៈសំខាន់នៃ GDP និង CPI ចំពោះការអភិវឌ្ឍសេដ្ឋកិច្ចសង្គមរបស់ខេត្ត ដើម្បីចូលរួមចំណែកឱ្យបានសកម្ម និងប្រកបដោយស្មារតីទទួលខុសត្រូវខ្ពស់។

សូមជម្រាបថា កិច្ចប្រជុំពិភាក្សា និងពិគ្រោះយោបល់នេះគឺមានសារៈសំខាន់ណាស់ក្នុងការជំរុញការងារប្រមូលទិន្នន័យសម្រាប់ចងក្រង GDP និង CPI នៅខេត្តបន្ទាយមានជ័យឱ្យកាន់តែមានប្រសិទ្ធភាព និងគុណភាពខ្ពស់។ លទ្ធផលនៃកិច្ចប្រជុំនេះនឹងក្លាយជាមូលដ្ឋានដ៏រឹងមាំសម្រាប់រៀបចំផែនការអភិវឌ្ឍន៍សេដ្ឋកិច្ចសង្គមប្រកបដោយចីរភាព និងឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋក្នុងខេត្ត៕

ដោយ ឈុន សារ៉ាត