AKP កំពង់ឆ្នាំង ថ្ងៃទី០៧ ខែមិថុនា ឆ្នាំ២០២៥-- ឯកឧត្តម លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្ត បានដឹកនាំក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ចុះពិនិត្យព្យាបាលជំងឺ ជូនប្រជាពលរដ្ឋ ដោយឥតគិតថ្លៃ នៅស្រុកសាមគ្គីមានជ័យ ខេត្តកំពង់ឆ្នាំង កាលពីថ្ងៃទី០៦ ខែមិថុនា ឆ្នាំ២០២៥ ដោយមានការអញ្ជើញចូលរួមពី ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង លោកយិន សាវ៉ន អភិបាលរងខេត្ត លោក ឈួន ចាន់ណា អភិបាលស្រុកសាមគ្គីមានជ័យ រួមទាំងថ្នាក់ដឹកនាំមន្ទីរអង្គភាពពាក់ព័ទ្ធជុំវិញខេត្តផងដែរ។

ក្នុងឱកាសនោះ ឯកឧត្តម លេង ផាលី បានពាំនាំនូវការផ្ដាំផ្ញើសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឯកឧត្តមឧបនាយករដ្ឋមន្រ្ត ហ៊ុន ម៉ានី តែងតែគិតគូពីសុខទុក្ខរបស់ប្រជាជនយើង ដែលតែងតែមានការសណ្តោសប្រណី និងចាត់មន្ត្រីចុះសួរសុខទុក្ខប្រជាពលរដ្ឋដល់មូលដ្ឋានយកចិត្តទុកដាក់លើសុខុមាលភាពប្រជាពលរដ្ឋទូទៅ ជាពិសេសលើស្ត្រីក្រីក្រលំបាក មានជំងឺធ្ងន់ធ្ងរ និងខ្វះលទ្ធភាពក្នុងការទទួលសេវាព្យាបាលជាដើម។ 

ទន្ទឹមនឹងនេះ ឯកឧត្តមបានបន្តទៀតថា ក្រុមវេជ្ជសាស្ត្រឯកឧត្តម ហ៊ុន ម៉ានី បានផ្តល់ការអប់រំផ្នែកសុខភាពបន្ថែមជូនដល់ប្រជាពលរដ្ឋ ទាំងអស់ដែលអញ្ជើញមកទទួលសេវាព្យាបាលសម្រាប់ថ្ងៃនេះចំនួនជាង១០០០នាក់ ជាមោទនភាពយ៉ាងក្រៃឡែងដែលប្រជាពលរដ្ឋទាំងអស់បានអញ្ជើញមកទទួលការពិនិត្យ និងព្យាបាលជំងឺនាពេលនេះសុទ្ធតែបានបង្ហាញនូវភាពជឿជាក់នូវការព្យាបាលផ្នែកវិទ្យាសាស្ត្រ ព្រោះកន្លងមកមានអ្នកជម្ងឺមួយចំនួនជឿលើការបន់ស្រន់ ជាទំនាមទំលាប់មួយ តែទោះជាយ៉ាងណាក៏ដោយផ្នែកវេជ្ជសាស្ត្រអាចជួយសង្គ្រោះយើងបានទាន់ពេលវេលា។

ស្របគ្នានេះដែរ ឯកឧត្តមបានកត់សម្គាល់ទៀតថា សុខភាពមាតាទារក និងកុមារជាសក្ខីភាពបញ្ជាក់ពីការយកចិត្តទុកដាក់របស់រាជរដ្ឋាភិបាលក្នុងការខិតខំបន្តដើម្បីសម្រេចគោលលដៅអភិវឌ្ឍដែលសំដែងនូវឆន្ទះខ្ពស់ក្នុងការបន្តរួមចំណែកការងារលើកកម្ពស់សុខភាពស្ត្រីកុមារ និងទារកនៅក្នុងព្រះរាជាណាចក្រកម្ពុជាជាពិសេសការកាត់បន្ថយអត្រាស្លាប់របស់មាតា និងទារកនៅពេលកំពុងសម្រាលកូននិងក្រោយពេកសម្រាលកូននោះ។ យកចិត្តទុកដាក់ឱ្យបានស៊ីជម្រៅថែមទៀតដល់ការបណ្តុះបណ្តាលជំនាញពេទ្យឆ្មបនិងលើកកម្ពស់សីលធម៌ល្អក្នុងការសង្គ្រោះ និងសម្ដែងនូវឆន្ទៈខ្ពស់ក្នុងការបន្តរួមចំណែកការងារលើកកម្ពស់សុខភាពបន្ទាន់ផ្នែកសម្ភព និងការថែទាំទារកផងដែរ៕

ដោយ បៃ ស៊ីថុន