AKP ភ្នំពេញ ថ្ងៃទី០៧ ខែមិថុនា ឆ្នាំ២០២៥
ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានថ្លែងថា គោលបំណងរបស់អ្នកបង្កើតឡើងនូវព័ត៌មានក្លែងក្លាយ គឺដើម្បីទាញយកផលប្រយោជន៍ខាងសេដ្ឋកិច្ច និងអាជីវកម្មតាមបែបបោកបញ្ឆោត ដែលយើងទាំងអស់គ្នាត្រូវតែមានការប្រុងប្រយ័ត្ន ដោយការបោកបញ្ឆោតនេះគេ ច្រើនធ្វើឡើងនៅតាមបណ្តាញទំនាក់ទំនងសង្គមនានាមានតាមរយៈប្រព័ន្ធតេឡេក្រាមជាដើម ដូចជាការទាក់ទាញឱ្យយើងចូលរួមធ្វើការវិនិយោគជាដើមដោយគេយកឈ្មោះថ្នាក់ដឹកនាំមកប្រើប្រាស់ ដើម្បីបង្ហាញពីទំនុកចិត្តពីក្រុមអ្នកដែលត្រូវគេបោកបញ្ឆោត។ ការលើកឡើងរបស់ឯកឧត្តមអ្នកនាំពាក្យក្រសួងព័ត៌មានយ៉ាងដូច្នេះ ក្នុងសិក្ខាសាលាក្រោមប្រធានបទ “ពលរដ្ឋឌីជីថលទប់ស្កាត់ព័ត៌មានក្លែងក្លាយ”  ដែលប្រារព្ធធ្វើនៅទីស្នាក់ការកណ្តាលអង្គការសមាគមយុវជនស៊ីវិល នាព្រឹកថ្ងៃទី០៧ ខែមិថុនា ឆ្នាំ២០២៥ នៅរាជធានីភ្នំពេញ។

ឯកឧត្តម ទេព អស្នារិទ្ធ បានគូសបញ្ជាក់ថា ការដែលយើងមានភាពជឿជាក់ ហើយបានដាក់ប្រាក់ចូលទៅក្នុងគម្រោងវិនិយោគណាមួយដែលបង្កើតឡើងដោយក្រុមជនអ្នកបោកបញ្ឆោតនោះ គឺហាក់បីដូចជា យើងបានបាចអំបិលចូលទៅក្នុងទឹកអ៊ីចឹង ហើយមួយវិញទៀតក៏នៅមានអ្នកចាញ់បោកអស់លុយកាក់ដោយសារការបោកប្រាស់ក្នុងរឿងស្នេហា ខណៈដែលមានមនុស្សមួយចំនួនក៏មានការចាញ់បោកតាមរយៈការទំនិញតាមអនឡាញថែមទៀតផង។ ឯកឧត្ដមអ្នកនាំពាក្យបានលើកឡើងថា នេះគឺជាការរងគ្រោះដោយសារតែយើងខ្វះការពិចារណា ដោយសារតែសម័យទំនើបយើងផ្អើលឈូឆរពីរឿងសេដ្ឋកិច្ចឌីជីថល ចង់ក្លាយជាផ្នែកនៃសេដ្ឋកិច្ចឌីជីថល តែទីបំផុតបានក្លាយទៅជាជនរងគ្រោះនៅក្នុងការប្រើប្រាស់ដែលយើងមិនបានគិតគូរពិចារណា។ 
ឯកឧត្ដមអនុរដ្ឋលេខាធិការ និងជាអ្នកនាំពាក្យក្រសួងព័ត៌មានបានបញ្ជាក់បន្ថែមថា៖ «បើយើងនិយាយពីសេដ្ឋកិច្ចឌីជីថលដែលរាជរដ្ឋាភិបាលបានខិតខំរៀបចំចេញជាគោលនយោបាយ ហើយបានដាក់ឱ្យអនុវត្តន៍នោះ គឺរាជរដ្ឋាភិបាលបានគិតគូយ៉ាងគ្រប់ជ្រុងជ្រោយ ដើម្បីជំរុញកំណើន។ ប៉ុន្តែខណៈពេលដែលយើងកំពុងអនុវត្តន៍ទាំងរាជរដ្ឋាភិបាល ទាំងក្រសួងសេដ្ឋកិច្ច និង ហិរញ្ញវត្ថុ ទាំងយើងដែលជាអ្នកប្រើប្រាស់កំពុងតែអនុវត្តន៍ តែទន្ទឹមនេះក៏មានជនខិលខូច ដែលមិនមែន តែនៅកម្ពុជានោះទេ គឺនៅទូទាំងពិភពលោកមានការបោកប្រាស់តាមបែបឌីជីថលធ្ងន់ធ្ងរជាងកម្ពុជាទៅទៀត គ្រាន់តែគេមិនផ្សព្វផ្សាយ ព្រោះគេខ្លាចខូចឈ្មោះប្រទេសរបស់គេ ហើយភ្ជាប់រឿងនេះទៅនឹងបញ្ហាសន្តិសុខជាតិ»។

ជាមួយគ្នានេះដែរ ឯកឧត្តម ទេព អស្នារិទ្ធ ក៏បានអំពាវនាវម្តងទៀត ដោយសូមឱ្យអ្នកសារព័ត៌មានទាំងអាជីព និងមិនមែនអាជីព រួមទាំងអ្នកដែលចូលចិត្តចែកចាយព័ត៌មាននៅលើបណ្តាញទំនាក់ទំនងសង្គមសូមឱ្យបង្កើននូវការប្រុងប្រយ័ត្ន ព្រោះរឿងសន្តិសុខជាតិនេះមិនមែនជារឿងដែលយើងត្រូវយកមកចែកចាយ ដោយឈរលើប្រភពដែលមិនច្បាស់លាស់នោះទេ ខណៈដែលព័ត៌មាននៅលើបណ្តាញសង្គមគ្រាន់តែជាផ្នែកតូចមួយប៉ុណ្ណោះនៃការទទួលព័ត៌មាន ដែលវាមិនមានភាពច្បាស់លាស់ វាមិនអាចដើរតួជំនួសឱ្យប្រព័ន្ធផ្សព្វផ្សាយដែលមានក្រមសីលធម៌វិជ្ជាជីវៈបានទេ។ ឯកឧត្ដមបានអះអាងថា ប្រព័ន្ធផ្សព្វផ្សាយមានក្រមសីលធម៌វិជ្ជាជីវៈ គឺជាអង្គភាពសារព័ត៌មានដែលបានចុះបញ្ជីត្រឹមត្រូវ ជាអង្គភាពមាននិពន្ធនាយក មានការីនិពន្ធ មានអ្នកយកព័ត៌មាន មានការផ្ទៀងផ្ទាត់ត្រឹមត្រូវ ទើបហៅថាជាអង្គភាពសារព័ត៌មានអាជីព និងមានវិជ្ជាជីវៈក្នុងការបញ្ចេញព័ត៌មានជូនប្រជាពលរដ្ឋ ដោយមិនត្រូវទៅយកប្រភពពីបណ្តាញទំនាក់ទំនងសង្គមមកធ្វើការផ្សព្វផ្សាយបន្តនោះទេ។  

សូមជម្រាបថា ការរៀបចំសិក្ខាសាលា ក្រោមប្រធានបទ៖ ពលរដ្ឋឌីជីថលទប់ស្កាត់ព័ត៌មានក្លែងក្លាយនេះ ហើយបន្ទាប់មក ក៏បានធ្វើយុទ្ធនានិយាយថាទេចំពោះព័ត៌មានក្លែងក្លាយ ដោយការដង្ហែដោយថ្មើរជើងជុំវិញផ្សារអូឡាំពិកដល់សាលាបឋមសិក្សាវត្តមហាមន្ត្រី ដើម្បីជំរុញការយល់ដឹងអំពីព័ត៌មានក្លែងក្លាយផងដែរ៕ដោយ៖ ចាន់ សុភឿន, រូបថត៖ សិរីឧត្ដម