AKP រតនគិរី ថ្ងៃទី០៧ ខែមិថុនា ឆ្នាំ២០២៥--
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាមានប្រសាសន៍ថា រតនគីរី ត្បិតជាខេត្តដែលឆ្ងាយជាងគេក៏ពិតមែន តែមិនមែនន័យថាជាខេត្តដែលរាជរដ្ឋាភិបាលមិនសូវបានយកចិត្តទុកដាក់នោះទេ សូម្បីតែក្នុងសម័យសង្គ្រាមក៏ដោយ ដែលពីមុនបើចង់មកខេត្តមួយនេះត្រូវចំណាយពេលយូរ និងដោយលំបាក តែបច្ចុប្បន្នក្រោមម្លប់សន្តិភាព ដែលកើតចេញពីនយោបាយឈ្នះ ឈ្នះ និងការអភិវឌ្ឍធ្វើឱ្យមានន័យសម្រាប់អ្នករតនគីរីយ៉ាងសំខាន់ណាស់។ ការលើកឡើងរបស់សម្តេចធិបតីនាយករដ្ឋមន្ត្រីយ៉ាងដូច្នេះ ក្នុងពិធីសម្ពោធអគារសិក្សា អគារទីចាត់ការ អគារសយនដ្ឋាន អគារពិសោធន៍ និងសមិទ្ធផលនានាក្នុងវិស័យអប់រំខេត្តរតនគិរី នាព្រឹកថ្ងៃទី០៧ ខែមិថុនា ឆ្នាំ២០២៥។

សម្តេចធិបតី ហ៊ុន ម៉ាណែត បានថ្លែងថា ក្មេងៗក្រោយសង្គ្រាមអាចនឹងមិនយល់ពីការលំបាក តែបើយើងសួរឪពុកម្តាយយើងដែលធ្លាប់រស់នៅទីនេះគឺអាចដឹងពីការលំបាកថាយ៉ាងណានោះ ហើយថា គេមិនអាចយក ការប្រៀបធៀបរវាងការអភិវឌ្ឍរបស់រាជធានីភ្នំពេញជាមួយនឹងការអភិវឌ្ឍរបស់ក្រុងបានលុង ខេត្តរតនគិរីបាននោះទេ វាជារឿងដាច់ដោយឡែកពីគ្នា តែគេអាចធ្វើការប្រៀបធៀបរវាងក្រុងបានលុងបច្ចុប្បន្ន ទៅនឹងក្រុងបានលុងកាលពីអតីតកាល ដោយបច្ចុប្បន្នបានលុងកំពុងតែមានការអភិវឌ្ឍនេះហើយគឺជា សូចនាករដែលបញ្ជាក់ពីការអភិវឌ្ឍជាក់ស្តែង ហើយក៏ជាមោទនភាពដែលបងប្អូនប្រជាពលរដ្ឋនៅទីនេះ ទទួលបាន។ សម្តេចធិបតីបានបញ្ជាក់ថា ប្រសិនបើយើងនៅតែរក្សាបាននូវសុខសន្តិភាព យើងក៏នៅតែទទួលបានការអភិវឌ្ឍបែបនេះ ហើយកាន់តែប្រសើរជាងនេះទៅទៀតសម្រាប់ក្មេងជំនាន់ក្រោយៗ ដែលការអភិវឌ្ឍនេះគឺកើតចេញពីកត្តានៃសុខសន្តិភាព ស្ថិរភាពនយោបាយ ដែលវានឹងនាំយើងដើរទៅមុខជានិច្ច សូមកុំឱ្យវាដើរថយក្រោយព្រោះតែស្រុកកើតសង្គ្រាមដូចកាលពីអតីតកាលនោះ។

សម្តេចធិបតីនាយករដ្ឋមន្ត្រីបានសម្តែងនូវការអរគុណយ៉ាងជ្រាលជ្រៅបំផុតជូនចំពោះ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃកម្ពុជា បច្ចុប្បន្នសម្តេចជាប្រធាន ព្រឹទ្ធសភា និងថ្នាក់ដឹកនាំគ្រប់ជាន់ថ្នាក់របស់គណបក្សប្រជាជនកម្ពុជា ដែលបានខិតខំកសាងប្រទេសតាំងពីការលំបាកលំបិនរហូតទទួលបានការអភិវឌ្ឍដូចសព្វថ្ងៃ ជាពិសេសនៅតាមបណ្តាខេត្តភាគឦសានដោយក្រោយការបញ្ចប់សង្គ្រាមភ្លាមរាជរដ្ឋាភិបាលក្រោមការដឹកនាំរបស់សម្តេចតេជោបានជំរុញការអភិវឌ្ឍនៅតាមបណ្តាខេត្តនាទិសឦសានឱ្យបានក្នុងល្បឿនលឿន បិទនូវគម្លាតក្នុងការអភិវឌ្ឍប្រទេស ដោយក្នុងគោលនយោបាយអភិវឌ្ឍន៍នេះរាជរដ្ឋាភិបាលបានរៀបចំដាក់ខេត្តចំនួន៤នៅទិសឦសាននេះសម្រាប់ការអភិវឌ្ឍ តែផ្ទុយទៅវិញក្នុងពេលកន្លងទៅនេះមានគេធ្វើបាតុកម្មប្រឆាំងនឹងការដាក់ខេត្តទាំង៤នេះទៅក្នុងគម្រោងអភិវឌ្ឍន៍ ដែលបញ្ហានេះសម្តេចនាយករដ្ឋមន្ត្រីបានលើកឡើងថា ប្រសិនបើរាជរដ្ឋាភិបាលឱ្យខេត្តទាំង៤នេះទៅគេនោះ ពីមុនយើងក៏មិនចាំបាច់ធ្វើការអភិវឌ្ឍស្អីនោះទេ ទុកឱ្យដាច់តែម្តងទៅល្អជាង មិនចាំបាច់ធ្វើផ្លូវតភ្ជាប់ស្អីទេ។ សម្តេចធិបតីនាយករដ្ឋមន្រ្ដីបានគូសបញ្ជាក់ថា ផែនការនៃការអភិវឌ្ឍនៅតំបន់ត្រីកោណរវាងប្រទេសទាំង៣ កម្ពុជា ឡាវ និងវៀតណាម ក្រោមការគៀងគរជំនួយពីប្រទេសជប៉ុន ធនាគារពិភពលោក និងដៃគូអភិវឌ្ឍន៍ដទៃទៀតនឹងត្រូវមកជួយដល់គម្រោងអភិវឌ្ឍន៍មួយនេះដើម្បីឱ្យបណ្តាខេត្តក្រីក្រនៃប្រទេសទាំង៣ ក្នុងតំបន់ត្រីកោណនេះមានការអភិវឌ្ឍបន្ថែមទៀត ដែលគម្រោងមួយនេះគឺទទួលបានការគាំទ្រពីបណ្តាប្រទេស និងដៃគូអភិវឌ្ឍន៍ជានានា ហើយពលរដ្ឋកម្ពុជាក៏មានការយល់ដឹងពីគម្រោងមួយនេះយ៉ាងច្បាស់លាស់ថា វាមិនបានបាត់ដីស្អីនោះទេ៕

ដោយ៖ ចាន់ សុភឿន