AKP ភ្នំពេញ ថ្ងៃទី០៦ ខែមិថុនា ឆ្នាំ២០២៥-- ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងកោតសរសើរ និងលើកទឹកចិត្តខ្ពស់ចំពោះថ្នាក់ដឹកនាំរដ្ឋបាលខេត្តជាប់ព្រំដែនថៃ រួមទាំងសប្បុរសជន និងជនរួមជាតិ ដែលបាន និងកំពុងសកម្មចុះសួរសុខទុក្ខ ផ្ដល់កម្លាំងចិត្ត និងការឧបត្ថម្ភគាំទ្រជំនួយសម្ភារផ្សេងៗដល់កម្លាំងកងយុទ្ធពលខេមរភូមិន្ទ និងនគរបាលការពារព្រំដែន ដែលបាន និងកំពុងបំពេញភារកិច្ចថែរក្សា ការពារបូរណភាពទឹកដីនៅតាមខ្សែបន្ទាត់ព្រំដែន។

លោក រ៉េន រតនៈ ជំនួយការ និងជាអ្នកនាំពាក្យឯកឧត្តមអភិសន្តិបណ្ឌិត ស សុខា ថ្លែងថាឯកឧត្តម ឧបនាយករដ្ឋមន្ត្រីបានគូសបញ្ជាក់ថា ថ្នាក់ដឹកនាំ មន្ត្រីរាជការ និងកម្លាំងគ្រប់ថ្នាក់ចំណុះក្រសួងមហាផ្ទៃ ក៏ដូចជនរួមជាតិកំពុងទទួលបាននូវភាពកក់ក្ដៅប្រកបដោយទំនុកចិត្តខ្ពស់ចំពោះការដឹកនាំប្រកបដោយភាពឈ្លាសវៃ និងប្រតិភាណរបស់សម្ដេចមហាបញ្ញាធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជាក់ស្ដែងក្នុងស្ថានភាពបច្ចុប្បន្ន គឺកងយោធពលខេមរភូមិន្ទ និងកម្លាំងនគរបាលការពារព្រំដែនបានទទួល និងអនុវត្តបទបញ្ជាសហការឈរជើងបំពេញបេសកកម្មប្រកបដោយភាពម៉ឺងម៉ាត់បំផុត ហើយថា ទោះបី ជារាជរដ្ឋាភិបាលមានភាពម្ចាស់ការ១០០ភាគរយលើបេសកកម្មជាប្រវត្តិសាស្ត្រនេះក៏ដោយ ប៉ុន្តែសកម្ម ភាពនៃការចុះសួរសុខទុក្ខ លើកទឹកចិត្ត និងផ្ដល់ការគាំទ្រពីថ្នាក់ដឹកនាំរដ្ឋបាលថ្នាក់ក្រោមជាតិ រួមទាំងសប្បុរសជន និងជនរួមជាតិ គឺជាការផ្ដល់នូវថាមពលផ្លូវចិត្តដ៏មហិមា ព្រមទាំងបង្ហាញនូវស្មារតីសាមគ្គីជាតិជាធ្លុងមួយដ៏រឹងមាំ ដែលធ្វើឱ្យកម្លាំងកងទ័ព និងនគរបាលការពារព្រំដែនកាន់តែមានភាពអង់អាចក្លាហាន និងក្ដីមោទនៈក្នុងភារកិច្ចដ៏ឧត្តុង្គឧត្តមនេះ។

សូមបញ្ជាក់ថា ចាប់ពីពេលដែលកងទ័ពថៃបើកការវាយឆ្មក់មកលើកងយោធពលខេមរភូមិន្ទបណ្ដាលឱ្យពលីកងទ័ពកម្ពុជាម្នាក់នៅតំបន់មុំបី ខេត្តព្រះវិហារ ភាពតានតឹង និងការប្រឈមមុខដាក់គ្នានៅតាមខ្សែបន្ទាត់ព្រំដែនរវាងប្រទេសទាំងពីរបានកើតមានសាជាថ្មី។ ក្រោមបទបញ្ជាដ៏ម៉ឺងម៉ាត់របស់សម្ដេចធិបតី នាយករដ្ឋមន្ត្រី កងយោធពលខេមរភូមិន្ទ ដោយមានការសហការគាំទ្រពីនគរបាលការពារព្រំដែន បានអនុវត្តតួនាទី និងភារកិច្ចការពារបូរណភាពទឹកដីយ៉ាងគត់មត់បំផុត៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)