AKP សៀមរាប ថ្ងៃទី០៦ ខែមិថុនា ឆ្នាំ២០២៥-- លោកស្រី ប៉ុល គឹមសាន ប្រធានសមាគមចុងភៅកម្ពុជា បានថ្លែងប្រាប់អ្នកសារព័ត៌មាននៅខេត្តសៀមរាប នាព្រឹកថ្ងៃទី០៦ ខែមិថុនា ឆ្នាំ២០២៥ថា នៅក្នុងកម្មវិធីប្រកួតចម្អិនម្ហូបដ៏ធំប្រចាំឆ្នាំ ដែលមានឈ្មោះថា Thailand Ultimate Chef Challenge 2025 (TUCC) កាលពីថ្ងៃទី ២៧ ដល់ថ្ងៃទី ៣១ខែ ឧសភា ឆ្នាំ២០២៥កន្លងមកនេះ គឺជាការប្រកួតលំដាប់អន្តរជាតិ ដែលរៀបចំឡើងដោយសមាគមចុងភៅថៃ និងសមាគមចុងភៅពិភពលោក (WAC) ដោយមានបេក្ខភាពចូលរួមប្រគួតប្រមាណជាង៥០០នាក់ ដែលមកពីប្រទេសចំនួន៩នោះគឺ ប្រទេសកម្ពុជា វៀតណាម ម៉ាឡេស៊ី ឥណ្ឌូនេស៊ី ហ្វីលីពីន ចិនតៃវ៉ាន់ កូរ៉េខាងត្បូង ប៉ាគីស្ថាន និងប្រទេសថៃជាម្ចាស់ផ្ទះ។

លោកស្រីបន្ដថា ក្នុងកម្មវិធីប្រគួតដ៍ធំលំដាប់អន្ដរជាតិនោះ លោកស្រីបានដឹកនាំសមាជិកនៃសមាគមចុងភៅកម្ពុជាចំនួន៣ក្រុមស្មើ១៤រូប ដោយបានយកមុខម្ហូបខ្មែរចំនួន៦មុខ តំណាងឱ្យប្រទេសកម្ពុជាដើម្បីចូលរួមប្រកួត ដែលមានហហ្មុកត្រីអណ្តែង ខសាច់ជ្រូក ការីសាច់មាន់ និងញាំសាច់គោត្រកួនស្រួយជាដើម។ ហើយក្រោយការប្រកួតយ៉ាងយកចិត្តទុកដាក់អស់រយៈពេល៤ថ្ងៃ   ក្រុមសមាគមចុងភៅកម្ពុជា (CCA) ទទួលបានលទ្ធផលដ៏គួរឱ្យកោតស្ញប់ស្ញែង និងគួរជាទីមោទកភាព សម្រាប់ប្រទេសកម្ពុជា  ក្នុងវិស័យម្ហូបអាហារ ដោយពួកគាត់បានឈ្នះមេដៃចំនួន២១មេដៃ ក្នុងនោះមានមេដាយមាសចំនួន៦ មេដាយប្រាក់ចំនួន៧ និងមេដាយសំរិទ្ធចំនួន៨ ព្រមទាំងបានពានរង្វាន់ធំចំនួន១ (Best Ultimate Asian Gourmet Challenge) ប្រាក់រង្វាន់ ចំនួន២ម៉ឺនបាត រួមទាំងវិញ្ញាបនបត្រតាមលំដាប់ពិន្ទុ និងលិខិតថ្លែងអំណរគុណផងដែរ។ 

លោកស្រីបានបន្តថា ម្ហូបអាហារខ្មែរគឺជាផ្នែកមួយដ៏សំខាន់សម្រាប់វិស័យទេសចរណ៍ និងវប្បធម៌។  ដូចនេះហើយបានជាសមាគមចុងភៅកម្ពុជា តែងតែបានដឹកនាំចុងភៅឆ្នើមរបស់កម្ពុជា ទៅចូលរូមក្នុងការប្រកួតអន្តរជាតិនានានៅក្រៅប្រទេស និងទទួលបានជ័យជំនះជាបន្តបន្ទាប់។ ជាមួយនឹងការចូលរួមប្រកួតនេះ សមាគមចុងភៅរំពឹងថា នេះជាផ្នែកមួយក្នុងការផ្សព្វផ្សាយមុខម្ហូបរបស់កម្ពុជា ទៅកាន់ពិភពលោក ឱ្យគេបានស្គាល់មុខម្ហូបខ្មែរកាន់តែទូលំទូលាយ នឹងទាក់ទាញភ្ញៀវទេសចរឱ្យមកកម្សាន្ត និងភ្លក្សរសជាតិម្ហូបខ្មែរនៅកម្ពុជាដោយផ្ទាល់៕

ដោយ ឃុត សៅ