AKP ភ្នំពេញ ថ្ងៃទី០៦ ខែមិថុនា ឆ្នាំ២០២៥--ឯកឧត្តម សរ សិទ្ធិ រដ្ឋលេខាធិការ ទទួលការងារអគ្គលេខាធិការដ្ឋាននៃក្រុមប្រឹក្សាកីឡាក្រសួងមហាផ្ទៃ និងជា ប្រធានសហព័ន្ធកីឡាសូហ្វតិនីសកម្ពុជាបានផ្តល់អនុសាសន៍ណែនាំដល់មន្ត្រីបច្ចេកទេស និងអាជ្ញាកណ្តាលថ្នាក់ជាតិទាំងអស់ ដែលបានបញ្ចប់វគ្គបណ្តុះបណ្តាលប្រកបដោយភាពជោគជ័យនាពេលនេះសូមប្រកាន់ខ្ជាប់នូវក្រមសីលធម៌ វិជ្ជាជីវៈ និងត្រូវមានសុភវិនិច្ឆ័យប្រកប ដោយតម្លាភាពចំពោះតួនាទីភារកិច្ចរបស់ខ្លួន ក្នុងនាមជាអ្នកកាត់សេចក្តី។

ការផ្តល់អនុសាសន៍របស់ឯកឧត្តប្រធានបានធ្វើឡើងនៅក្នុងឱកាសអញ្ជើញជាអធិបតី ក្នុងពិធីបិទវគ្គបណ្តុះបណ្តាលមន្ត្រីបច្ចេកទេស និងអាជ្ញាកណ្តាលថ្នាក់ជាតិ ឆ្នាំ២០២៥ នៅរសៀលថ្ងៃទី៦ ខែមិថុនា ឆ្នាំ២០២៥ នៅពហុកីឡដ្ឋានជាតិអូឡាំពិក។

ឯកឧត្តម សរ សិទ្ធិ មានប្រសាសន៍ថា ក្នុងនាមសហព័ន្ធកីឡាសូហ្វតិន្នីសកម្ពុជា និងឯកឧត្តមពិតជាមានសេចក្តីសោមនស្សរីករាយ ដែលបានមកចូលរួមក្នុងពិធីបិទវគ្គបណ្តុះបណ្តាលមន្ត្រី បច្ចេកទេស និងអាជ្ញាកណ្តាលថ្នាក់ជាតិ ឆ្នាំ២០២៥ របស់សហព័ន្ធកីឡាសូហ្វតិន្នីសកម្ពុជា។ វគ្គបណ្តុះបណ្តាលនេះអាចដំណើរបាន គឺដោយទទួលបានថវិកាគាំទ្រពីក្រសួងអប់រំ យុវជន និងកីឡា ទើបសហព័ន្ធកីឡាសូហ្វតិន្នីសកម្ពុជាអាចរៀបចំវគ្គបណ្តុះបណ្តាលដល់មន្ត្រីបច្ចេកទេស និងអាជ្ញាកណ្តាលថ្នាក់ជាតិនេះឡើង ស្របទៅតាមផែនការសកម្មភាពការងារប្រចាំឆ្នាំរបស់ខ្លួន ក្នុងគោលបំណងពង្រឹងសមត្ថភាពបន្ថែមចំណេះដឹង និងជំនាញវិជ្ជាជីវៈដល់មន្ត្រីបច្ចេកទេស និងអាជ្ញាកណ្តាលថ្នាក់ជាតិរបស់ខ្លួនឱ្យកាន់តែមានប្រសិទ្ធភាព ក្នុងការសម្រេចចិត្តកាត់សេចក្តីលើទីលានប្រកួត។ វគ្គបណ្តុះបណ្តាលនៅពេលនេះ ឯកឧត្តមបានចាត់ទុកថា មានសារៈសំខាន់ ដែលជាការដុសខាត់ ដើម្បីអភិវឌ្ឍបន្ថែមនូវចំណេះដឹងជាមួយនឹងមេរៀនថ្មីៗល្អៗ ដែលគ្រូឧទ្ទេសបានធ្វើការបង្ហាត់បង្ហាញ។

ឯកឧត្តម សរ សិទ្ធិ បានគូសបញ្ជាក់ទៀតថា ជាការពិតទាំងមន្ត្រីបច្ចេកទេស ទាំងអាជ្ញាកណ្តាលត្រូវតែមានបទពិសោធន៍ខ្ពស់តាមកម្រិតស្តង់ដា ទើបអាចកាត់សេចក្តីនៅក្នុងព្រឹត្តិការណ៍ប្រកួតបានដោយភាពជឿជាក់។ ហេតុដូច្នេះហើយ ទើបសហព័ន្ធកីឡាសូហ្វតិន្នីសកម្ពុជាបានដាក់ចេញនូវផែនការសកម្មភាពរបស់ខ្លួន ក្នុងការអភិវឌ្ឍសមត្ថភាពរបស់មន្ត្រីបច្ចេកទេស និងអាជ្ញាកណ្តាល ដើម្បីឱ្យពួកគាត់ទទួលបាននូវជំនាញបច្ចេកទេស ដើម្បីអាចឆ្លើយតបបានទៅនឹងកម្រិតនៃព្រឹត្តិការណ៍ប្រកួតប្រកបដោយប្រសិទ្ធិភាព។

បន្ថែមពីលើនេះ ឯកឧត្តមប្រធានសង្កត់ធ្ងន់ថា សហព័ន្ធតែងតែទទួលបានលទ្ធផលគួរជាទីមោទនៈ ដោយទាំងអស់នេះគឺជាការចូលរួមរបស់ថ្នាក់ដឹកនាំ គ្រូបង្វឹក គ្រូជំនួយ និង អត្តពលិកផ្ទាល់ខ្លួនដែលបានខិតខំ តាមរយៈការអនុវត្តខ្ជាប់ខ្ជួននូវផែនការសកម្មភាព និងកាលវិភាគ ការហ្វឹកហាត់ប្រចាំថ្ងៃរបស់ខ្លួន ដោយទទួលបានថវិកាផ្តល់ជូនដោយក្រសួង អប់រំ យុវជន និងកីឡា។ សហព័ន្ធកីឡាសូហ្វតិន្នីសកម្ពុជា ជានិច្ចកាលតែងបានផ្សារភ្ជាប់ទំនាក់ទំនងល្អជាមួយនឹងក្រសួងអប់រំ យុវជន និងកីឡា គណៈកម្មាធិការ ជាតិអូឡាំពិកកម្ពុជា (NOCC) ក៏ដូចជាក្រសួង ស្ថាប័នពាក់ព័ន្ធនានាបានយ៉ាងល្អ រួមទាំងកិច្ចសហការជាមួយសហព័ន្ធកីឡាសូហ្វតិន្នីសអាស៊ី (ASTF) និងសហព័ន្ធកីឡារបស់ប្រទេសកូរ៉េ (KSTA) ផងដែរ។

ចែករំលែកបន្ធែមពីលើនេះ ឯកឧត្តម សរ សិទ្ធិ បានលើកឡើងថា ជាការពិតណាស់ ព្រះរាជាណាចក្រកម្ពុជាមានសុខសន្តិភាពពេញលេញ ក្រោមការដឹកនាំប្រកបដោយគតិបណ្ឌិតដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានផ្តល់ឱកាសដល់កីឡាករ កីឡាការិនី មន្ត្រីបច្ចេកទេស ក៏ដូចជាអាជ្ញាកណ្តាលរបស់យើងបានបញ្ចេញនូវសមត្ថភាពដើម្បីសុខភាពផង និងដើម្បីប្រកួតប្រជែងយកជ័យជម្នះជូនអង្គភាព ជូនគ្រួសារ និងសង្គមជាតិផងដែរ ដូចទៅនឹងប្រសាសន៍របស់សម្តេចតេជោ ដែលបានលើកឡើងថា «មានសន្តិភាព ទើបមានកីឡា» និង«កីឡារស់ក្នុងសន្តិភាព»។

បើតាមរបាយការណ៍របស់លោកស្រី ឃនសាត សាន្នីតា អគ្គលេខាធិការរង សហព័ន្ធកីឡាសូហ្វតិន្នីសកម្ពុជាជម្រាបជូនថា វគ្គបណ្តុះបណ្តាលនេះត្រូវបានធ្វើឡើងដោយទទួលបានការអនុញ្ញាតគោលកាណ៍ពីឯកឧត្តមប្រធានសហព័ន្ធ និងយោងតាមផែនការការកសាងធនធានមនុស្សរបស់សហព័ន្ធកីឡាសូហ្វតិន្នីសកម្ពុជា និងទទួលបានថវិកាគំាទ្រពីក្រសួងអប់រំ    យុវជន និងកីឡា ហើយសហព័ន្ធបានរៀបចំវគ្គបណ្តុះបណ្តាលនេះ០៥ថ្ងៃ ពីថ្ងៃទី០២-០៦ ខែមិថុនា ឆ្នាំ២០២៥ នៅសហព័ន្ធកីឡាសូហ្វតិន្នីសកម្ពុជា ក្នុងពហុកីឡដ្ឋានជាតិអូឡាំពិក។

វគ្គនេះធ្វើឡើងក្រោមការចែករំលែកពីគ្រូឧទ្ទេស២រូប គឺលោក   OGIWARA MASATO  គ្រូបង្វឹកអន្តរជាតិ ជន ជាតិកូរ៉េ និងលោក យី សារិន គ្រូបង្វឹកជាតិជនជាតិខ្មែរ ដោយមានសិក្ខាកាមចូលរួម ២៦ រូប (ប្រុស ២១ រូប និងស្រី ០៥រូប)។ ជាលទ្ធផល ឆ្លងតាមការសិក្សា សិក្ខាកាមនិទ្ទេស ល្អ ៧០% ល្អបង្គួរ ២០% និងមធ្យម ១០%។ វគ្គបណ្តុះបណ្តាលនេះពិតជាមានសារៈសំខាន់ណាស់ ក្នុងការលើកកម្ពស់សមត្ថភាព និងបង្កើនធនធានមនុស្សលើផ្នែកមន្រ្តីបច្ចេកទេស និងអាជ្ញាកណ្តាលកីឡាសូហ្វតិន្នីស ដើម្បីកាត់សេចក្តីក្នុងការប្រកួតឱ្យមានភាពសុក្រឹត្យ យុត្តិធម៌ និងមានធនធានគ្រប់ចំនួន ក្នុងការត្រៀមចូលរួមចំណែកដឹកនាំការប្រកួតថ្នាក់ជាតិ និងមានឱកាសចូលរួមការប្រកួតថ្នាក់អន្តរជាតិ៕

ដោយ ហេង ណាលីន