AKP កំពង់ស្ពឺ ថ្ងៃទី០៦ ខែមិថុនា ឆ្នាំ២០២៥--

មន្ទីរបរិស្ថានខេត្តកំពង់ស្ពឺបានចូលរួមសហការជាមួយរដ្ឋបាលខេត្តកំពង់ស្ពឺ និងរដ្ឋបាលស្រុកឱរ៉ាល់ ប្រារព្ធទិវាបរិស្ថានជាតិ និងបរិស្ថានពិភពលោក ៥ មិថុនា ក្រោមប្រធានបទ" ប្រយុទ្ធប្រឆាំងការបំពុលដោយប្លាស្ទិក Beat plastic Pollution" នៅវិទ្យាល័យសម្តេចជាស៊ីមឱរ៉ាល់ស្ថិតនៅភូមិគោក ឃុំសង្កែសាទប ស្រុកឱរ៉ាល់ កាលពីព្រឹកថ្ងៃទី០៥ ខែមិថុនា ឆ្នាំ២០២៥ ក្រោមអធិបតីភាពឯកឧត្តម សុខ សុទ្ធី អភិបាលរងខេត្ត តំណាងដ៏ខ្ពង់ខ្ពស់ឯកឧត្តមបណ្ឌិតជាម ច័ន្ទសោភ័ណ្ឌអភិបាលនៃគណៈអភិបាលខេត្តកំពង់ស្ពឺ ដោយមានអញ្ជើញចូលរួមអមដំណើរឯកឧត្តមអយ្យការអមសាលាដំបូងខេត្ត មេបញ្ជាការដ្ឋានយុទ្ធភូមិភាគ៣ ស្នងការរងនគរបាលខេត្ត មេបញ្ជាការរងកងរាជអាវុធហត្ថខេត្ត ប្រធានអនុប្រធានមន្ទីរអង្គភាពជុំវិញខេត្តលោកគ្រូអ្នកគ្រូ សិស្សានុសិស្ស ព្រះសង្ឃ ក្មួយៗកាកបាទក្រហមក្រុមយុវជនស្ម័គ្រចិត្តកាយរិទ្ធសរុបប្រមាណជាង១,០០០នាក់។

ឯកឧត្តម សុខ សុទ្ធី បានលើកឡើងថា ទិវាបរិស្ថានពិភពលោកត្រូវបានបង្កើតឡើងដោយអង្គការសហប្រជាជាតិក្នុងឆ្នាំ១៩៧២ នាឱកាសសន្និសីទស្តីពីបរិស្ថានមនុស្សនៅទីក្រុងស្តុកខូម ប្រទេសស៊ុយអែត ដោយកំណត់យកថ្ងៃ ៥ មិថុនា ជាថ្ងៃប្រារព្ធពិធី។ កម្ពុជាបានចូលរួមប្រារព្ធទិវាបរិស្ថានពិភពលោកតាំងពីឆ្នាំ១៩៩៣ ហើយបានបញ្ចូលគ្នានូវទិវាបរិស្ថានជាតិ និងពិភពលោកជារៀងរាល់ឆ្នាំ។ ទិវាបរិស្ថានជាតិត្រូវបានចារឹកក្នុងក្រមបរិស្ថាន និងធនធានធម្មជាតិ ដែលប្រកាសឱ្យប្រើដោយព្រះមហាក្សត្រនៅថ្ងៃទី២៩ ខែមិថុនា ឆ្នាំ២០២៣។

ក្នុងឱកាសដ៏ថ្លៃថ្លានេះ ឯកឧត្តមអភិបាលរងខេត្តបានថ្លែងអំណរគុណថ្នាក់ដឹកនាំ មន្រ្តីរាជការមន្ទីរបរិស្ថាន ជាពិសេសរដ្ឋបាលខេត្ត ក្រុង ស្រុក អាជ្ញាធរមូលដ្ឋាន កងកម្លាំងប្រដាប់អាវុធគ្រប់ប្រភេទ សិស្សានុសិស្ស លោកគ្រូអ្នកគ្រូ យុវជន សមាគម អង្គការសង្គមស៊ីវិល និងប្រជាពលរដ្ឋទាំងអស់ ដែលបានចូលរួមយ៉ាងផុសផុល រួមចំណែកលើកកម្ពស់សោភ័ណភាពទីក្រុង ទីប្រជុំជននៅតាមបណ្តាផ្លូវជាតិទូទាំងខេត្តកំពង់ស្ពឺ កាន់តែស្រស់ស្អាត មានអនាម័យ មានខ្យល់អាកាសល្អ និងសណ្តាប់ធ្នាប់ល្អ ការស់នៅប្រកបដោយផាសុខភាព ការទាក់ទាញអ្នកវិនិយោគ និងអ្នកទេសចរ មកខេត្តកំពង់ស្ពឺកាន់តែច្រើនឡើងថែមទៀត។ ភាពស្អាតគឺជាសសរស្តម្ភមួយដែលមានចែងក្នុងយុទ្ធសាស្រ្តចក្រាវិស័យបរិស្ថាន ដែលរៀបចំបង្កើតឡើង ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងអនុលោមតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា។ 

ឯកឧត្តម សុខ សុទ្ធី បានសំណូមពរដល់អ្នកពាក់ព័ន្ធទាំងអស់ទាំងវិស័យសាធារណៈ និងឯកជន រដ្ឋបាលខេត្ត រដ្ឋបាលក្រុង ស្រុក ខណ្ឌ និងអាជ្ញាធរមូលដ្ឋាន លោកគ្រូអ្នកគ្រូ សិស្សានុសិស្ស និងប្រជាពលរដ្ឋ រៀបចំសកម្មភាពចុះសម្អាតផ្លូវជាតិនៅតាមមូលដ្ឋានរៀងៗខ្លួន ការពង្រឹងរចនាសម្ព័ន្ធគ្រប់គ្រងសំរាម សំណល់ប្លាស្ទិកឱ្យបានល្អ និងស្នើឱ្យបន្តចូលរួមយុទ្ធនាការកាត់បន្ថយការប្រើប្រាស់ប្លាស្ទិក «ថ្ងៃនេះ ខ្ញុំមិនប្រើថង់ប្លាស្ទិកទេ» និងយុទ្ធនាការ «កម្ពុជាស្អាត ខ្មែរធ្វើបាន» ឆ្ពោះទៅជាចលនាគ្រប់ទីកន្លែងស្អាត ដើម្បីជំរុញភាពស្អាតរបស់ខេត្តកំពង់ស្ពឺបន្ថែមទៀត គឺធ្វើឱ្យសង្គមយើងស្អាត ប្រទេសជាតិមានបរិស្ថានស្អាត ប្រជាពលរដ្ឋមានសុខភាពល្អ និងការស់នៅប្រកបដោយចីរភាព។

ឯកឧត្តមបានបញ្ជាក់ថា កន្លងមក មន្ទីរបរិស្ថានបានបើកយុទ្ធនាការកាត់បន្ថយការប្រើប្រាស់ប្លាស្ទិក ចេះទុកដាក់ និងញែកសំរាម តាមរយៈយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» និងយុទ្ធនាការ "កម្ពុជាស្អាត ខ្មែរធ្វើបាន" ដោយមានការចូលរួមប្តេជ្ញាចិត្តពីសិស្សានុសិស្ស ព្រះសង្ឃ និយោជិត កម្មករ កម្មការិនី មន្ត្រីរាជការ កងកម្លាំប្រដាប់អាវុធ និងប្រជាពលរដ្ឋទូទាំងខេត្តយ៉ាងច្រើនកុះករ ក្នុងយុទ្ធនាការខាងលើ។ យុទ្ធនាការទាំងអស់របស់មន្ទីរបរិស្ថាននឹងបន្ត និងលើកទឹកចិត្តបន្ថែមទៀតដល់ការចូលរួមពីសាធារណជន ដើម្បីរៀបចំផ្ទះយើងស្អាត ក៏ដូចជាឱ្យខេត្តយើងស្អាត ត្រៀមចាំទទួលស្វាគមន៍ភ្ញៀវទេសចរ អ្នកវិនិយោគ និងជាពិសេសផ្តល់ផាសុកភាពដល់ប្រជាពលរដ្ឋគ្រប់រូប នៅក្នុងខេត្តកំពង់ស្ពឺយើង៕

ដោយ លឹម សាន្ត