AKP កំពង់ធំ ថ្ងៃទី០៦ ខែមិថុនា ឆ្នាំ២០២៥--

លោក សាយ គឹមឡម អភិបាលស្រុកស្ទោង បានលើកទឹកចិត្តដល់កីឡាករ និងអត្តពលលិកត្រូវខិតខំប្រកួតឱ្យអស់ពីសមត្ថភាពដើម្បីទទួលជ័យជំនះគ្រប់វិញ្ញាសា ក្នុងឱកាសអញ្ជើញជួបសំណេះសំណាលលើកទឹកចិត្តកីឡាករ កីឡាការិនី និងអត្តពលិកដែលត្រៀមខ្លួនសម្រាប់ចេញដំណើរទៅប្រកួតកីឡាសិស្សមធ្យមសិក្សាថ្នាក់ជាតិឆ្នាំ២០២៥នៅរាជធានីភ្នំពេញ កាលពីរសៀលថ្ងៃទី០៥ ខែមិថុនា ឆ្នាំ២០២៥ នៅអគាររដ្ឋបាលស្រុកស្ទោង។

ជាមួយគ្នានេះដែរ លោកអភិបាលស្រុកស្ទោងបានលើកទឹកចិត្តថែមដល់កីឡាករ កីឡាការិនី និងអត្តពលិកទាំងអស់ត្រូវខិតខំរក្សានូវសាមគ្គីភាពឯកភាពផ្ទៃក្នុងការរួបរួមសាមគ្គីព្រួតដៃគ្នាជាធ្លុងមួយ ស្មារតីក្រុម និងសហការគ្នាខ្ពស់ ដែលជាកត្តាចម្បងបំផុតដែលនាំយើងទទួលបានជ័យជម្នះហើយត្រូវខិតខំថែរក្សាសុខភាពឱ្យបានល្អជាប្រចាំនិងស្ដាប់ដំបូន្មានគ្រូបង្វឹកឱ្យបានខ្ជាប់ខ្ជួនផងដែរ។

ទន្ទឹមនឹងនេះ លោក សុត វិច្ឆិកា នាយកវិទ្យាល័យរស្មីសោភ័ណ តំណាងគ្រូបង្វឹក កីឡាករ កីឡាការិនីនិងអត្តពលិកទាំងអស់បានប្ដេជ្ញាចិត្តខ្ពស់ក្នុងការចូលរួមប្រកួតដើម្បីដណ្ដើមយកជ័យជំនះ ជូនសាលាក៏ដូចជារដ្ឋបាលស្រុកស្ទោងនិងខេត្តកំពង់ធំផងដែរ។

សូមបញ្ជាក់ថា ស្រុកស្ទោងនឹងបញ្ជូនកីឡាករ កីឡាការិនី និងអត្តពលិកលើវិញ្ញាសា៣ ក្នុងនោះ កីឡាបាល់ទះបុរស លោតចម្ងាយបុរសស្ត្រី និងដើរចម្ងាយដែលកាលបរិច្ឆេទនៃការប្រកួតចាប់ផ្ដើមពីថ្ងៃទី០៦ រហូតដល់ថ្ងៃទី១៦ ខែមិថុនា ឆ្នាំ២០២៥។ ក្នុងឱកាសនោះ លោក សាយ គឹមឡម អភិបាលស្រុកស្ទោង បានឧបត្ថម្ភដល់កីឡាករ កីឡាការិនី និងអត្តពលលិកទាំងអស់នួន១៨នាក់ដែលម្នាក់ៗទទួលបានថវិកាចំនួន៤ម៉ឺនរៀល និងលោកនាយកគ្រូបង្វឹក៤នាក់ដែលម្នាក់នូវថវិកា៥ម៉ឺនរៀលផងដែរ៕

ដោយ ស៊ុម វណ្ណា