AKP បន្ទាយមានជ័យ ថ្ងៃទី០១ ខែមិថុនា ឆ្នាំ២០២៥ – ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកព្រះនេត្រព្រះ ខេត្តបន្ទាយមានជ័យនៅថ្ងៃទី១ ខែមិថុនា ឆ្នាំ២០២៥នេះ បានដឹកនាំក្រុមការងារ និងសប្បុរសជននាំយកអំណោយជាគ្រឿងឧបភោគ-បរិភោគ រួមជាមួយនឹងថវិកាមួយចំនួន ទៅឧបត្ថម្ភដល់កងកម្លាំងដែលកំពុងប្រចាំការអនុវត្តការងារបែងចែក និងចូលកាន់កាប់ទីតាំងដីដែលប្រជាពលរដ្ឋទទួលបានពីរាជរដ្ឋាភិបាល។ 

ពិធីនេះបានធ្វើឡើងនៅមូលដ្ឋានឃុំប្រាសាទ និងឃុំភ្នំលៀប ស្រុកព្រះនេត្រព្រះ។ ក្នុងឱកាសនោះ ឯកឧត្តម គង់ ច័ន្ទវាសនា បានថ្លែងអំណរគុណ និងកោតសរសើរដល់កិច្ចខិតខំប្រឹងប្រែងរបស់កងកម្លាំង និងរដ្ឋបាលស្រុកទាំងអស់ ដែលបានលះបង់កម្លាំងកាយចិត្តក្នុងការអនុវត្តភារកិច្ចដ៏សំខាន់នេះ។ ឯកឧត្តមបានសង្កត់ធ្ងន់ថា  "បងប្អូនកងកម្លាំងទាំងអស់ ពិតជាបានរួមចំណែកយ៉ាងសំខាន់ ក្នុងការជួយសម្របសម្រួល និងធានាបាននូវដំណើរការបែងចែកដីធ្លីជូនប្រជាពលរដ្ឋ ប្រកបដោយតម្លាភាព និងយុត្តិធម៌។ ការងារនេះមិនត្រឹមតែជាការអនុវត្តតាមគោលនយោបាយរបស់រាជរដ្ឋាភិបាលប៉ុណ្ណោះទេ ប៉ុន្តែវាក៏ជាការរួមចំណែកផ្ទាល់ ក្នុងការលើកកម្ពស់ជីវភាព និងដោះស្រាយទុក្ខលំបាករបស់បងប្អូនប្រជាពលរដ្ឋផងដែរ"។

ជាមួយនោះឯកឧត្តមសូមលើកទឹកចិត្តដល់រដ្ឋបាលស្រុក និងកងកម្លាំងទាំងអស់ សូមបន្តអនុវត្តការងារដ៏សំខាន់នេះ ឱ្យបានជោគជ័យ និងមានប្រសិទ្ធភាពខ្ពស់។ យើងទាំងអស់គ្នាត្រូវតែសាមគ្គីគ្នា និងធ្វើការដោយយកចិត្តទុកដាក់ខ្ពស់ ដើម្បីធានាថា ប្រជាពលរដ្ឋគ្រប់រូបដែលទទួលបានដីធ្លីពីរាជរដ្ឋាភិបាល អាចចូលទៅកាន់កាប់ និងប្រើប្រាស់ដីនោះបានដោយរលូន និងស្របច្បាប់។ ការសម្រេចបាននូវគោលដៅនេះ គឺពិតជាមានប្រយោជន៍ដល់ប្រជាពលរដ្ឋ និងជាការអនុវត្តវិធានការដែលរដ្ឋាភិបាលបានដាក់ចេញនាពេលកន្លងមក ប្រកបដោយស្មារតីទទួលខុសត្រូវខ្ពស់៕

ដោយ៖ ឈុន សារ៉ាត