AKP ព្រះសីហនុ ថ្ងៃទី០១ ខែមិថុនា ឆ្នាំ២០២៥ – សាខាកាកបាទក្រហមកម្ពុជា ខេត្តព្រះសីហនុ កាលពីថ្ងៃសៅរទី៣១ ខែឧសភា ឆ្នាំ២០២៥ បានបង្រៀនវិជ្ជាសង្គ្រោះបឋមជូនដល់ថ្នាក់ដឹកនាំ មន្ត្រីពន្ធនាគារខេត្តព្រះសីហនុ ចំនួន ២វគ្គ មានរយៈពេល ២ថ្ងៃ គឺថ្ងៃទី៣០-៣១ ខែឧសភា ឆ្នាំ២០២៥ នៅសាលប្រជុំពន្ធនាគារខេត្តព្រះសីហនុ  ដែលមានមន្ត្រី និងបុគ្គលិកពន្ធនាគារចូលរួមសរុបចំនួន ៤៥នាក់ ស្រី ១៩នាក់។

លោក គាំ សុខុម នាយកសាខាកាកបាទក្រហមកម្ពុជា ខេត្តព្រះសីហនុ បានបញ្ជាក់ថា ការបង្រៀនវិជ្ជាសង្គ្រោះបឋមនាពេលនេះ ក្នុងគោលបំណងបណ្តុះបណ្តាលដល់មន្ត្រី និងបុគ្គលិកពន្ធនាគារខេត្តព្រះសីហនុ ចេះប្រើប្រាស់ម៉ាស៊ីនវាយតម្លៃដំណើរការចង្វាក់បេះដូងឡើងវិញ (AED) Automated external defibrillator និងវិជ្ជាសង្គ្រោះបឋមមួយចំនួនថ្មីៗបន្ថែមទៀតឱ្យកាន់តែមានប្រសិទ្ធភាពក្នុងការជួយដល់មន្ត្រី បុគ្គលិកបម្រើការងារក្នុងអង្គភាព និងអ្នកជាប់ឃុំ ពេលមានបញ្ហាគ្រោះថ្នាក់ដោយចៃដន្យក្នុងប្រការណាមួយទាំងក្នុងកន្លែងបំពេញការងារ ព្រមទាំងសហគមន៍មូលដ្ឋានផងដែរ។

ដោយឡែក លោកឧត្តមអគ្គានុរក្សលេខ២ មុី ឌឿន បានមានប្រសាសន៍ថ្លែងអំណអគុណដល់សាខាកាកបាទក្រហមកម្ពុជា ខេត្តព្រះសីហនុ ដែលបានជួយបណ្តុះបណ្តាលវិជ្ជាសង្គ្រោះបឋមជូនដល់មន្ត្រីពន្ធនាគារខេត្តព្រះសីហនុ នាពេលនេះដោយមិនគិតថ្លៃ ព្រមទាំងបានធ្វើការផ្តាំផ្ញើដល់មន្រ្តី និងបុគ្គលិកដែលបានចូលរួមរៀនវគ្គបណ្តុះបណ្តាលវិជ្ជាសង្រ្គោះបឋមនាពេលនេះ ត្រូវយកចិត្តទុកដាក់ក្រេបយកនូវចំណេះវិជ្ជាមួយនេះ ព្រោះវិជ្ជានេះវាមានសារៈសំខាន់ណាស់នៅពេលយើងជួបនូវបញ្ហា យើងអាចជួយខ្លួនឯងបាន និងជួយដល់ក្រុមគ្រួសារ ឬមនុស្សជុំវិញខ្លួនយើង ជាពិសេសអ្នករួមការងារជាមួយយើងជាដើម។  

ឆ្លៀតក្នុងឱកាសនោះលោក គាំ សុខុម នាយកសាខា ក៏បានផ្សព្វផ្សាយ ស្ដីពីប្រវត្តិចលនាកាកបាទក្រហម អឌ្ឍចន្ទក្រហម ច្បាប់មនុស្សធម៌អន្តរជាតិ គោលការណ៍គ្រឹះទាំង៧ បដិរូប និងសុខភាពជូនដល់សិក្ខាកាម ដើម្បីឱ្យកាន់តែមានការយល់ដឹងកាន់តែច្បាស់អំពីសកម្មភាពរបស់កាកបាទក្រហមកម្ពុជា និងការថែទាំសុខភាពប្រចាំថ្ងៃ។

ចំពោះមេរៀនដែលបានលើកយកមកបង្រៀនមានដូចជា៖
១.ការយល់ដឹងពីកាកបាទក្រហម •ប្រវត្តិគំនិត •សមាសភាគរបស់ចលនា •បដិរូប និងសញ្ញាសំគាល់ •គោលការណ៍គ្រឹះរបស់ចលនា •ប្រវត្តិ និងសកម្មភាពរបស់កាកបាទក្រហមកម្ពុជា ។
២.វិជ្ជាសង្គ្រោះបឋម •តួនាទីអ្នកសង្រ្គោះ គោលការណ៍គ្រឹះ •សភាពស្ហុក •សន្លប់បាត់ស្មារតី ការដាក់ដំណេកសុវត្ថិភាព •សន្លប់បាត់ដង្ហើម ការធ្វើCPR •ស្លាក់ •របួសស្រាល ធ្ងន់ •ការហូរឈាម •បាក់ឆ្អឹង និងការដឹកជញ្ជូនជនរងគ្រោះទៅកាន់មន្ទីរពេទ្យជាដើម ៕ 

ដោយ៖ ងូ សុមុនី