AKP ព្រះសីហនុ ថ្ងៃទី០១ ខែមិថុនា ឆ្នាំ២០២៥ – លោកជំទាវ គីម សុភ័ក្ត្រ ម៉ាង ស៊ីណេត ប្រធានកិតិ្តយសសមាគមនារីកម្ពុជា ដើម្បីសន្តិភាព និងការអភិវឌ្ឍសាខាខេត្តព្រះសីហនុ  នាព្រឹកថ្ងៃអាទិត្យទី១ ខែមិថុនា ឆ្នាំ២០២៥ បានអញ្ជើញសំណេះសំណាល និងនាំយកសម្ភារសិក្សាចែកជូនសិស្សានុសិស្សសាលាបឋមសិក្សា ជា ស៊ីម ក្នុងឱកាសខួបលើកទី៧៦ ទិវាកុមារអន្តរជាតិ ១មិថុនា ឆ្នាំ២០២៥ ដោយមានការចូលរួមពីលោកជំទាវសមាជិកក្រុមប្រឹក្សាខេត្ត លោកស្រីអភិបាលរងខេត្ត លោកជំទាវ លោកស្រី និងសមាជិកា នៃគណៈកម្មការសាខាសមាគមនារីកម្ពុជា ដើម្បីសន្តិភាពនិងការអភិវឌ្ឍខេត្តព្រះសីហនុ លោកគ្រូ អ្នកគ្រូ និងសិស្សានុសិស្ស។

លោកជំទាវ គីម សុភ័ក្ត្រ ម៉ាង ស៊ីណេត ប្រធានកិតិ្តយសសមាគមនារីកម្ពុជា ដើម្បីសន្តិភាព និងការអភិវឌ្ឍសាខាខេត្តព្រះសីហនុ មានប្រសាសន៍ថា ដើម្បីអបអរសាទរទិវារកុមារអន្តរជាតិខួបលើកទី៧៦ ខ្ញុំសូមពាំនាំប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹត្តបណ្ឌិត ប៊ុន រ៉ានី ហ៊ុន សែន ក៏ដូចជា ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ ដែលជានិច្ចកាលលោកតែងយកចិត្តទុកដាក់ចំពោះសុខទុក្ខ និងគិតគូរចំពោះក្មួយៗសិស្សានុសិស្សដែលកំពុងតែសិក្សាក្រេបយកនូវចំណេះវិជ្ជា ជាពិសេសលោកគ្រូ អ្នកគ្រូ ដែលបានលះបង់ទាំងកម្លាំងកាយចិត្តក្នុងការបង្ហាត់បង្រៀនដល់ក្មួយៗសិស្សានុសិស្សក្នុងនាមជាឪពុកម្តាយទី២ ។

លោកជំទាវ គីម សុភ័ក្ត្រ បានលើកពីប្រវត្តិខ្លះៗនៃទិវាកុមារអន្តរជាតិ ០១មិថុនា ចាប់តាំងពីឆ្នាំ១៩៥០ ប្រទេសជាច្រើននៅលើសកលលោករួមទាំងប្រទេសកម្ពុជាផងដែរ បានប្រារព្ធទិវាកុមារអន្តរជាតិថ្ងៃទី ០១មិថុនា ក្នុងគោលបំណងសំខាន់ នៃការប្រារព្ធទិវានេះ ដើម្បីក្រើនរំលឹក និងបង្កើនការយកចិត្តទុកដាក់ពិសេសចំពោះកុមារ ទាំងក្នុងជីវភាពរស់ នៅ និងផ្នែកច្បាប់។ ឆ្នាំ១៩៤២ មនុស្សជាតិនៅលើសកលលោកចងចាំឥតភ្លេចនូវឧក្រិដ្ឋកម្មដ៏ព្រៃផ្សៃយង់ឃ្នងរបស់ពួកហ្វាស៊ីស ដែលបានសម្លាប់ប្រជាជន ១ភូមិ (លីឌីស៊ែ) នៃសាធារណរដ្ឋឆែក ឧក្រិដ្ឋកម្មនេះបានចាប់មនុស្សរួមទាំងកុមារតូចៗ ចាក់សាំងដុតកម្ទេចទាំងរស់ដោយគ្មានអាណិតអាសូរ។ ដោយមើលឃើញនូវវិនាសកម្មទាំងនេះ ទើបធ្វើឱ្យកងកម្លាំងស្នេហាសន្តិភាព និងមិត្តភាពរវាងប្រជាជាតិ និងមនុស្សគ្រប់ពណ៌សម្បុររួបរួមគ្នាក្រោកឈរឡើង ហើយធ្វើការអំពាវនាវ ដើម្បីប្រឆាំងរាល់ទង្វើដែលនាំឱ្យមានអន្តរាយដល់អាយុជីវិតមនុស្សជាតិ លើសពីនេះទៀត ដើម្បីការពារជីវិត ការពារសន្តិសុខ និងគាំពារដល់កុមារនៅលើសកលលោកទាំងមូល។

ក្រោយសង្គ្រាមលោកលើកទី២ បានបញ្ចប់សហព័ន្ធនារីប្រជាធិបតេយ្យពិភពលោក បានបើកសម័យប្រជុំនៅទីក្រុងមូស្គូ ហើយបានមូលមតិគ្នាសម្រេចយកថ្ងៃ០១មិថុនា ជារៀងរាល់ឆ្នាំ ដើម្បីប្រារព្ធ «ទិវាកុមារអន្តរជាតិ» ។ អនុសញ្ញាស្តីពី សិទ្ធិកុមារទទួលបានការអនុម័តដោយមហាសន្និបាតអង្គការសហប្រជាជាតិនាឆ្នាំ១៩៨៩ ហើយបានចូលជាធរមាននៅឆ្នាំ១៩៩០។  រីឯប្រទេសកម្ពុជាក៏បានចុះហត្ថលេខាចូលជាភាគីសមាជិក នៃអនុសញ្ញា ស្តីពីសិទ្ធិកុមារនៅឆ្នាំ១៩៩២។ ដូចនេះពីមួយឆ្នាំទៅមួយឆ្នាំ «ទិវាកុមារអន្តរជាតិ» ១មិថុនា ទទួលបានការគាំទ្រយ៉ាងទូលំទូលាយ ពីបណ្តាប្រទេសជាច្រើននៅលើសកលលោក។ ចំពោះអត្ថន័យ នៃថ្ងៃទិវាសិទ្ធិកុមារអន្តរ ជាតិ ០១មិថុនា មានដូចតទៅ៖
១.បង្កើនការយកចិត្តទុកដាក់ខ្ពស់លើកុមារ
២.កុមារត្រូវការសិទ្ធិជាងករណីយកិច្ច
៣.កិច្ចគាំពារការគោរពសិទ្ធិកុមារ
៤.ទទួលស្គាល់សិទ្ធិជាសកល និងមូលដ្ឋានរបស់កុមារ
៥.គោរព និងគាំពារនៃអនុសញ្ញាជាតិ និងអនុសញ្ញាអន្តរជាតិជាសកល ស្តីពីសិទ្ធកុមារ
៦.លុបបំបាត់ការរើសអើងចំពោះកុមារពិការ, កុមារក្រីក្រ និងសិទ្ធិជាសមភាព
៧.បញ្ឈប់និងប្រឆាំងដាច់ខាតលើការរំលោភបំពាន ការជួញដូរកេងប្រវញ្ចការប្រើអំពើហិង្សាគ្រប់រូបភាពលើកុមារ
៨.ធានា និងការពារកុមារជៀសឱ្យផុតពីគ្រឿងញៀនគ្រប់ប្រភេទ
៩.កុមារជាទំពាំងស្នងឫស្សី ជាសសរទ្រូង និងជាធនធានមនុស្សនាថ្ងៃអនាគតរបស់ជាតិមាតុភូមិ
១០.កុមារ គឺជាកោសិការបស់ជាតិ កុមារល្អ យុវជនល្អ សង្គមជាតិល្អ ។

ក្នុងឱកាសនោះ លោកជំទាវ គឹម សុភ័ក្រ ម៉ាង ស៊ីណេត ក៏បាននាំយកអំណោយ ជាសម្ភារ និងថវិការបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ចែកជូនក្មួយៗសិស្សានុសិស្សចំនួន ៧០០នាក់ ក្នុងម្នាក់ទទួលបាន កាបូបស្ពាយ១ ខ្មៅដៃ១ដើម ប៊ិច១ដើម សៀវភៅ១ក្បាល ជ័រលុប១ ប្រដាប់ខួង១ ថវិកា ៥ ០០០រៀល ដោយឡែកលោកគ្រូ អ្នកគ្រូចំនួន ៣២នាក់ ក្នុងម្នាក់ទទួលថវិកា ៤០ ០០០រៀល ។

ដោយ៖ ងូ សុមុនី