AKP ក្រចេះ ថ្ងៃទី០១ ខែមិថុនា ឆ្នាំ២០២៥ -- ឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងារ រាជរដ្ឋាភិបាលចុះមូលដ្ឋាន​ខេត្ត​ក្រចេះ និងលោកជំទាវ ទុយ សិរីរតនៈ នេត្រភក្ត្រា ប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍​សាខាក្រសួងព័ត៌មាន រួមជាមួយសប្បុរសជន នៅថ្ងៃទី០១ ខែមិថុនា ឆ្នាំ២០២៥នេះ បានអញ្ជើញចែក​កាបូប សម្ភារសិក្សា នំ គ្រឿងឧបភោគ បរិភោគ និងអាវកីឡា ជូនដល់សិស្សានុសិស្សជិត ១ពាន់នាក់ នៅសាលាបឋមសិក្សាព្រះគ្រូគឹមឯម ស្ថិតនៅឃុំព្រែកប្រសព្វ ស្រុកព្រែកប្រសព្វ និងសាលាបឋមសិក្សា​ដំរីផុង ស្ថិតនៅឃុំដំរីផុង ស្រុកព្រែកប្រសព្វ​ ខេត្តក្រចេះ ក្នុងនោះសាលាបឋមសិក្សាព្រះគ្រូ គឹម ឯម ជិត៥០០នាក់ និងសាលាបឋមសិក្សាដំរីផុង ជិត៤០០នាក់។ 

ពិធីនេះ ក៏មានការអញ្ជើញចូលរួមពីសំណាក់ឯកឧត្តម វ៉ា ថន អភិបាល នៃគណៈអភិបាលខេត្តក្រចេះ ថ្នាក់​ដឹកនាំក្រសួងព័ត៌មាន និងលោក Kevin Luo នាយកប្រតិបត្តិ និងជាស្ថាបនិកអង្គការមនុស្សសធម៌ វ័នរ៉ូដ សមាគមធុរកិច្ចចិននៅក្រៅប្រទេសកម្ពុជា ហ៊ូណាន ព្រមទាំងអាជ្ញាធរ លោកគ្រូ អ្នកគ្រូ អាណា​ព្យាបាលជាច្រើនរូបទៀត។

ការនាំយកកាបូប និងសម្ភារសិក្សាមកចែកជូនដល់សិស្សានុសិស្សនាពេលនេះ ធ្វើឡើងដើម្បីអបអរសាទ​ខួបលើកទី៧៦ ទិវាកុមារអន្តរជាតិ ១មិថុនា ក្រោមប្រធានបទ «បញ្ឈប់អំពើហិង្សាលើកុមារគ្រប់ទម្រង់ គឺជាការអភិវឌ្ឍធនធានមនុស្សប្រកបដោយចីរភាព» និងខួបលើកទី២៤ ទិវាពិភពលោកប្រឆាំងពល​កម្ម​កុមារ ១២មិថុនា ក្រោមប្រធានបទ «លើកកម្ពស់ការងារ សមរម្យសម្រាប់កម្មករនិយោជិតវ័យក្មេងនៅ​គ្រប់​ខ្សែច្រវាក់ផលិតកម្ម ដើម្បីធានាកំណើនប្រកបដោយចីរភាព និងភាពធន់»។ ទន្ទឹមនេះ ដើម្បីរម្លឹក​ដល់ការអនុវត្តសិទ្ធិជាមូលដ្ឋានរបស់កុមារ និងបង្ហាញអំពីការយកចិត្តទុកដាក់របស់រាជរដ្ឋាភិបាលចំពោះ​កុមារ​ស្រប​តាមរដ្ឋធម្មនុញ្ញនៃព្រះរាជាណាចក្រកម្ពុជា អនុសញ្ញាស្តីពីសិទ្ធិកុមាររបស់អង្គការសហ​ប្រជា​ជាតិ អនុសញ្ញារបស់អង្គការសហប្រជាជាតិ ស្តីពីការហាមប្រាម និងសកម្មភាពបន្ទាន់សម្រាប់ការលុប​បំបាត់ទម្រង់ធ្ងន់ធ្ងរបំផុតនៃពលកម្មកុមារ និងលិខិតបទដ្ឋានគតិយុត្តជាតិ និងលិខិតូបករណ៍អន្តរជាតិ​ពាក់​ព័ន្ធនឹងសិទ្ធិកុមារផ្សេងៗទៀត។

ក្នុងឱកាសនោះ ឯកឧត្តម នេត្រ ភក្ត្រា បានមានប្រសាសន៍ថា អំណោយទាំងនេះ ទទួលបាន​ការគាំទ្រពីអង្គការមនុស្សសធម៌ វ័នរ៉ូដ និងសមាគមធុរកិច្ចចិននៅក្រៅប្រទេសកម្ពុជា ហ៊ូណាន ដែល​បានចូលរួមចំណែកចែករំលែកក្តីស្រឡាញ់ជាមួយក្រសួងព័ត៌មាន និងក្រុមការងាររាជរដ្ឋាភិបាលចុះមូល​ដ្ឋានខេត្តក្រចេះ សម្រាប់នាំយកកាបូប ព្រមទាំងសសម្ភារសិក្សាមកចែកជូនដល់សិស្សានុសិស្សនៅ​សាលា​បឋមសិក្សាព្រះគឹមឯម នៅស្រុកព្រែកប្រសព្វ និងសាលាបឋមសិក្សាដំរីផុង នៅស្រុកព្រែកប្រសព្វ​ ខេត្ត​ក្រចេះ។ ឯកឧត្តមរដ្ឋមន្ត្រីបានថ្លែងថា រាជរដ្ឋាភិបាលកម្ពុជានៅអាណត្តិទី៧ ក្រោមការដឹកនាំ​ប្រកបដោយ​ភាពឈ្លាសវៃ និងបុរេសកម្មរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បន្តយកចិត្ត​ទុក​ដាក់ជាអាទិភាព តាមរយៈការដាក់ចេញកម្មវិធីនយោបាយនានា សំដៅគាំពារ អភិវឌ្ឍ និងលើកកម្ពស់​សុខុមាលភាពកុមារ ចាំតាំងពីបឋមវ័យ រហូតដល់យុវវ័យ។ កុមារតំណាងឱ្យធនធានសក្តានុពល​របស់​ប្រទេសជាតិ ដែលនឹងត្រូវបន្តវេននាពេលអនាគត។ ឯកឧត្តមដ្ឋមន្រ្ដីបានបន្ដថា រាជរដ្ឋាភិបាល​នីតិកាលទី៧ ក៏បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដោយយកកត្តាមនុស្ស ជាអាទិភាពគន្លឹះទី១ និងបានដាក់ចេញវិធានការគន្លឹះនានា សម្រាបវិស័យអប់រំ យុវជន និងកីឡា ក្នុងគោលដៅពង្រឹងគុណភាពគ្រឹះស្ថានសិក្សារដ្ឋចាប់ពីថ្នាក់មត្តេយ្យសិក្សាដល់មធ្យមសិក្សា។

ជាមួយគ្នានេះដែរ ឯកឧត្តម នេត្រ ភក្ត្រា ក៏បានអំពាវនាវឱ្យបញ្ឈប់ការប្រើប្រាស់អំពើហិង្សាលើ​កុមារនៅ​គ្រប់ទម្រង់ ជំរុញលើកទឹកចិត្តដល់ឪពុក ម្តាយពអាណាព្យាបាល ត្រូវប្រឹងប្រែងជំរុញកូនចៅរបស់​ខ្លួន​ឱ្យបន្តសិក្សារៀនសូត្ររហូតបញ្ចប់ថ្នាក់មកហាវិទ្យាល័យ ដើម្បីចូលរួមពង្រឹងធនធានមនុស្សប្រកបដោយ​និរន្តរ​ភាព។ ឯកឧត្ដមរដ្ឋមន្រ្ដីបានបញ្ជាក់ថា៖ «ដូច្នេះយើងទាំងអស់ត្រូវចូលរួមផ្តល់ក្តីស្រឡាញ់ ភាព​សប្បាយរីករាយ និងក្តីសង្ឃឹមសម្រាប់កុមារទាំងអស់ដើម្បីពួកគេក្លាយខ្លួនជាពលរដ្ឋល្អសម្រាប់​សង្គមជាតិ។ កុមារកម្ពុជាទទួលបានភាពសុខសាន្ត និងការបីបាច់ថែក្សា ដោយក្តីអាណិតស្រឡាញ់​គ្រប់ៗគ្នា»។

ឯកឧត្តមរដ្ឋមន្ដ្រីក្រសួងព័ត៌មាន ក៏បានអំពាវនាវទៅដល់គ្រប់អង្គភាព ស្ថាប័ន អង្គការនានា សប្បុរសជន អាជ្ញាធរគ្រប់លំដាប់ថ្នាក់ មាតាបិតា អាណាព្យាបាល ព្រមទាំងអ្នកពាក់ព័ន្ធទាំងអស់ ចូលរួមជាមួយរាជ​រដ្ឋាភិបាលក្នុងការធ្វើឱ្យសម្រេចបាននូវចក្ខុវិស័យកម្ពុជា ឱ្យក្លាយទៅជាប្រទេសមានចំណូលកម្រិ​តខ្ពស់​នៅឆ្នាំ២០៥០។

លោក Kevin Luo នាយកប្រតិបត្តិ និងជាស្ថាបនិកអង្គការមនុស្សសធម៌ វ័នរ៉ូដ បានឱ្យដឹងថា ក្នុងរយៈពេល ៣ឆ្នាំកន្លងមកនេះ អង្គការ វ័នរ៉ូដ តែងតែប្រកាន់ភ្ជាប់នូងគោលការណ៍​មួយគឺធ្វើអំពើល្អ​ជារៀងរាល់ខែ ដោយអនុវត្តន៍សកម្មភាពសប្បុរសធម៌មួយនេះ គ្រប់បណ្តាខេត្ត នៅក្នុងប្រទេសកម្ពុជា។ លោកបានឱ្យដឹងទៀតថា មកដល់ពេលនេះ អង្គការ វ័នរ៉ូដ បានឧបត្ថម្ភកាតាបសិក្សាចំនួនជាង ១៥ ០០០ កាតាប, តុប៉េងប៉ុងចំនួន៨២, តារាងបាល់ទាត់ចំនួន៤៥ និងបាល់ទាត់ បាល់ទះជាច្រើនប្រភេទ​ទៀត។ 

តំណាងសហព័ន្ធសហគ្រិនចិននៅបរទេសខេត្តហ៊ូណានបានឱ្យដឹងដែរថា នេះមិនមែនជាលើកទីមួយទេ ដែលសហព័ន្ធសហគ្រិនចិននៅបរទេសខេត្តហ៊ូណាន ធ្វើនូវសកម្មភាពបរិច្ចាគសប្បុរសធម៌ ដោយកន្លង​មកបានប្រកាន់ខ្ជាប់នូវគោលគំនិតនៃការផ្តល់អំណោយជួយដល់សង្គម ការយកចិត្តទុកដាក់ចំពោះក្រុម​ងាយរងគ្រោះ ប្រកបដោយទំនួលខុសត្រូវខ្ពស់ដល់សង្គមយ៉ាងសកម្ម។ លោកតំណាងសហព័ន្ធក៏បាន​បន្ដថា ប៉ុន្មានថ្ងៃកន្លងមកនេះក៏បាន​ជួយដល់មណ្ឌលកុមារកំព្រា សាលារៀន និងក្រុមងាយរងគ្រោះ​នៅទូ​ទាំងប្រទេសកម្ពុជាជាច្រើន ដោយ​បានបរិច្ចាគនូវសម្ភារៈប្រើប្រាស់ប្រចាំថ្ងៃ សម្ភារៈសិក្សា និងបរិក្ខារពេទ្យ​យ៉ាងច្រើន។

លើសពីនេះទៀត នៅពេលអនាគត សមាគមធុរកិច្ចចិនហ៊ូណានក្រៅប្រទេសកម្ពុជា នឹងបន្តយកចិត្ត​ទុកដាក់ និងគាំទ្រដល់វិស័យអប់រំនៅកម្ពុជា និងការអភិវឌ្ឍក្រុមងាយរងគ្រោះ បន្តអនុវត្តសកម្មភាព​សុខុមាល​ភាពសាធារណៈផ្សេងៗ ដោយភាពកក់ក្តៅ ក្តីស្រឡាញ់ និងសកម្មភាពនានា​ដោយមិន​នឿយ​ហត់ ដើម្បីកសាងសង្គមមួយឱ្យកាន់តែប្រសើរឡើង។ លោកសង្ឃឹមថា សកម្មភាពនេះនឹងជាការបង្ហាញ​កាន់តែរីក​ផ្កានៃសេចក្តីស្រឡាញ់នៅក្នុងជ្រុងកាន់តែច្រើន និងធ្វើឱ្យពិភពលោកកាន់តែកក់ក្តៅ និង​ស្រស់ស្អាត៕

ដោយ៖ រិទ្ធី រូបថត៖ ខឹម សុវណ្ណារ៉ា