AKP ហុងកុង ថ្ងៃទី៣០ ខែឧសភា ឆ្នាំ២០២៥ -- ប្រទេសចំនួន៣២ បានចុះហត្ថលេខាលើអនុសញ្ញាស្តីពីការបង្កើតអង្គការអន្តរជាតិសម្រាប់ការសម្រុះសម្រួល (IOMed) ដែលបាននិងកំពុងប្រព្រឹត្តទៅនៅតំបន់រដ្ឋបាលពិសេសហុងកុងនៃប្រទេសចិននៅព្រឹកថ្ងៃទី៣០ ខែឧសភា ឆ្នាំ២០២៥ ក្នុងគោលដៅរួម គឺដើម្បីលើកកម្ណស់នូវដំណោះស្រាយជម្លោះដោយសន្តិភាព និងបង្កើនមិត្តភាព និងកិច្ចសហប្រតិបត្តិការរវាងប្រទេសនានាក្នុងពិភពលោក។ នេះបើយោងតាមការថ្លែងសុន្ទរកថារបស់លោក វ៉ាង យី (Wabg Yi) សមាជិកការិយាល័យនយោបាយនៃគណៈកម្មាធិការមជ្ឈិមបក្សចិន CPC និងជារដ្ឋមន្ត្រីការបរទេសចិន ដែលបានអញ្ជើញចូលរួមជាគណអធិបតីក្នុងពិធីចុះហត្ថលេខានាពេលនោះ។

លោកបានថ្លែងថា ឆ្នាំនេះគឺជាខួបលើកទី៨០ នៃជ័យជំនះនៃសង្គ្រាមប្រឆាំងហ្វាស៊ីសពិភពលោក និងជាខួបលើកទី៨០ នៃការបង្កើតអង្គការសហប្រជាជាតិ ដោយនៅក្នុងធម្មនុញ្ញអង្គការសហប្រជាជាតិ បានចែងអំពីគោលបំណងច្បាស់លាស់ដែលប្រទេសទាំងអស់ចង់រស់នៅជាមួយគ្នាដោយសន្តិភាព និងរក្សាបានសន្តិភាព និងសន្តិសុខអន្តរជាតិ។ បច្ចុប្បន្ន ដោយប្រឈមមុខនឹងការផ្លាស់ប្តូរជាសកលដែលត្រូវបានមិនឃើញក្នុងមួយសតវត្សកន្លងមកនេះ ប្រធានាធិបតីចិន លោក ស៊ី ជីនពីង ( Xi Jinping) បានចង្អុលបង្ហាញថា ការខ្វែងគំនិតគ្នារវាងប្រទេសនានាគឺជារឿងធម្មតា ហើយគួរតែត្រូវបានដោះស្រាយយ៉ាងត្រឹមត្រូវតាមរយៈកិច្ចសន្ទនា និងកិច្ចពិគ្រោះយោបល់។ ប្រទេសចិនបានតស៊ូមតិទៅលើការដោះស្រាយការខ្វែងគំនិតគ្នាក្នុងស្មារតីនៃការយោគយល់គ្នា និងការបង្កើតការឯកភាពគ្នាតាមរយៈកិច្ចសន្ទនា និងកិច្ចពិគ្រោះយោបល់ ការលើកកម្ពស់ការអភិវឌ្ឍតាមរយៈកិច្ចសហប្រតិបត្តិការឈ្នះ-ឈ្នះ និងការដោះស្រាយបញ្ហាជាមួយនឹងទស្សនវិស័យតម្រង់ទិសនាពេលអនាគត។

កាលពីបីឆ្នាំមុន ប្រទេសចិន និងបណ្តាប្រទេសដែលមានគំនិតដូចគ្នា បានរួមគ្នាផ្តួចផ្តើមបង្កើតអង្គការ IOMed ។ តាមរយៈការខិតខំប្រឹងប្រែងយ៉ាងខ្លាំងកន្លងមក ទីបំផុតយើងបានបញ្ចប់អនុសញ្ញា ហើយបានទទួលការគាំទ្រយ៉ាងទូលំទូលាយ និងការឆ្លើយតបជាវិជ្ជមានពីសហគមន៍អន្តរជាតិ ដែលជាជំហានមួយប្រកបដោយនវានុវត្តន៍នៅក្នុងនីតិរដ្ឋអន្តរជាតិ ហើយ IOMed មានសារសំខាន់នៅក្នុងប្រវត្តិសាស្រ្តនៃទំនាក់ទំនងអន្តរជាតិ៕

ដោយ៖ យា ចិន្តាខន្តី