AKP ភ្នំពេញ ថ្ងៃទី២៩ ខែឧសភា ឆ្នាំ២០២៥-- 

ដើម្បីធានាបានថា រដ្ឋបាលថ្នាក់ក្រោមជាតិ មានសិទ្ធិអំណាចក្នុងការគ្រប់គ្រង និងអភិវឌ្ឍន៏ធនធានមនុស្ស ឱ្យកាន់តែមានសមត្ថភាព គុណភាព សុជីវធម៏  មន្ដ្រីរដ្ឋបាលរាជធានីភ្នំពេញ ខ្លួនឯង ក៏ត្រូវតែពង្រឹង និងពង្រីកចំណេះដឹង ជាមុនសិន ដើម្បីបម្រើសេវាសាធារណៈជូនប្រជាពលរដ្ឋ ឱ្យមានប្រសិទ្ធភាព ប្រជាធិបតេយ្យ និងប្រកបដោយតម្លាភាព នេះបើតាមការបញ្ជាក់ឱ្យដឹងពី ឯកឧត្ដម កើត ឆែ អភិបាល រងរាជ ធានីភ្នំពេញ ក្នុងពិធីសិក្ខាសាលាផ្សព្វផ្សាយអនុក្រឹត្យ ស្តីពីគោលការណ៍ និងនីតិវិធីនៃការតែងតាំង ការផ្លាស់ប្តូរ និងការបញ្ចប់មុខតំណែងនាយក នៃគ្រឹះស្ថានមត្តេយ្យសិក្សាសាធារណៈ និងគ្រឹះស្ថានបឋមសិក្សាសាធារណៈនៅថ្ងៃទី២៩ ខែឧសភា ឆ្នាំ២០២៥ នៅរដ្ឋបាលរាជធានីភ្នំពេញ ។
 
ឯកឧត្តម កើត ឆែ  បានមានប្រសាសន៍លើកឡើងថាសិក្ខាសាលានេះ គឺក្នុងគោលបំណងផ្សព្វផ្សាយអំពីខ្លឹមសារ «អនុក្រឹត្យស្តីពីគោលការណ៍ និងនីតិវិធី នៃការតែងតាំង ការផ្លាស់ប្តូរ និងការបញ្ចប់មុខតំណែងនាយក នៃគ្រឹះស្ថានមត្តេយ្យសិក្សាសាធារណៈ និងគ្រឹះស្ថានបឋមសិក្សាសាធារណៈ» ដែលជាលិខិតបទដ្ឋានគតិយុត្តមួយថ្មី សម្រាប់គ្រប់គ្រងមុខតំណែង នាយក នៃគ្រឹះស្ថានមត្តេយសិក្សា និងបឋមសិក្សា ដែលស្ថិតក្រោមសមត្ថកិច្ចរបស់រដ្ឋបាលថ្នាក់ក្រោមជាតិ ហើយសិក្ខាសាលាផ្សព្វផ្សាយនាពេលនេះត្រូវបានរៀបចំឡើងជាលើកទី២ បន្ទាប់ពីសិក្ខាសាលាផ្សព្វផ្សាយលើក ទី១ កាលពីថ្ងៃទី៩ ខែឧសភា ឆ្នាំ២០២៥។

  ឯកឧត្ដមបានបន្តថា រាជរដ្ឋាភិបាលកម្ពុជា ក្នុងនីតិកាលទី៧ នៃរដ្ឋសភា ក្រោមការដឹកនាំប្រកបដោយថាមពល ភាព ឈ្លាសវៃ និងគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញនូវកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ ដោយបន្តផ្តោតលើ ការកែទម្រង់ ការពង្រឹងអភិបាលកិច្ច និងការធ្វើទំនើបកម្មស្ថាប័នរដ្ឋ ជាស្នូលនៃយុទ្ធសាស្ត្រ ព្រមទាំងបាន កំណត់ជាអាទិភាពគន្លឹះចំនួន ០៥ ក្នុងនោះ អាទិភាពគន្លឹះទី១ គឺ «ការពង្រឹងសមត្ថភាពរដ្ឋបាលសាធារណៈ»។  លើមូលដ្ឋាននៃការអនុវត្តវិធានការគន្លឹះនេះ ក្របខណ្ឌកំណែទម្រង់រដ្ឋបាលសាធារណៈបានបន្ត ពង្រឹងការគ្រប់គ្រងបុគ្គលិកជាមន្ត្រីរាជការស៊ីវិល នៅរដ្ឋបាលថ្នាក់ក្រោមជាតិ ស្របតាមការផ្ទេរមុខងារ ដោយ ផ្សារភ្ជាប់មកជាមួយនូវធនធាន (មនុស្ស និងហិរញ្ញវត្ថុ) កាន់តែច្រើនឡើងៗ ដើម្បីធានាបានថា រដ្ឋបាលថ្នាក់ក្រោមជាតិ មានសិទ្ធិអំណាចក្នុងការគ្រប់គ្រង និងអភិវឌ្ឍធនធានមនុស្ស ឱ្យកាន់តែមានសមត្ថភាព ដែលអាច ឆ្លើយតបទៅនឹងតម្រូវការ នៃការគ្រប់គ្រងរដ្ឋបាល និងការផ្តល់សេវាសាធារណៈជូនបងប្អូនប្រជាពលរដ្ឋ។ ដើម្បីទទួលបានចំណេះដឹង យកទៅអនុវត្តក្នុងការងារគ្រប់គ្រងបុគ្គលិក អប់រំខណ្ឌ ធានាបាននូវអត្ថប្រយោជន៍ លក្ខខណ្ឌការងារ និងការវិវត្តន៍អាជីពរបស់ខ្លួន។

      សូមបញ្ជាក់ថា៖ ក្រសួងមុខងារសាធារណៈ និងថ្នាក់ដឹកនាំក្រសួងគ្រប់លំដាប់ថ្នាក់ ដែលកន្លងមក តែងតែ បានណែនាំ តម្រង់ទិស និងផ្តល់ការគាំទ្រដល់រដ្ឋបាលរាជធានីភ្នំពេញ និងអង្គភាពក្រោមឱវាទ ពិសេស លើការបណ្តុះបណ្តាលជំនាញសមត្ថភាព ដើម្បីការលើកកម្ពស់ការយល់ដឹងអំពីលិខិតបទដ្ឋានគតិយុត្ត ពាក់ព័ន្ធនឹងការគ្រប់គ្រងបុគ្គលិកនៅថ្នាក់ក្រោមជាតិ ។
 សិក្ខាសាលានេះក៏មានការចូលរួមពីលោក មាស ពេជ្រ អគ្គនាយករង នៃអគ្គនាយកដ្ឋានគ្រប់គ្រងមុខងារសាធារណៈ នៃក្រសួងមុខងារសាធា រណៈជាគ្រូឧទ្ទេស ព្រមទាំងមាន ការចូលរួមពីមន្ត្រីរាជការរដ្ឋបាលរាជធានី,រដ្ឋបាលខណ្ឌទាំង១៤ និងមន្ទីរជំនាញពាក់ព័ន្ធចូលរួមផងដែរ ៕ ដោយ សួស សំរិត