AKP ភ្នំពេញ ថ្ងៃទី២៩ ខែឧសភា ឆ្នាំ២០២៥ -- សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជាមានប្រសាសន៍ថា កម្ពុជានៅតែទទូចចង់បានខ្សែព្រំដែនមួយជាមួយប្រទេសជិតខាងទាំងអស់ ជាខ្សែព្រំដែនសន្តិភាព មិត្តភាព សហប្រតិត្តិការ និងការអភិវឌ្ឍ ដែលនេះជាបំណងប្រាថ្នាពិតប្រាកដ។  

ក្នុងសារពិសេសជូនជនរួមជាតិនាព្រឹកថ្ងៃទី ២៩ ខែឧសភា ឆ្នាំ២០២៥ សម្ដេចតេជោ ហ៊ុន សែន បានថ្លែងថា   ការចល័តកម្លាំងទ័ព និងអាវុធធុនធ្ងន់របស់កម្ពុជា ទៅកាន់ព្រំដែន មិនមែនទៅដើម្បីធ្វើសង្គ្រាមទេ ប៉ុន្តែគឺជាការត្រៀមបម្រុងទុកនូវយថាហេតុអាក្រក់ ក្នុងករណីដែលភាគីម្ខាងទៀតបំពានតែប៉ុណ្ណោះ គឺយើងមានសិទ្ធិការពារខ្លួន។ សម្ដេចតេជោបញ្ជាក់ថា៖  «យើងមិនយកអាវុធយុទ្ធភណ្ឌដែលកំពុងតែបញ្ជូនឡើងដែលបានទៅដល់គោលដៅ និងជិតទៅដល់គោលដៅ ដើម្បីទៅវាយប្រហារទៅកាន់ប្រទេសថៃនោះទេ។ ប៉ុន្តែសូមបញ្ជាក់ថា យើងត្រូវតែត្រៀមបម្រុងទុកនូវយថាហេតុអាក្រក់បំផុត ព្រោះថារឿងនេះ វាជាបទពិសោធន៍ដែលបានកើតពីឆ្នាំ២០០៨ ដល់ឆ្នាំ២០១១»។ សម្ដេចតេជោលើកឡើថា ការប៉ះទង្គិចគ្នានៅតំបន់មុំបីនេះ សម្ដេចមិនជឿថា វាជាបន្ទាត់នយោបាយរបស់រាជរដ្ឋាភិបាលថៃ ឬនាយករដ្ឋមន្ត្រីថៃ ឬក្រសួងការពារជាតិថៃ អនុញ្ញាតឱ្យធ្វើបែបនេះទេ។ អ្វីដែលជាការកត់សម្គាល់របស់សម្ដេច គឺវាហាក់ដូចជាបានកើតឡើងដោយបុគ្គល ឬអង្គភាពនៅខាក្រោម ដែលធ្វើរឿងនេះ ដែលព្រលឹមស្រាងៗចាប់ផ្ដើមវាយឆ្មក់ ប៉ុន្តែនៅម៉ោង៦ល្ងាចម្សិលក៏បានដកត្រឡប់ទៅវិញ។ សម្ដេចតេជោសង្កត់ធ្ងន់ថា  ប្រសិនបើនេះ វាជាគោលការណ៍របស់រាជរដ្ឋាភិបាលថៃ ប្រហែលជាកម្លាំងនេះមិនត្រូវបានដកទេ។ សម្ដេចតេជោអះអាងថា អីចឹងវាច្បាស់ណាស់ថា មិនមែនជាបន្ទាត់នយោបាយរបស់រដ្ឋាភិបាលថៃ ឬក៏ក្រសួងការពារជាតិថៃ ឬកងទ័ពថៃទាំងមូលនោះទេ ប៉ុន្តែអាចចេញមកពីអង្គភាពប៉ុណ្ណោះ។ នេះគ្រាន់តែជាការប៉ាន់ស្មានរបស់សម្ដេចតែប៉ុណ្ណោះ។ 

សម្ដេចតេជោប្រធានព្រឹទ្ធសភាបានថ្លែងបញ្ជក់ទៀតថា យើងចង់ឱ្យសភាពការណ៍វិលត្រឡប់ទៅរកចំណុចដើមវិញ មិនចង់បានអ្វីលើសពីនេះទេ រួចហើយកងទ័ព និងកងទ័ពសហការគ្នា។ សម្ដេចតេជោសង្ឃឹមថា កងទ័ព នឹងស្វែងរករូបមន្តនៃការដោះស្រាយ សូមឱ្យសភាពការណ៍វាកើតត្រឹមតែនៅតំបន់មុំបី ហើយវានឹងវិលត្រឡប់ទៅរកសភាពការណ៍មុនម៉ោង៥ ព្រឹកថ្ងៃទី២៨ ខែឧសភា ឆ្នាំ២០២៥ តែប៉ុណ្ណឹងវាគ្រប់គ្រាន់ហើយ។ ជាងនេះទៀតសូមកុំឱ្យសភាពការណ៍នេះវារីករាលដាលទូទាំងព្រំដែន និងកុំឱ្យសភាពការណ៍នេះ ប៉ះពាល់ទៅដល់កិច្ចសហប្រតិបត្តិការដទៃទៀត ដូចជា សេដ្ឋកិច្ច ពាណិជ្ជកម្ម វិនិយោគ ទេសចរណ៍ កីឡា និងវិស័យផ្សេងៗទៀត រាប់ទាំងកិច្ចសហប្រតិបត្តិការខាងផ្នែកយោធាផងដែរ។

សម្ដេចតេជោប្រធានព្រឹទ្ធសភាក៏បានអង្វរក និង ស្នើឱ្យបងប្អូនជនរួមជាតិ សូមកុំរុញបញ្ហានេះ ឈានទៅដល់ការស្អប់ខ្ពើមជាតិសាសន៍នៃប្រទេសជិតខាងគ្នា។ សម្ដេចតេជោលើកឡើងបន្ថែមថា រឿងវាបានកើតទៅហើយ រកវិធីដោះស្រាយ ដើម្បីសម្រាលសភាពកាណ៍នេះ ហើយជំរុញជំនឿទុកចិត្តគ្នា ដើម្បីស្វែងរកទាញយកផលប្រយោជន៍នៃកិច្ចសហប្រតិបត្តិការ។ 
សម្ដេចតេជោប្រធានព្រឹទ្ធសភា ក៏បានអំពាវនាវឱ្យភាគីទាំងពីររកដំណោះស្រាយ តាមរយៈការចរចា ដោយសម្ដេចតេជោរម្លឹកថា ព្រោះជម្លោះប្រដាប់អាវុធវាគ្មានអ្នកណាក្បាលប៉ានដែកទេ មិនថាប្រទេសធំ ឬប្រទេសតូចទេ យើងធ្លាប់សាកល្បងជាមួយគ្នារយៈពេល៤ឆ្នាំ (២០០៨ ដល់២០១១) ដោយប្រើមុខព្រួញបី គឺ ១-សភាពការណ៍យោធានៅទល់ដែន  ទប់ឱ្យជាប់នៅហ្នឹងកន្លែង។ ២- ការទូត បើកទ្វារក្រុមប្រឹក្សាសន្តិសុខអង្គការសហប្រជាជាតិ និង ៣- បញ្ជូនបញ្ហាចូលតុលាការអន្តរជាតិទីក្រុងឡាអេ ដើម្បីបកស្រាយឡើងវិញនូវសាលក្រមឆ្នាំ១៩៦២។

សម្ដេចតេជោ ក៏បានអំពាវនាវដល់បងប្អូនប្រជាពលរដ្ឋ ចូលរួមដើម្បីជួយផ្គត់ផ្គង់ដល់កងទ័ព ដើម្បីបង្ហាញពីសមានចិត្ត ដើម្បីបញ្ជាក់អំពីខឿនការពារជាតិ របស់ប្រជាជន ដែលជាយុទ្ធសាស្ត្ររបស់ ហ៊ុន សែន។  សម្ដេចតេជោ ហ៊ុន សែន សង្ឃឹមថា សភាពការណ៍នៅមុំបី ឱ្យវានៅត្រឹមមុំបីបានហើយ កុំឱ្យវារាលដាលដល់ប្រាសាទព្រះវិហារ ប្រាសាទតាមន់ តាក្របី និងទូទាំងព្រំដែន ហើយរឿងទិដ្ឋភាពយោធាដាច់ដោយឡែកតូចមួយនេះ ឱ្យវានៅទ្រឹងប៉ុណ្ណឹង កុំឱ្យពាក់ព័ន្ធនឹងយោធារួម និងវិស័យដទៃទៀត ជាពិសេស វិស័យសេដ្ឋកិច្ច ពាណិជ្ជកម្ម វិនិយោគ និងវិស័យផ្សេងៗទៀត។ 

សម្ដេចតេជោប្រធានព្រឹទ្ធសភាក៏សង្ឃឹមថា រាជរដ្ឋាភិបាលថៃ ថ្នាក់ដឹកនាំថៃ ក៏មានចិត្តគំនិតដូចខាងកម្ពុជាដែរ គឺចង់ពង្រឹងទំនាក់ទំនងជិតខាងល្អ។
គួរបញ្ជាក់ដែរថា  ការប៉ះទង្គិចរវាងកងទ័ពកម្ពុជា និងកងទ័ពថៃ ដែលបានកើតឡើងនៅព្រឹកថ្ងៃទី២៨ ខែឧសភា ឆ្នាំ២០២៥ នៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះ វិហារ ដោយកងទ័ពថៃបានធ្វើការបាញ់ប្រហារមុនមកលើលេណដ្ឋាន ដែលជាទីតាំងឈរជើងរបស់កងទ័ពកម្ពុជា ជាយូរលង់ណាស់មកហើយ បណ្តាលឱ្យបាត់បង់ជីវិតកងទ័ពកម្ពុជាម្នាក់៕

ដោយ៖ ជឹម ណារី