AKP ភ្នំពេញ ថ្ងៃទី២៩ ខែឧសភា ឆ្នាំ២០២៥--

សហព័ន្ធកីឡាបាល់ទាត់កម្ពុជា-FFC បានចេញបញ្ជីរាយនាមកីឡាករចូលរួមប្រមូលផ្តុំហ្វឹកហាត់ ត្រៀម ការប្រកួតមិត្តភាពអន្តរជាតិជាមួយក្រុមជម្រើសជាតិ តាហ្ស៊ីគីស្ថាន (Tajikistan) នៅពហុកីឡដ្ឋានជាតិអូឡាំពិក នាថ្ងៃទី៥ ខែមិថុនា ខាងមុខនេះ វេលាម៉ោង ៧:០០ យប់។

សហព័ន្ធបានប្រកាសថា កីឡាករមួយចំនួនបានអវត្តមានដោយសារមានបញ្ហារបួសអំឡុងការប្រកួតក្នុងក្លឹបរបស់ពួកគេ និងបញ្ហាជាប់កាតក្រហមកាលពីប្រកួតមិត្តភាពអន្តរជាតិកន្លងទៅ។ ក្រុមកីឡាករជម្រើសជាតិកម្ពុជា ដែលកោះហៅប្រមូលផ្តុំហ្វឹកហាត់នេះមានចំនួន ២៣នាក់ ក្នុងមានអ្នកចាំទី៣នាក់មកពី ភ្នំពេញក្រោន ព្រះខ័នរាជស្វាយរៀង និងណាហ្គាវើលដ៍, ខ្សែការពារ ៧នាក់មកពីព្រះខ័នរាជស្វាយរៀង២នាក់ វិសាខា ៣នាក់ និងម្នាក់ៗមកពីណាហ្គាវើលដ៍ និងអង្គរថាយហ្គឺរ, ខ្សែបម្រើ ៧នាក់ មកពីមកពីព្រះខ័នរាជស្វាយរៀង ៣នាក់ មកពីវិសាខា ៣នាក់ និងម្នាក់មកពីភ្នំពេញក្រោន។ ចំពោះខ្សែប្រយុទ្ធមានចំនួន ៦នាក់មកពីអង្គរថាយហ្គឺរ បឹងកេត ព្រះខ័នរាជស្វាយរៀង ភ្នំពេញក្រោន វិសាខា និងអាយអេសអាយដង្កោសែនជ័យ។

សម្រាប់ចំណាត់ថ្នាក់ពិភពលោករបស់ក្រុមកម្ពុជា ស្ថិតនៅចំណាត់ថ្នាក់លេខ ១៨១ ខណៈក្រុមជម្រើសជាតិ តាហ្ស៊ីគីស្ថាន ស្ថិតនៅចំណាត់ថ្នាក់ពិភពលោក ១០៤។ ៥ប្រកួតចុងក្រោយរបស់ក្រុមតាហ្ស៊ីគីស្ថាន ឈ្នះ៣ប្រកួត និងចាញ់២ប្រកួត ខណៈប្រវត្តិខ្លីៗ ក្នុងការប្រកួតអន្តរជាតិ គឺបានឡើងវគ្គ៨ក្រុមចុងក្រោយ ពានរង្វាន់ AFC Asian Cup 2023, គ្រងម្ចាស់ជើងឯក ពានរង្វាន់ AFC Challenge Cup 2006 និងជាម្ចាស់ជើងឯក King’s Cup 2022៕

ដោយ ហេង ណាលីន