AKP ភ្នំពេញ ថ្ងៃទី២៩ ខែឧសភា ឆ្នាំ២០២៥--

សហព័ន្ធកីឡាកាយវប្បកម្ម និងលំហាត់ប្រាណកម្ពុជាបានប្រកាសជូនដំណឹងដល់មហាជនឱ្យដឹងថា គ្រប់កីឡាករ-កីឡាការិនីកាយវប្បកម្មកម្ពុជា ដែលបានចូលរួមប្រកួតកីឡាកាយវប្បកម្មកម្រិតអន្តរជាតិនានា គឺសុទ្ធសឹងតែទទួលបានអនុញ្ញាតពីឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួង អប់រំ យុវជន និងកីឡា ដោយមានលិខិតឧទ្ទេសនាមចេញដោយក្រសួងអប់រំ យុវជន និងកីឡា និងគោរពច្បាប់ទីភ្នាក់កម្ពុជាប្រឆាំងដូប៉ាទៀត។

នេះបើយោងតាមការអះអាងបញ្ជាក់យ៉ាងច្បាស់លាស់ពីលោកស្រី អេមី សារីរ៉ុម ហម អគ្គលេខាធិការ សហព័ន្ធកីឡាកាយវប្បកម្ម និងលំហាត់ប្រាណកម្ពុជា បន្ទាប់ពីមានជនខិលខូចមួយចំនួនតូចនៅខាងក្រៅសហព័ន្ធតែងតែព្យាយាមរិះគន់ដាក់បន្ទុកដោយគ្មានមូលដ្ឋានដល់សហព័ន្ធកីឡាជំនាញមួយនេះ ដែលទទួលបានសិទ្ធិស្របច្បាប់ពីអាជ្ញាធរកីឡា ក្នុងការផលិតធនធាន និងអភិវឌ្ឍវិស័យកីឡាឱ្យមានការរីកចម្រើនជាបន្តបន្ទាប់គួរឱ្យកត់សម្គាល់។

លោកស្រីបន្ថែមថា លិខិតឧទ្ទេសនាមនីមួយៗតែងតែទទួលបានអនុញ្ញាតដោយឯកឧត្តមបណ្ឌិតសភាចារ្យឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ដោយផ្តល់សិទ្ធិជូនដល់សហព័ន្ធ ក្នុងការបញ្ជូនប្រតិភូ ចៅក្រម គ្រូបង្វឹក និងកីឡាកររបស់ខ្លួនក្នុងព្រឹត្តិការណ៍អន្តរជាតិនានា។ ជាក់ស្តែង ប្រតិភូកីឡាកម្ពុជាបានចូលរួមការប្រកួតជ្រើសរើសជើងឯកកីឡាកាយវប្បកម្មអាស៊ីអាគ្នេយ៍ (SOUTH EAST ASIAN BODYBUILDING AND PHYSIQUE SPORTS CHAMPIONSHIPS 2024) កាលពីថ្ងៃទី១៦-២០ ខែឧសភា ឆ្នាំ២០២៤ នៅប្រទេសឡាវ។

លោកស្រី អេមី បានលើកឡើងទៀតថា កីឡាករកាយវប្បកម្មកម្ពុជាដ៏ឆ្នើម ដែលតំណាងឱ្យប្រទេស និងប្រជាជនកម្ពុជាចូលរួមប្រកួតលក្ខណៈអន្តរជាតិនានាស្របច្បាប់ ដោយមានលិខិតឧទ្ទេសនាមចេញដោយក្រសួងអប់រំ យុវជន និងកីឡា និងគោរពច្បាប់ទីភ្នាក់កម្ពុជាប្រឆាំងដូប៉ា ដោយរូបលោកស្រី និងកីឡាករ-កីឡាការិនីកាយវប្បកម្មកម្ពុជា គឺប្រយុទ្ធប្រឆាំងនឹងសារធាតុហាមឃាត់ក្នុងកីឡា។ កាលពីថ្ងៃទី១៥ ខែកុម្ភៈ ឆ្នាំ២០២៥ កន្លងទៅ សហព័ន្ធកីឡាកាយវបក្បកម្ម និងលំហាត់ប្រាណកម្ពុជាបានអញ្ជើញអ្នកជំនាញផ្នែកសារធាតុហាមឃាត់ ក្នុងកីឡា (Doping) មកពីទីភ្នាក់ងារកម្ពុជាប្រឆាំងនឹងដូប៉ា (CADA) ដើម្បីបង្រៀនដល់សិក្ខាកាមក្នុងវគ្គបណ្តុះបណ្តាល គ្រូបង្វឹកកីឡាកាយវប្បកម្ម និងលំហាត់ប្រាណ ថ្នាក់មូលដ្ឋានជំនាន់ទី២ និង៣។

លោកស្រីអគ្គលេខាធិការបានអះអាងទៀតថា លោក ព្រំ វណ្ណារឿន អនុប្រធានទីភ្នាក់ងារកម្ពុជាប្រឆាំងនឹងដូប៉ា (CADA) បានកោតសរសើរ និងវាយតម្លៃខ្ពស់ចំពោះប្រធានសហព័ន្ធកាយវប្បកម្ម និងលំហាត់ប្រាណកម្ពុជា ដែលបានអញ្ជើញរូបលោកមកបង្រៀនអំពីច្បាប់ហាមឃាត់ការប្រើប្រាស់សារធាតុហាមឃាត់ក្នុងវិស័យកីឡា(Doping) ដល់មន្រ្តីសហព័ន្ធ គ្រូបង្វឹក និងកីឡាករ-កីឡាការិនីរបស់លោក ពីព្រោះថា មន្រ្តីសហព័ន្ធ គ្រូបង្វឹក និងកីឡាករ-កីឡាការិនីទំាងអស់ត្រូវយល់ដឹងឱ្យបានកាន់តែច្បាស់ ដើម្បីឱ្យពួកគាត់ជៀសវាងការប្រើប្រាស់ពីសារធាតុហាមឃាត់ក្នុងកីឡា (Doping) ពីផលប៉ះពាល់នៃប្រើប្រាស់សារធាតុ Doping ទំាងនេះ ដោយសារតែនេះជាការប្រយុទ្ធប្រឆាំងនឹងសារធាតុហាមឃាត់ក្នុងវិស័យកីឡាទូទាំងសកលលោក។

លោកអនុប្រធានទីភ្នាក់ងារកម្ពុជាប្រឆាំងនឹងដូប៉ា (CADA) បានបន្តថា កីឡាករ-កីឡាការិនីទំាងអស់ក្នុងប្រទេសកម្ពុជាត្រូវតែគោរព និងដើរតាមច្បាប់ប្រឆាំងនឹងពីសារធាតុហាមឃាត់ក្នុងកីឡា (Doping) ពិភពលោក។ ការបង្កើតក្លឹបមួយចំនួនមិនបានគោរពច្បាប់ប្រឆាំងនឹងពីសារធាតុហាមឃាត់ក្នុងកីឡា (Doping) ពិភពលោកមានផលប៉ះពាល់ប្រទេសជាតិថ្ងៃក្រោយ។ ជំហានទី១ ត្រូវបង្រៀនឱ្យពួកគាត់យល់ពី Doping ពីព្រោះ Doping សារធាតុ និងវិធីសាស្រ្តហាមឃាត់ក្នុងកីឡា ហើយនិយាយទៅលើវិស័យកីឡាគ្រប់ប្រភេទ ទំាងកីឡាដើម្បីសុខភាព និងកីឡាអាជីព៕

ដោយ ហេង ណាលីន