AKP ភ្នំពេញ ថ្ងៃទី២៨ ខែឧសភា ឆ្នាំ២០២៥--

ឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញជាអធិបតីបិទសមយុទ្ធនាគមាសឆ្នាំ២០២៥ រវាងកងទ័ពកម្ពុជា-ចិន ដែលបានធ្វើឡើងនៅភ្នំជុំសែនរីករាយ នាព្រឹកថ្ងៃទី២៨ ខែឧសភា ឆ្នាំ២០២៥។

ថ្លែងក្នុងឱកាសនោះ ឯកឧត្តមនាយឧត្តមសេនីយ៍ ទៀ សីហា បានបញ្ជាក់ថា កន្លងទៅថ្មីៗនេះមានអ្នកវិភាគមួយចំនួន ក៏ដូចជាសារព័ត៌មានមួយចំនួនតែងតែយកចិត្តទុកដាក់ និងតាមដានការដឹកនាំរបស់ សម្តេចមហាបវរធិបតី ហ៊ុន ម៉ាណែត ដែលជានាយករដ្ឋមន្ត្រីនៃកម្ពុជា ក៏ដូចជាគណៈរដ្ឋមន្ត្រីនៃរាជរដ្ឋាភិបាល នីតិកាលទី៧ ដោយលើកឡើងថា ការទំនាក់ទំនងកម្ពុជា-ចិន មានការថយចុះដោយមើលឃើញថា ការដឹកនាំរបស់សម្តេច ក៏ដូចជាគណៈរដ្ឋមន្ត្រី គឺពឹងផ្អែកលើប្រទេសផ្សេងៗ។

ពាក់ព័ន្ធនឹងចំណុចនេះ ឯកឧត្តមឧបនាយករដ្ឋមន្ត្រី ទៀ សីហា បានមានប្រសាសន៍ថា «ជាមួយនឹងកិច្ចសហប្រតិបត្តិការជាផ្លែផ្កាកន្លងមក និងបានឈានទៅដល់ទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយនាពេលកន្លងមក ខ្ញុំសូមបញ្ជាក់ថា ទំនាក់ទំនងការទូតជាប្រវត្តិសាស្ត្រ ហើយមានភាពស្និទ្ធស្នាលយ៉ាងរឹងមាំ រវាងប្រទេសយើងទាំង២ យើងអាចឆ្លើយតបបានថា ជាការវាយប្រហារ ដើម្បីបំបែកសាមគ្គីភាពរវាងកម្ពុជា និងចិន ជាពិសេសគឺរវាងកងទ័ព និងកងទ័ពរបស់ប្រទេសទាំង២»។

ឯកឧត្តមឧបនាយករដ្ឋមន្ត្រី ទៀ សីហា បានបញ្ជាក់ជាថ្មីទៀតថា បន្ទាប់ពីយើងបានឃើញនូវសមិទ្ធផល និងលំហូរពាណិជ្ជកម្ម ក៏ដូចជាលំហូរការឧបត្ថម្ភផ្នែកយោធាមកដល់កម្ពុជា ពីភាគីមិត្តចិន ក្នុងនោះកាលពីពេលកន្លងមកថ្មីៗនេះ សម្តេចមហាបវរធិបតី ហ៊ុន ម៉ាណែត ក៏បានបញ្ជាក់ពីការទំនាក់ទំនងរវាងកម្ពុជា និងចិន នាពេលសម្ពោធដាក់ឱ្យប្រើប្រាស់ជាផ្លូវការមូលដ្ឋានសមុទ្ររាម ស្របនឹងសក្ខីភាពរបស់លោក ស៊ី ជីនពីង ប្រធានាធិបតីចិន ដែលបានធ្វើទស្សនកិច្ចផ្លូវរដ្ឋមកកម្ពុជា បានបង្ហាញឱ្យឃើញពីភាពជិតស្និទ្ធ និងការពង្រឹងនូវសាមគ្គីភាពរវាងប្រទេសទាំង២ កាន់តែឈានទៅមុខផងដែរ៕

ដោយ សំ សាម៉ន