AKP កំពង់ធំ ថ្ងៃទី២៨ ខែឧសភា ឆ្នាំ២០២៥--

ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាប្រធានសមាគមអតីតយុទ្ធជនកម្ពុជាខេត្តកំពង់ធំ នាព្រឹកថ្ងៃទី២៨ ខែឧសភា ឆ្នាំ២០២៥ បានដឹកនាំកិច្ចប្រជុំពង្រឹងតួនាទីភារកិច្ចថ្នាក់ដឹកនាំនៃគណៈកម្មាធិការសមាគមអតីតយុទ្ធជនកម្ពុជានៅគ្រប់បណ្ដាថ្នាក់ ដើម្បីគ្រប់គ្រង និងបម្រើបងប្អូនអតីតយុទ្ធជនដែលមានជីវភាពលំបាកខ្វះខាតនៅក្នុងខេត្តកំពង់ធំ ឱ្យកាន់តែល្អប្រសើរឡើងនៅទីបញ្ជាការដ្ឋានតំបន់ប្រតិបត្តិការសឹករងកំពង់ធំ។ 

ឧត្តមសេនីយ៍ទោ សោម ស៊ុន បានផ្សព្វផ្សាយនូវបទបញ្ជាមួយចំនួនរបស់ឯកឧត្តមទេសរដ្ឋមន្ត្រីនាយឧត្តមសេនីយ៍ គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា និងការណែនាំរបស់ឯកឧត្តម នួន ផារ័ត្ន អភិបាលខេត្ត និងជាប្រធានកិត្តិយសសមាគមអតីតយុទ្ធជនកម្ពុជាខេត្តកំពង់ធំ ក្នុងការគ្រប់គ្រង និងធ្វើបច្ចុប្បន្នភាពបងប្អូនអតីតយុទ្ធជនដែលមានជីវភាពលំបាកខ្វះខាត ពិសេសបងប្អូន ដែលគ្មានដីគ្មានផ្ទះ រស់នៅលើដីសាធារណៈ ឬមានដីហើយ តែគ្មានផ្ទះឬក៏មានជម្រករស់នៅមិនសមរម្យ ពិតប្រាកដ ដើម្បីមានវិធានការផ្ដល់ដីនិងសាងសង់ជម្រកស្នាក់នៅជូនពួកគាត់ឱ្យបានសមរម្យ។

 
ឧត្តមសេនីយ៍ទោ សោម ស៊ុន  ក៏បានណែនាំដល់ថ្នាក់ដឹកនាំគណៈកម្មាធិការសមាគមអតីតយុទ្ធជន នៅតាមបណ្ដាក្រុង ស្រុកទាំង៩ និងសាខាឃុំសង្កាត់ទាំង៨១ ត្រូវជួបសំណេះសំណាល ស្វែងយល់ពីសុខទុក្ខនិងជីវភាពរស់នៅរបស់បងប្អូនអតីតយុទ្ធជន នៅតាមមូលដ្ឋាននីមួយៗរៀងៗខ្លួន ដោយត្រូវក្តាប់ជាប់នូវរាល់សំណូមពរ និងបញ្ហាកង្វល់ផ្សេងៗរបស់បងប្អូនអតីតយុទ្ធជនយើង ដើម្បីមានវិធានការដោះស្រាយជូនបងប្អូនឱ្យបានសមស្រប និងតាមអ្វីដែលអាចធ្វើទៅបាន ហើយនឹងត្រូវរាយការណ៍ជូនថ្នាក់ដឹកនាំគណៈកម្មាធិការសមាគមអតីតយុទ្ធជនកម្ពុជា នៅតាមបណ្ដាថ្នាក់ ដើម្បីចាត់ចែងដោះស្រាយឱ្យបានសមស្រប។

ក្នុងឱកាសនោះ ឧត្តមសេនីយ៍ទោ សោម ស៊ុន បានគូសបញ្ជាក់អំពីលទ្ធផលសំខាន់ៗ ដែលគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ ដែលបានខិតខំបំពេញភារកិច្ចក្នុងរយៈពេលកន្លងទៅ ដោយបានធ្វើបច្ចុប្បន្នភាពស្រាវជ្រាវរកឃើញបងប្អូនអតីតយុទ្ធជន ដែលមានជីវភាពលំបាកខ្វះខាត និងសាងសង់ផ្ទះថ្មី រៀបចំផ្តល់ដីសម្បទានសង្គមកិច្ច ដែលជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងសម្ដេចកិត្តិព្រឹទ្ធបណ្ឌិត ព្រមទាំងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី រៀបចំជាភូមិឋាន មានហេដ្ឋារចនាសម្ព័ន្ធ ទឹក ភ្លើង ផ្លូវ ជូនដល់បងប្អូនអតីតយុទ្ធជន បានចំនួន២០៦គ្រួសារ រួចមកហើយនៅស្រុកសន្ទុក ខេត្តកំពង់ធំ នឹងបានសាងសង់ផ្ទះជូនបងប្អូនអតីតយុទ្ធជន ដែលមានដីហើយគ្មានផ្ទះ នៅតាមបណ្ដាមូលដ្ឋាននានាបានចំនួន២៤៦ខ្នងផ្ទះផងដែរ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)