AKP ភ្នំពេញ ថ្ងៃទី២៨ ខែឧសភា ឆ្នាំ២០២៥--

លោក ញឹក បានខេង អភិបាលរងនៃគណៈអភិបាលខេត្តកំពង់ធំ កាលពីរសៀលថ្ងៃទី២៧ ខែឧសភា ឆ្នាំ២០២៥ បានអញ្ជើញដឹកនាំកិច្ចប្រជុំស្ដីពីការពិនិត្យ និងផ្តល់យោបល់លើសេចក្តីព្រាងផែនការអភិវឌ្ឍន៍៥ឆ្នាំ (២០២៥-២០២៩) របស់គណៈកម្មាធិការសម្របសម្រួលបច្ចេកទេសរបស់ក្រុមប្រឹក្សាខេត្ត និងគណៈអភិបាលខេត្ត ដោយមានការអញ្ជើញចូលពីឯកឧត្ដម លោកជំទាវ សមាជិកក្រុមប្រឹក្សាខេត្ត អភិបាលរងខេត្តកងកម្លាំងទាំងបី អភិបាលក្រុង-ស្រុកទាំង៩ និងមន្ទីរជំនាញជុំវិញខេត្ត។

 
លោក ញឹក បានខេង បានលើកឡើងថា ផែនការអភិវឌ្ឍន៍៥ឆ្នាំ (២០២៥-២០២៩) គឺជាឯកសារគោលដ៏មានសារសំខាន់សម្រាប់ការអភិវឌ្ឍខេត្តកំពង់ធំរបស់យើង ដើម្បីរួមចំណែកឈានទៅសម្រេចបានគោលនយោបាយយុទ្ធសាស្ត្របញ្ចកោណ ដំណាក់កាលទី១របស់រាជរដ្ឋាភិបាល។

លោក ញឹក បានខេង បានណែនាំដល់ថ្នាក់ដឹកនាំមន្ទីរអង្គភាពជំនាញជុំវិញខេត្ត អភិបាលក្រុង-ស្រុកទាំង៩ ត្រូវលើកយកគម្រោងផែនការអាទិភាពរបស់ខ្លួន សម្រាប់ការអនុវត្តក្នុងរយៈពេល ៥ឆ្នាំខាងមុខ ដើម្បីដាក់ចូលក្នុងផែនការអភិវឌ្ឍន៍៥ឆ្នាំ (២០២៥-២០២៩) របស់គណៈកម្មាធិការសម្របសម្រួលបច្ចេកទេសរបស់ក្រុមប្រឹក្សាខេត្ត និងគណៈអភិបាលខេត្តំពង់ធំឱ្យស្របតាមចក្ខុវិស័យ ក្នុងការអភិវឌ្ឍខេត្តទាំងមូល។

សូមបញ្ជាក់ថាផែនការអភិវឌ្ឍន៍ជាផែនការដែលមានការសម្របសម្រួលរវាងផែនការខេត្ត ជាមួយផែនការក្រុង ស្រុកនិងឃុំ សង្កាត់និងជាផែនការដែលត្រូវបំពេញបន្ថែម និងគាំទ្រដល់ផែនការក្រុង ស្រុកនិងឃុំ សង្កាត់ក្នុងខេត្ត សំដៅបង្កើនប្រសិទ្ធភាពនៃការឆ្លើយតបទៅនឹងតម្រូវការអភិវឌ្ឍន៍នៅមូលដ្ឋានបន្ថែមពីនេះការ ពិគ្រោះយោបល់ និងការចូលរួមពីអ្នកពាក់ព័ន្ធនានាគឺជាគោលការណ៍សំខាន់ និងចាំបាច់នៅក្នុងដំណើរការកសាងផែនការអភិវឌ្ឍន៍ខេត្ត៕

ដោយ ស៊ុម វណ្ណា