AKP ប៉េកាំង ថ្ងៃទី២៨ ខែឧសភា ឆ្នាំ២០២៥ -- លោក តាំង ហ្ស៊ីមីន (Tang Zhimin) ប្រធានផ្នែកការសិក្សាអាស៊ានចិននៃវិទ្យាស្ថានគ្រប់គ្រងផាន់យ៉ាភីវ៉ាត់ដែលមានមូលដ្ឋាននៅទីក្រុងបាងកក បាននិយាយថា «ការវិវត្តន៍ពីការកាត់បន្ថយពន្ធមូលដ្ឋានពីកំណែ ១.០ មកដល់កំណែ ៣.០ នៃកិច្ចព្រមព្រៀងពាណិជ្ជកម្មសេរីអាស៊ាន-ចិន (CAFTA 3.0) បានបង្ហាញពីការប្តេជ្ញាចិត្តកាន់តែស៊ីជម្រៅចំពោះកិច្ចព្រមព្រៀងពាណិជ្ជកម្មសេរីកម្រិតខ្ពស់ប្រកបដោយបរិយាប័ន្ន ទំនើបកម្ម គ្រប់ជ្រុងជ្រោយ និងផ្តល់ផលប្រយោជន៍ទៅវិញទៅមក»។

លោក តាំង បាននិយាយថា «តាមរយៈការតម្រឹមផ្នែកច្បាប់ ការទទួលស្គាល់ស្តង់ដារ និងការពង្រឹងយន្តការ កិច្ចព្រមព្រៀងដែលបានធ្វើបច្ចុប្បន្នភាពនេះជាការពង្រឹងមូលដ្ឋានគ្រឹះសម្រាប់កិច្ចសហប្រតិបត្តិការក្នុងការផ្គត់ផ្គង់ និងសង្វាក់ឧស្សាហកម្ម»។

លោក តាំង បាននិយាយបន្ថែម​ថា កិច្ចព្រមព្រៀង​នេះ​គូស​បញ្ជាក់ដល់​ភាគី​ទាំង​ពីរ​ថា​ជាអ្នក​គាំទ្រ​យ៉ាង​ខ្ជាប់ខ្ជួន​នៃ​សកលភាវូបនីយកម្ម​សេដ្ឋកិច្ច។

លោក វីចាយ៉ាន់តូ សាមីរីន (Wijayanto Samirin) សេដ្ឋវិទូនៅសាកលវិទ្យាល័យប៉ារ៉ាម៉ាឌីណារបស់ប្រទេសឥណ្ឌូណេស៊ី បាននិយាយថា ការដាក់បញ្ចូលនូវវិស័យអាទិភាពថ្មីៗនៅក្នុងកិច្ចព្រមព្រៀង CAFTA 3.0 ជាការបង្ហាញនូវការឆ្លើយតបរបស់កិច្ចព្រមព្រៀងនេះចំពោះការជំរុញឱ្យមានការព្រួយបារម្ភក្នុងតំបន់ ដោយឆ្លុះបញ្ចាំងថា កិច្ចព្រមព្រៀងពាណិជ្ជកម្មសេរីចិន-អាស៊ាននៅតែបន្តវិវឌ្ឍដើម្បីដោះស្រាយបញ្ហាប្រឈមនាពេលបច្ចុប្បន្ន និងអនាគត។

អ្នកវិភាគឥណ្ឌូណេស៊ីរូបនេះបាននិយាយថា សំខាន់ជាងនេះទៅទៀត កិច្ចព្រមព្រៀងពាណិជ្ជកម្មសេរីដែលបានធ្វើឱ្យប្រសើរឡើងនេះ បានបង្ហាញពីភាពធន់ និងការកើនឡើងនៃកម្លាំងនៃពហុភាគីនិយមប្រឆាំងនឹងការការពារនិយម ជាពិសេសវាគូសបញ្ជាក់ការគាំទ្ររបស់អាស៊ាន និងចិនចំពោះពហុភាគីនិយម ដោយបញ្ចូលនូវភាពប្រាកដប្រជាទៅក្នុងពាណិជ្ជកម្មពិភពលោក៕

ដោយ៖ យា ចិន្តាខន្តី