AKP ប៉េកាំង ថ្ងៃទី២៨ ខែឧសភា ឆ្នាំ២០២៥ -- ជាមួយនឹងការប្រឈមមុខនឹងបរិយាកាសសេដ្ឋកិច្ចក្នុងតំបន់ និងពិភពលោកដែលមិនច្បាស់លាស់ និងមិនស្ថិតស្ថេរកាន់តែខ្លាំងឡើង ការរៀបចំកិច្ចប្រជុំកំពូលអាស៊ាន-ក្រុមប្រឹក្សាប្រតិបត្តិការឈូងសមុទ្រ-ចិន ជាលើកដំបូង បានក្លាយទៅជាការឯកភាពរួមគ្នាក្នុងចំណោមប្រទេសកំពុងអភិវឌ្ឍន៍ជាច្រើនដើម្បីស្វែងរកភាពប្រាកដប្រជា និងបង្កើនភាពធន់ដោយការជំរុញកំណើនថ្មី ដែលជាដៃគូដែលមានការកំពុងរីកចម្រើន។

ទីមួយ កិច្ចប្រជុំកំពូលនេះ គឺយន្តការដែលជាលទ្ធផលនៃកិច្ចសន្ទនាទ្វេភាគី និងកិច្ចសហប្រតិបត្តិការកាន់តែស៊ីជម្រៅក្នុងចំណោមភាគីទាំងបីរវាងចិន និងអាស៊ាន ចិន និង GCC និងអាស៊ាន និង GCC ។ ចាប់តាំងពីឆ្នាំ១៩៩១ មក ប្រទេសចិន និងអាស៊ានបានរក្សាការសន្ទនា និងទំនាក់ទំនងកិច្ចសហប្រតិបត្តិការរយៈពេល ៣៤ឆ្នាំហើយ ដោយឈានដល់ការបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយនៅក្នុងឆ្នាំ២០២១។ កិច្ចប្រជុំកំពូលចិន-GCC លើកដំបូងបានធ្វើឡើងកាលពីក្នុងខែធ្នូ ឆ្នាំ២០២២ ដែលភាគីទាំងពីរបានអនុម័តផែនការសកម្មភាពឆ្នាំ២០២៣-២០២៧ សម្រាប់កិច្ចសន្ទនាជាលក្ខណៈក្របខណ្ឌកិច្ចពិភាក្សា និងកិច្ចសហប្រតិបត្តិការទ្វេភាគី។ កិច្ចប្រជុំកំពូលអាស៊ាន-GCC ត្រូវបានប្រារព្ធធ្វើឡើងនៅក្នុងខែតុលា ឆ្នាំ២០២៣ ហើយក្របខ័ណ្ឌកិច្ចសហប្រតិបត្តិការអាស៊ាន-GCC ឆ្នាំ២០២៤-២០២៨ បានគូសបញ្ជាក់នូវរបៀបវារៈសម្រាប់កិច្ចសន្ទនា និងកិច្ចសហប្រតិបត្តិការអាស៊ាន-GCC ។ យន្តការទាំងនេះ គឺជាសំណុំនៃកិច្ចប្រជុំកំពូលទ្វេភាគីចំនួនបី និងការពង្រីកទំនាក់ទំនងជាលំដាប់ ដោយបង្កើតបានមូលដ្ឋានគ្រឹះសម្រាប់ការរៀបចំកិច្ចប្រជុំកំពូលអាស៊ាន-GCC-ចិនលើកដំបូង។

ទីពីរ វាជាយន្តការនៅពីក្រោយនៃការកើនឡើងសមូហភាពនៃសកលលោកភាគខាងត្បូង ដែលកិច្ចប្រជុំកំពូលនេះឆ្លុះបញ្ចាំងពីលទ្ធផលនៃបណ្តាញភាពជាដៃគូដែលប្រសព្វគ្នាកាន់តែខ្លាំង និងមានការរួមបញ្ចូលគ្នាក្នុងចំណោមភាគីទាំងបី។ សព្វថ្ងៃនេះ កិច្ចសន្ទនា និងកិច្ចសហប្រតិបត្តិការក្នុងចំណោមបណ្តាប្រទេសនៅសកលលោកភាគខាងត្បូងកំពុងមានភាពកាន់តែស៊ីជម្រៅតាមរយៈការពង្រីកបណ្តាញ និងការបង្រួបបង្រួមភាពជាដៃគូ។

គោលដៅបន្តតាមរយៈកិច្ចសហប្រតិបត្តិការត្រីភាគីរវាងប្រទេសចិន អាស៊ាន និង GCC នេះ ក៏មានភាពច្បាស់លាស់ផងដែរ។ ចាប់តាំងពីរដ្ឋបាលរបស់លោក ដូណាល់ ត្រាំ (Donald Trump) ថ្មីចូលកាន់តំណែងមក បានអនុវត្តវិធីសាស្រ្ត «ច្បាប់ព្រៃ» នៅក្នុងនយោបាយពិភពលោក និងសេដ្ឋកិច្ចអន្តរជាតិ។ ជាលទ្ធផល ប្រទេសចិន និងបណ្តាប្រទេសនៅតំបន់អាស៊ីអាគ្នេយ៍បានក្លាយជាគោលដៅសំខាន់នៃ «ពន្ធគយ» របស់អាម៉េរិក ខណៈដែលបណ្តាប្រទេសនៅឈូងសមុទ្របានទទួលរងនូវសម្ពាធយ៉ាងខ្លាំងទាក់ទងនឹងតម្លៃថាមពល និងសន្តិសុខហិរញ្ញវត្ថុ។ ការធានាបាននូវសុវត្ថិភាពសង្វាក់ផ្គត់ផ្គង់ ការជំរុញភាពធន់ និងការរួមបញ្ចូលគ្នានៅក្នុងការអភិវឌ្ឍសេដ្ឋកិច្ចក្នុងតំបន់ បានក្លាយជាកង្វល់រួមគ្នាក្នុងចំណោមប្រទេសនៅអាស៊ាន ចិន និង GCC ។

ក្នុងន័យនេះ ភាគីទាំងបីមិនត្រឹមតែចែករំលែកការឯកភាពគ្នាយ៉ាងទូលំទូលាយប៉ុណ្ណោះទេ ប៉ុន្តែថែមទាំងមានសក្តានុពលដ៏អស្ចារ្យសម្រាប់កិច្ចសហប្រតិបត្តិការឆ្លងតំបន់ផងដែរ ដោយ កិច្ចសហប្រតិបត្តិការរបស់ពួកគេអាចបង្កើតបានជាប្លុកថ្មី និងមានឥទ្ធិពលខ្ពស់នៅក្នុងសេដ្ឋកិច្ចពិភពលោក៕

ដោយ៖ យា ចិន្តាខន្តី