AKP ប៉េកាំង ថ្ងៃទី២៨ ខែឧសភា ឆ្នាំ២០២៥ -- កំណែ ៣.០ នៃកិច្ចព្រមព្រៀងពាណិជ្ជកម្មសេរីចិន-អាស៊ាន (CAFTA) បានកើតឡើងចំពេលដ៏សំខាន់ ដោយបានបញ្ជូនសញ្ញាយ៉ាងច្បាស់លាស់ និងរឹងមាំក្នុងការគាំទ្រពាណិជ្ជកម្មសេរី និងកិច្ចសហប្រតិបត្តិការបើកចំហ ចំពេលមានការកើនឡើងនូវការការពារនិយម និងការបំបែកផ្នែកពាណិជ្ជកម្ម។ នេះបើយោងតាមអ្នកវិភាគបាននិយាយនៅក្រៅកិច្ចប្រជុំកំពូលអាស៊ានឆ្នាំ២០២៥ និងកិច្ចប្រជុំកំពូលពាក់ព័ន្ធ។

លោក តាន់ កាហ៊ីង (Tan Kar Hing) អនុប្រធានមជ្ឈមណ្ឌលសិក្សាយុទ្ធសាស្ត្រក្នុងតំបន់របស់ប្រទេសម៉ាឡេស៊ី បាននិយាយថា កិច្ចព្រមព្រៀងដែលជាកត្តាជំរុញដ៏សំខាន់សម្រាប់កំណើន និងការប្រកួតប្រជែងប្រកបដោយចីរភាពរបស់អាស៊ាន និងចិននេះ បានបង្ហាញពីការផ្លាស់ប្តូរពីទំនិញប្រពៃណីទៅកាន់សេដ្ឋកិច្ចនាពេលអនាគត។

អ្នកជំនាញម៉ាឡេស៊ីរូបនេះបាននិយាយថា លើសពីការកាត់បន្ថយពន្ធគយ និងការធ្វើពាណិជ្ជកម្មដោយរលូន កិច្ចព្រមព្រៀងដែលបានធ្វើបច្ចុប្បន្នភាពនេះ បានរួមបញ្ចូលនូវជំពូកថ្មីចំនួន៩ ដែលគ្របដណ្តប់ទៅលើផ្នែកយុទ្ធសាស្ត្រមួយចំនួន ដូចជាសេដ្ឋកិច្ចឌីជីថល សេដ្ឋកិច្ចបៃតង ភាពធន់នៃខ្សែសង្វាក់ផ្គត់ផ្គង់ ការគាំទ្រសហគ្រាសធុនតូច និងមធ្យម (SME) ព្រមទាំងកិច្ចសហប្រតិបត្តិការគយ ដែលឆ្លុះបញ្ចាំងពីការគ្របដណ្តប់កាន់តែទូលំទូលាយ និងភាពជាក់លាក់កាន់តែច្រើន។

ក្នុង​នាម​ជា​ប្រទេស​កំពុង​អភិវឌ្ឍន៍សេដ្ឋកិច្ចដ៏សំខាន់ ចិន ​និង​អាស៊ានគឺ​ជា​ដៃគូ​ពាណិជ្ជកម្ម​ធំ​ជាង​គេ​របស់​គ្នាទៅវិញទៅមក​អស់​រយៈពេល​ជាច្រើន​ឆ្នាំមកហើយ។ ទិន្នន័យពីរដ្ឋបាលគយទូទៅរបស់ប្រទេសចិនបានបង្ហាញថា ក្នុងរយៈពេលបួនខែដំបូងនៃឆ្នាំនេះ ពាណិជ្ជកម្មទ្វេភាគីបានឈានដល់តម្លៃ ២,៣៨ពាន់ពាន់លានយន់ (៣៣០ពាន់លានដុល្លារអាម៉េរិក) ដែលកើនឡើង ៩,២% ធៀបទៅនឹងឆ្នាំមុន៕

ដោយ៖ យា ចិន្តាខន្តី