AKP កំពង់ធំ ថ្ងៃទី២៧ ខែឧសភា ឆ្នាំ២០២៥ -- លោកស្រី ង៉ែត ណារីន ប្រធានមន្ទីរព័ត៌មានខេត្តកំពង់ធំ និងជាអនុប្រធានក្រុមការងារចុះមូលដ្ឋានឃុំទួលគ្រើល បានអំពាវនាវឱ្យប្រជាពលរដ្ឋចងចាំនូវការឈឺចាប់ពីឧក្រិដ្ឋកម្មដែលកើតមានក្នុងរបបកម្ពុជាប្រជាធិបតេយ្យ និងចូលរួមការពារកុំឱ្យរបបនេះវិលមកវិញ ក្នុងឱកាសអញ្ជើញចូលរួមទិវាជាតិនៃការចងចាំ២០ឧសភា នៅវរត្តក្រពើចាស់ ភូមិក្រពើ ឃុំទួលគ្រើល ស្រុកប្រាសាទបល្ល័ង្ក ខេត្តកំពង់ធំ នាព្រឹកថ្ងៃទី២៧ ខែឧសភា ឆ្នាំ២០២៥និងដោយមានការចូលរួមពីក្រុមការងារចុះមូលដ្ឋានឃុំទួលគ្រើល ព្រះសង្ឃនិងប្រជាពលរដ្ឋប្រមាណជាង៣០០នាក់។

លោកស្រីប្រធានមន្ទីរបានមានប្រសាសន៍លើកឡើងថា ការកំណត់យកថ្ងៃ២០ឧសភា ទិវាជាតិនៃការចងចាំ ជាថ្ងៃបុណ្យជាតិនេះ សម្រាប់ជាការរម្លឹកដល់ជនរងគ្រោះ និងការឈឺចាប់ពីឧក្រិដ្ឋកម្ម ដែលកើតមានក្នុងរបបកម្ពុជាប្រជាធិបតេយ្យ ចាប់ពីថ្ងៃទី១៧ មេសា ១៩៧៥ ដល់ថ្ងៃទី៦ មករា ១៩៧៩។ដើម្បីរំលឹកដល់ជនរងគ្រោះ ការស្ដារកិត្តិយសនិងសេចក្តីថ្លៃថ្នូរ របស់ជនគ្រោះ ទោះជានៅរស់ ឬក៏បានបាត់បង់ជីវិតក៏ដោយ។ ប៉ះប៉ូវដល់ការឈឺចាប់ផ្លូវចិត្ត និងផ្នែកសង្គមដល់ជនរងគ្រោះ និងក្រុមគ្រួសារ ។ចូលរួមក្នុងការផ្សះផ្សាជាតិ និងជំរុញឱ្យមានសុខដុមរមនីយកម្ម ក្នុងសង្គមកម្ពុជា និងលើកកម្ពស់ការផ្សព្វផ្សាយ និងការយល់ដឹងអំពីអំពើឃោឃៅ ដែលកើតមាននៅក្នុងរបបកម្ពុជាប្រជាធិបតេយ្យ កុំឱ្យកើតមានឡើងសារជាថ្មី។

ទន្ទឹមនឹងនេះលោកស្រីបានអំពាវនាវដល់បងប្អូនប្រជាពលរដ្ឋ មន្ត្រីរាជការ និងអាជ្ញាធរមូលដ្ឋានគ្រប់លំដាប់ថ្នាក់ បន្តពួតដៃគ្នា ថែរក្សាសន្តិសុខ សណ្តាប់ធ្នាប់សាធារណៈ សុវត្ថិភាពសង្គមឱ្យបានរឹងមាំ ដើម្បីធានាការអភិឌ្ឍសេដ្ឋកិច្ចសង្គម និងភាពសុខសាន្ត ជូនប្រជាជនទាំងផ្លូវកាយនិងផ្លូវចិត្ត៕

ដោយ ស៊ុម វណ្ណា