AKP ភ្នំពេញ ថ្ងៃទី២៧ ខែឧសភា ឆ្នាំ២០២៥ -- ជាកិត្តិយសដ៏ខ្ពង់ខ្ពស់សម្រាប់អង្គការ WWF-កម្ពុជា ដែលបានចូលរួមជាមួយឯកឧត្ដម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងដំណើរអញ្ជើញចូលជួបសវនាការជាមួយសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ នៅព្រះរាជដំណាក់គន្ធបុប្ផា ក្នុងព្រះបរមរាជវាំង។

កិច្ចសវនាការនេះមានគោលបំណង ដើម្បីទូលថ្វាយអំពីវឌ្ឍនភាពសំខាន់ៗ ជាពិសេសនោះគឺការអភិរក្សធនធានធម្មជាតិ និងសត្វផ្សោតទន្លេមេគង្គ។ នេះបើតាមការឱ្យដឹពី អង្គការ WWFនៅថ្ងៃទី២៧ ខែឧសភា ឆ្នាំ២០២៥។

អង្គការ WWF-កម្ពុជា បន្តធ្វើការយ៉ាងសកម្មជាមួយក្រសួងកសិកម្ម រុក្ខាប្រមាញ់ និងនេសាទ (MAFF) អាជ្ញាធរមូលដ្ឋាន សហគមន៍ និងដៃគូផ្សេងៗ ដើម្បីបន្តពង្រឹងការអនុវត្តច្បាប់ស្តីពីជលផល និងការអនុវត្តបម្រាមលើការប្រើប្រាស់មងនេសាទក្នុងតំបន់ជម្រកសត្វផ្សោត ព្រមទាំងបន្តផ្តល់នូវជម្រើសមុខរបរសម្រាប់ការចិញ្ចឹមជីវិតដល់សហគមន៍ដែលរស់នៅតាមដងទន្លេមេគង្គ បន្តសកម្មភាពអប់រំបរិស្ថាន ការផ្សព្វផ្សាយការយល់ដឹងក្នុងសហគមន៍ និងការស្រាវជ្រាវនិងតាមដានស្ថានភាព និងចំនួនសត្វផ្សោត៕

ដោយ ណយ នឿន (ប្រភព៖ WWF)