AKP ភ្នំពេញ ថ្ងៃទី២៧ ខែឧសភា ឆ្នាំ២០២៥ -- ក្រសួងសេដ្ឋកិច្ច និងហិរញ្ញវត្ថុ បានបើកវគ្គបណ្តុះបណ្តាល និងវិក្រឹតការលើ “វិធាន និងបទប្បញ្ញត្តិស្តីពីលទ្ធកម្មសាធារណៈ” ជូនមន្ត្រីទទួលបន្ទុកកិច្ចលទ្ធកម្មសាធារណៈ ចំនួន៩៦នាក់ មកពីស្ថាប័នអនុវត្តលទ្ធកម្មរដ្ឋបាលក្រុង ស្រុក ខណ្ឌ នៃរាជធានីភ្នំពេញ ខេត្តកណ្តាល ខេត្តស្វាយរៀង និងខេត្តព្រៃវែង កាលពីថ្ងៃទី២៦ ខែឧសភា ឆ្នាំ២០២៥ ដោយពិធីបើកវគ្គនេះបានប្រព្រឹត្តទៅក្រោមការដឹកនាំរបស់ឯកឧត្តម បណ្ឌិត សឹង រេត អនុរដ្ឋលេខាធិការ និងជាតំណាងដ៏ខ្ពង់ខ្ពស់ឯកឧត្តម បណ្ឌិតសភាចារ្យ ហ៊ាន សាហ៊ីប រដ្ឋលេខាធិការ និងជាប្រធានក្រុមការងារកសាងសមត្ថភាពនៃក្រសួងសេដ្ឋកិច្ច និងហិរញ្ញវត្ថុ ដោយមានការចូលរួមពីអនុរដ្ឋលេខាធិការ ថ្នាក់ដឹកនាំ ក្រសួងសេដ្ឋកិច្ច និងហិរញ្ញវត្ថុ ព្រមទាំងមន្រ្តីរាជការ ឧទ្ទេសាចារ្យ និងសិក្ខាកាម។

ថ្លែងក្នុងពិធីនោះ ឯកឧត្តមបណ្ឌិត អនុរដ្ឋលេខាធិការ បានគូសបញ្ជាក់ ថា ការសាង និងការអភិវឌ្ឍសមត្ថភាព គឺជាការងារអាទិភាពដែលត្រូវបានរាជរដ្ឋាភិបាលយកចិត្តទុកដាក់ខ្ពស់ ក្នុងគោលដៅលើកកម្ពស់ សមត្ថភាពជូនមន្ត្រីរាជការដែលទទួលមុខងារ តួនាទី ភារកិច្ចពាក់ព័ន្ធការគ្រប់គ្រង ហិរញ្ញវត្ថុសាធារណៈ ស្របពេលដែលច្បាប់ និងលិខិតបទដ្ឋាន គតិយុត្តពាក់ព័ន្ធនឹងកិច្ចលទ្ធកម្មសាធារណៈ ត្រូវបានធ្វើបច្ចុប្បន្នកម្ម និងដាក់អនុវត្តជាបន្តបន្ទាប់។ ក្រសួងសេដ្ឋកិច្ច និងហិរញ្ញវត្ថុ បានរៀបចំ និងអនុវត្តផែនការយុទ្ធសាស្ត្រ កសាង និងអភិវឌ្ឍសមត្ថភាព ក្នុងក្របខ័ណ្ឌកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ តាំងពីដំណាក់កាលទី១ មក សម្រាប់តម្រង់ទិសការបណ្ដុះបណ្ដាល និងវិក្រឹតការ ជូនមន្ត្រីអនុវត្តការងារហិរញ្ញវត្ថុសាធារណៈរបស់ក្រសួងស្ថាប័ន អង្គភាពសាធារណៈប្រហាក់ប្រហែល រដ្ឋបាលថ្នាក់ក្រោមជាតិ និងគ្រឹះស្ថានសាធារណៈរដ្ឋបាល សំដៅរួមចំណែកគាំទ្រនិងអនុវត្តការងារកែទម្រង់ការគ្រប់គ្រងហិរញ្ញវត្ថុសាធារណៈ ឱ្យសម្រេចជោគជ័យ នៅក្នុងដំណាក់កាលនីមួយៗ។ ផែនការយុទ្ធសាស្រ្តនេះ ត្រូវបានធ្វើបច្ចុប្បន្នកម្មជាបន្តបន្ទាប់ ទៅតាមតម្រូវការដែលឈានឡើងជាដំណាក់ៗ ស្របនឹងបរិបទប្រែប្រួលនៃការកែទម្រង់ការគ្រប់គ្រងហិរញ្ញវត្ថុសាធារណៈ និងបរិការណ៍ រួមនៃការអភិវឌ្ឍសង្គម-សេដ្ឋកិច្ច។

ទន្ទឹមនឹងនេះ ឯកឧត្តមបណ្ឌិតបានបន្ថែមថា បច្ចុប្បន្នការកែទម្រង់ការគ្រប់គ្រងហិរញ្ញវត្ថុសាធារណៈ កំពុងស្ថិតក្នុងដំណាក់កាលទី៤ ជាដំណាក់កាលចុងក្រោយ ក្នុងគោលដៅពង្រឹងគណនេយ្យភាពសមិទ្ធកម្ម។ ការណ៍នេះធ្វើឱ្យការកសាង និងការអភិវឌ្ឍសមត្ថភាពកាន់តែមានសារៈសំខាន់ថែមទៀត ព្រោះថាការកែទម្រង់នេះបានឈានដល់ដំណាក់កាលស្មុគស្មាញ ហើយសិទ្ធិអំណាច និងការទទួលខុសត្រូវកាន់តែច្រើនឡើង ត្រូវបានផ្ទេរ ឱ្យក្រសួងស្ថាប័ននិងមន្ទីរអង្គភាពក្រោមឱវាទ និង រដ្ឋបាលថ្នាក់ក្រោមជាតិ។ ទន្ទឹមនេះ ប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ (FMIS) ក៏ត្រូវបានដាក់ឱ្យអនុវត្តនៅគ្រប់ក្រសួងស្ថាប័ន ដើម្បីជំរុញតម្លាភាព ប្រសិទ្ធភាព សង្គតិភាព ភាពត្រឹមត្រូវ ទាន់ពេលនៃព័ត៌មាននិងទិន្នន័យហិរញ្ញវត្ថុ សម្រាប់វិភាគ ព្យាករ និងធ្វើឱ្យការសម្រេចចិត្តកាន់តែមានប្រសិទ្ធភាពនិងគ្រប់ជ្រុងជ្រោយ។

ប្រព័ន្ធ FMIS ជាឧបករណ៍ដ៏សំខាន់សម្រាប់គាំទ្រការសម្រេចជោគជ័យ នៃការកែទម្រង់ការគ្រប់ គ្រង ហិរញ្ញវត្ថុសាធារណៈ។ ប្រព័ន្ធ FMIS បានក្លាយជាឧបករណ៍ស្នូលក្នុងការគ្រប់គ្រង ការរៀបចំ ការអនុវត្ត ការតាមដាន និងការត្រួតពិនិត្យលើការអនុវត្តចំណូល-ចំណាយថវិការដ្ឋ ជាពិសេសមុខងារ អនុវត្ត កិច្ចលទ្ធកម្មសាធារណៈពេញលេញ ត្រូវបានដាក់បញ្ចូលក្នុងប្រព័ន្ធ FMIS និងកំពុងអនុវត្តនៅតាមក្រសួងស្ថាប័ន និងគ្រឹះស្ថានសាធារណៈរដ្ឋបាលមួយចំនួនផងដែរ។ ការណ៍នេះ ឆ្លុះឱ្យឃើញពីសារៈសំខាន់ និងភាពចាំបាច់នៃវគ្គបណ្តុះបណ្តាល និងវិក្រឹតការជាស៊េរីលើ “វិធាន និងបទប្បញ្ញត្តិលទ្ធកម្មសាធារណៈ” ថាពិតជាឆ្លើយតបនឹងតម្រូវការជាក់ស្ដែង របស់ស្ថាប័នអនុវត្តលទ្ធកម្មនៃក្រុង ស្រុក ខណ្ឌ ក្នុងការអនុវត្តកិច្ចលទ្ធកម្មសាធារណៈ សំដៅរួមចំណែកគាំទ្រ និងអនុវត្តការកែទម្រង់ ការគ្រប់គ្រង ហិរញ្ញវត្ថុសាធារណៈឱ្យសម្រេចជោគជ័យ ដើម្បីធានាប្រសិទ្ធភាព តម្លាភាព និងសង្គតិភាពនៃការគ្រប់គ្រងថវិការដ្ឋ សម្រាប់ការអភិវឌ្ឍសង្គម-សេដ្ឋកិច្ចជាតិ និង ការបម្រើសេវាសាធារណៈជូនប្រជាពលរដ្ឋ៕

ដោយ  ទូច វលក័្ខណ