AKP ភ្នំពេញ ថ្ងៃទី២៧ ខែឧសភា ឆ្នាំ២០២៥ -- គ្រូឧទ្ទេសនៃកម្មវិធីសាលារៀនជំនាន់ថ្មីនៃវិទ្យាល័យព្រះស៊ីសុវត្ថិ និងវិទ្យាល័យព្រែកលាប បានសហការជាមួយគណៈគ្រប់គ្រងនៃវិទ្យាស្ថានជាតិអប់រំ (NIE) វិទ្យាស្ថានគរុកោសល្យរាជធានីភ្នំពេញ (PTEC) និងវិទ្យាស្ថានគរុកោសល្យបាត់ដំបង (BTEC) បានធ្វើការចែករំលែកបទពិសោធន៍ និងបំពេញបន្ថែមនូវវិធីសាស្រ្តបង្រៀននៅកម្មវិធីសាលារៀនជំនាន់ថ្មីជាលក្ខណៈប្រតិបត្តិជាក់ស្តែង ជូនដល់គរុសិស្ស-និស្សិត ដែលការបណ្តុះបណ្តាលនេះមានលក្ខណៈពិសេស ដោយផ្តោតលើការពិភាក្សា និងពិគ្រោះយោបល់លើបញ្ហាជាក់ស្តែងក្នុងការប្រតិបត្តិវិជ្ជាគរុកោសល្យ វិធីសាស្រ្តបង្រៀន និងយុទ្ធវិធីបង្រៀន ការបង្កើតសហគមន៍សិក្សាវិជ្ជាជីវៈ និងការបំពេញបន្ថែមទៅលើការសិក្សាទ្រឹស្តី។

កម្មវិធីបណ្តុះបណ្តាលនេះបានចងក្រងជាឧត្តមានុវត្តន៍នៃការអនុវត្តវិធីសាស្រ្តបង្រៀននៅកម្មវិធីសាលារៀនជំនាន់ថ្មីជាកញ្ចប់ធនធានសិក្សាចំនួន៤ រួមមាន៖ ១) វិធីសាស្រ្តបង្រៀនថ្មីតាមទ្រឹស្តីស្ថាបនានិយម និងការដឹកនាំថ្នាក់រៀន បន្ទប់ពិសោធន៍ និងសកម្មភាពរៀនសកម្ម។ ២) បច្ចេកវិទ្យាអប់រំ ការអប់រំឌីជីថល និងការប្រើប្រាស់បញ្ញាសិប្បនិម្មិត។ ៣) ការដឹកនាំការសិក្សាគម្រោង និងការរៀបចំពិព័រណ៍ស្នាដៃស្រាវជ្រាវរបស់សិស្ស និង ៤) ការស្រាវជ្រាវប្រតិបត្តិគាំទ្រដល់ការសិក្សាស៊ីជម្រៅផ្នែកគរុកោសល្យ៕

ដោយ៖ ចាន់ សុភឿន (ប្រភព៖ ក្រសួងអប់រំ)