AKP ប៉េកាំង ថ្ងៃទី២៧ ខែឧសភា ឆ្នាំ២០២៥ -- ក្នុងអំឡុងពេលនៃព្រឹត្តិការណ៍ផ្លាស់ប្តូរនៃប្រព័ន្ធផ្សព្វផ្សាយសកលលោកភាគខាងត្បូងនៅក្នុងទីក្រុងប៉េកាំង ហើយបានចេញផ្សាយជាផ្លូវការនូវរបាយការណ៍អភិវឌ្ឍន៍ប្រព័ន្ធផ្សព្វផ្សាយវីដេអូសកលលោកឆ្នាំ២០២៤ កាលពីថ្ងៃទី២៣ ខែឧសភាឆ្នាំ២០២៥ នៅទីក្រុងប៉េកាំង អ្នកតំណាងនៃបណ្ឌិត្យសភា និងឧស្សាហកម្មបានពិភាក្សាគ្នាស៊ីជម្រៅទៅលើបញ្ហាមួយចំនួន ដូចជាការរួមគ្នាប្រាប់រឿងរ៉ាវនៃការអភិវឌ្ឍប្រព័ន្ធផ្សព្វផ្សាយសកលលោកភាគខាងត្បូង និងការពង្រឹងកិច្ចសហប្រតិបត្តិការ និងការផ្លាស់ប្តូរទៅវិញទៅមកនៃប្រព័ន្ធផ្សព្វផ្សាយ។

លោក ហ្ស៊ូ យ៉ុង (Zhou Yong) ព្រឹទ្ធបុរសនៃមហាវិទ្យាល័យសារព័ត៌មាននៃសាកលវិទ្យាល័យ Renmin របស់ប្រទេសចិន បាននិយាយថា របាយការណ៍អភិវឌ្ឍន៍ប្រព័ន្ធផ្សព្វផ្សាយវីដេអូសកលលោកឆ្នាំ២០២៤ ផ្តោតសំខាន់ទៅលើប្រធានបទនៃការអភិវឌ្ឍទូទៅសម្រាប់ប្រទេសទាំងអស់នៅភាគខាងត្បូងពិភពលោក ហើយឆ្លុះបញ្ចាំងពីតម្លៃស្នូល និងភារកិច្ចនៃឧស្សាហកម្មប្រព័ន្ធផ្សព្វផ្សាយ។ លោកជឿជាក់ថា សណ្តាប់ធ្នាប់មតិសាធារណៈជាសកលនាពេលបច្ចុប្បន្ននេះ គឺត្រូវការការផ្លាស់ប្តូរ ហើយការកែទម្រង់មតិសាធារណៈជាសកល ដែលជាតម្លៃមួយដ៏សំខាន់សម្រាប់ការអភិវឌ្ឍសង្គម និងបេសកកម្មរួមរបស់ប្រព័ន្ធផ្សព្វផ្សាយសកលលោកភាគខាងត្បូង។
 

លោកស្រី លុយ យីង (Liu Ying) ព្រឹទ្ធបុរសនៃមហាវិទ្យាល័យសារព័ត៌មានអន្តរជាតិ និងទំនាក់ទំនងនៃសាកលវិទ្យាល័យសិក្សាបរទេសប៉េកាំង បានចង្អុលបង្ហាញថា ការសិក្សាទៅលើគោលគំនិតនៃ «ការអភិវឌ្ឍសារព័ត៌មាន» មិនត្រឹមតែមានតម្លៃទ្រឹស្តីក្នុងការកសាងស្ថាប័នឯករាជ្យនៃចំណេះដឹងផ្នែកសារព័ត៌មាននៅក្នុងសកលលោកភាគខាងត្បូងប៉ុណ្ណោះទេ ប៉ុន្តែក៏មានសារសំខាន់ផងដែរក្នុងការដឹកនាំការរាយការណ៍ឯករាជ្យ និងការទំនាក់ទំនងព័ត៌មានថ្មីៗក្នុងពិភពលោក។ លោកស្រីបាននិយាយថា រាប់ចាប់តាំងពីការផ្លាស់ប្តូរនៃការរីករាលដាលជាអន្តរជាតិនៃសកលលោកខាងត្បូងរហូតដល់ការបង្កើតសហគមន៍ទំនាក់ទំនង និងរឿងរ៉ាវនៃការអភិវឌ្ឍន៍រួម របាយការណ៍នេះបានបង្កើតនូវគំរូថ្មីនៃការស្រាវជ្រាវប្រព័ន្ធផ្សព្វផ្សាយ និងស្តង់ដារវាយតម្លៃប្រព័ន្ធផ្សព្វផ្សាយរួមគ្នា ដែលត្រូវបានដឹកនាំ និងបង្កើតឡើងដោយប្រព័ន្ធផ្សព្វផ្សាយនៃសកលលោកភាគខាងត្បូង។

នៅក្នងនោះដែរ លោកសាស្ត្រាចារ្យ ជី ដេឈាង (Ji Deqiang) នាយករងនៃវិទ្យាស្ថានស្រាវជ្រាវរួមនៃការផ្សព្វផ្សាយអន្តរជាតិនៃក្រសួងអប់រំនៃសាកលវិទ្យាល័យទំនាក់ទំនងរបស់ប្រទេសចិន បាននិយាយឱ្យដងថា របាយការណ៍នេះផ្តោតសំខាន់ទៅលើអត្តសញ្ញាណសមូហភាពនៃបណ្តាប្រទេសនៃភាគខាងត្បូងសកលលោកក្នុងការប្រឈមមុខនឹងការផ្លាស់ប្តូរពិភពលោក ផ្តោតទៅលើការតភ្ជាប់ និងស្វ័យភាពក្នុងចំណោមប្រព័ន្ធផ្សព្វផ្សាយនៃភាគខាងត្បូងសកលលោក និងផ្តល់នូវវេទិកាបើកចំហសម្រាប់ការចែករំលែក និងការប្រាស្រ័យទាក់ទងក្នុងចំណោមប្រព័ន្ធផ្សព្វផ្សាយនៅសកលលោកភាគខាងត្បូង។ លោកបាននិយាយថា ប្រព័ន្ធផ្សព្វផ្សាយសកលលោកភាគខាងត្បូង គួរតែបន្តសង្កត់ធ្ងន់ទៅលើស្វ័យភាព និងឯករាជ្យភាពក្នុងការរាយការណ៍ព័ត៌មាន បង្កើតរបៀបវារៈប្រព័ន្ធផ្សព្វផ្សាយថ្មីដែលឆ្លើយតបទៅនឹងតម្រូវការក្នុងស្រុក ធ្វើការងារដើម្បីបង្កើនការរួមបញ្ចូល និងភាពចម្រុះនៃបរិយាកាសប្រព័ន្ធផ្សព្វផ្សាយពិភពលោក៕

ដោយ៖ យា ចិន្តាខន្តី