AKP ប៉េកាំង ថ្ងៃទី២៧ ខែឧសភា ឆ្នាំ២០២៥ -- ទីភ្នាក់ងារសារព័ត៌មានវីដេអូអន្តរជាតិនៃទូរទស្សន៍កណ្តាលចិន (CCTV+) និងមជ្ឈមណ្ឌលផ្លាស់ប្តូរសារព័ត៌មានអន្តរជាតិចិន បានរៀបចំព្រឹត្តិការណ៍ផ្លាស់ប្តូរនៃប្រព័ន្ធផ្សព្វផ្សាយសកលលោកភាគខាងត្បូងនៅក្នុងទីក្រុងប៉េកាំង ហើយបានចេញផ្សាយជាផ្លូវការនូវរបាយការណ៍អភិវឌ្ឍន៍ប្រព័ន្ធផ្សព្វផ្សាយវីដេអូសកលលោកឆ្នាំ២០២៤ កាលពីថ្ងៃទី២៣ ខែឧសភា ឆ្នាំ២០២៥។ ទីភ្នាក់ងារសារព័ត៌មានវិទ្យុវីដេអូអន្តរជាតិចិន មជ្ឈមណ្ឌលអ៊ីស្រាអែលអេបស្ទែនសម្រាប់ការសិក្សាទំនាក់ទំនងបរទេសនៃសាកលវិទ្យាល័យ Tsinghua បណ្តាអ្នកជំនាញផ្សព្វផ្សាយអន្តរជាតិមកពីសាកលវិទ្យាល័យ Renmin នៃប្រទេសចិន សាកលវិទ្យាល័យទំនាក់ទំនងនៃប្រទេសចិន និងសាកលវិទ្យាល័យសិក្សាបរទេសប៉េកាំង ព្រមទាំងអ្នកតំណាងប្រព័ន្ធផ្សព្វផ្សាយអន្តរជាតិចំនួន ៣៥នាក់មកពី ២៩ប្រទេសក្នុងតំបន់ការ៉ាបៀន អាហ្រ្វិក អាម៉េរិកខាងត្បូង និងអាស៊ីប៉ាស៊ីហ្វិក បានចូលរួមក្នុងព្រឹត្តិការណ៍នេះដើម្បីពិភាក្សាអំពីរបៀបដែលប្រព័ន្ធផ្សព្វផ្សាយសកលលោកភាគខាងត្បូងអាចនិយាយអំពីរឿងរ៉ាវអភិវឌ្ឍន៍របស់ពួកគេ ធ្វើឱ្យកាន់តែស៊ីជម្រៅនូវកិច្ចសហប្រតិបត្តិការ និងការផ្លាស់ប្តូររវាងប្រជាជន និងប្រជាជន និងប្រមូលផ្តុំកម្លាំងដ៏មានឥទ្ធិពលនៃសកលលោកភាគខាងត្បូងដើម្បីរួមគ្នាលើកកម្ពស់ការកសាងសហគមន៍ដែលមានអនាគតរួមគ្នាសម្រាប់មនុស្សជាតិ។
 

យោងតាមលោក ស៊ី​ អានប៊ីន (Shi Anbin) លេខាបក្សកុម្មុយនិស្តនៃសាលាសារព័ត៌មាន និងទំនាក់ទំនងនៃសាកលវិទ្យាល័យ Tsinghua និងជានាយកមជ្ឈមណ្ឌលអ៊ីស្រាអែលអេបស្ទែនសម្រាប់ការសិក្សាទំនាក់ទំនងបរទេស បានឱ្យដឹងថា ចាប់តាំងពីឆ្នាំ២០២២ មក ទីភ្នាក់ងារសារព័ត៌មានវីដេអូអន្តរជាតិរបស់ទូរទស្សន៍ CCTV+ បានរៀបចំរួមគ្នានូវរបាយការណ៍អភិវឌ្ឍន៍ប្រព័ន្ធផ្សព្វផ្សាយវីដេអូសកលលោកភាគខាងត្បូង ជាមួយមជ្ឈមណ្ឌលអ៊ីស្រាអែលអេបស្ទែនសម្រាប់ការសិក្សាទំនាក់ទំនងបរទេសនៃសាកលវិទ្យាល័យ Tsinghua។ របាយការណ៍ប្រចាំឆ្នាំបច្ចុប្បន្នសម្រាប់ឆ្នាំ២០២៤ ត្រូវបានរៀបចំធ្វើឡើងដោយយោងទៅលើចក្ខុវិស័យនៃសហគមន៍ដែលមានអនាគតរួមគ្នាសម្រាប់មនុស្សជាតិ និងគំនិតផ្តួចផ្តើមសំខាន់ៗចំនួនបីសម្រាប់ការអភិវឌ្ឍពិភពលោក សន្តិសុខ និងអរិយធម៌ស្របតាមគោលដៅអភិវឌ្ឍន៍ប្រកបដោយនិរន្តរភាពរបស់អង្គការសហប្រជាជាតិ និងការប្រើក្របខ័ណ្ឌទ្រឹស្តីដូចជា «ការអភិវឌ្ឍសារព័ត៌មាន» ហើយប្រើប្រធានបទស្តីពី «ការប្រាប់រឿងអភិវឌ្ឍន៍ជាមួយគ្នា»។ ទាក់ទងទៅនឹងតម្លៃនៃបទពិសោធន៍ជាក់ស្តែង និងបញ្ហាប្រឈមដ៏លំបាកនៃ យើងបានធ្វើការសម្ភាសន៍យ៉ាងស៊ីជម្រៅជាមួយអ្នកតំណាងប្រព័ន្ធផ្សព្វផ្សាយនៅភាគខាងត្បូងទូទាំងពិភពលោកជាង ២០នាក់ និងអង្គការប្រព័ន្ធផ្សព្វផ្សាយអន្តរជាតិ ដើម្បីប្រមូលព័ត៌មាន និងករណីសិក្សានៃការរាយការណ៍អំពីការអភិវឌ្ឍ និងបានអញ្ជើញតំណាងប្រព័ន្ធផ្សព្វផ្សាយឱ្យសរសេរអត្ថបទអំពីបញ្ហាអភិវឌ្ឍន៍ទាំងនោះ។ តាមរយៈការពិនិត្យមើលឡើងវិញនូវអត្ថន័យនៃ «ការអភិវឌ្ឍ» ពីទស្សនៈរបស់សកលលោកភាគខាងត្បូង បានវិភាគអំពីរបៀបដែលប្រព័ន្ធផ្សព្វផ្សាយវីដេអូសកលលោកភាគខាងត្បូងបង្កើតការនិទានរឿងព័ត៌មានអំពីការអភិវឌ្ឍ និងស្វែងយល់ពីរបៀបដែលប្រព័ន្ធផ្សព្វផ្សាយវីដេអូសកលលោកភាគខាងត្បូងរួមចំណែកដល់ដំណើរការអភិវឌ្ឍន៍ជាតិ និងតំបន់តាមរយៈសកម្មភាពរបស់ពួកគេ ដើម្បីលើកកម្ពស់បណ្តាប្រទេសចូលរួមគំនិតផ្តួចផ្តើមខ្សែក្រវ៉ាត់ និងផ្លូវ និងធ្វើឱ្យកាន់តែស៊ីជម្រៅនូវកិច្ចសហប្រតិបត្តិការនៃប្រព័ន្ធផ្សព្វផ្សាយសកលលោកភាគខាងត្បូងក្នុងការជំរុញការផ្លាស់ប្តូរ និងការរៀនសូត្រទៅវិញទៅមករវាងអរិយធម៌ ពង្រីកគំរូនៃការផ្សព្វផ្សាយអន្តរជាតិ និងរួមចំណែកដល់ការកសាងអភិវឌ្ឍន៍សកលលោកប្រកបដោយសមភាព និងសមធម៌។

លោក​បាន​ចង្អុល​បង្ហាញ​ថា នៅ​ចំពោះ​មុខ​ការ​ផ្លាស់​ប្តូរ​យ៉ាង​ស៊ី​ជម្រៅ​នៃ​ប្រព័ន្ធ​កិច្ច​សហប្រតិបត្តិការ​អភិវឌ្ឍន៍​ពិភពលោក ការ​រួម​គ្នា​ប្រាប់អំ​ពី​ដំណើរ​រឿង​នៃ​ការ​អភិវឌ្ឍ​នៃ​សកល​លោកភាគ​ខាង​ត្បូង ​គឺ​មាន​ទស្សនវិស័យ និង​មាន​សារៈសំខាន់​យ៉ាង​ខ្លាំង។ ប្រព័ន្ធផ្សព្វផ្សាយសកលលោកភាគខាងត្បូងត្រូវរៀបចំបន្ថែមនូវការសរសេរអត្ថបទអភិវឌ្ឍន៍ ការនិទានរឿងតាមរយៈនវានុវត្តន៍បច្ចេកវិទ្យា កិច្ចសហប្រតិបត្តិការកាន់តែស៊ីជម្រៅ និងការសម្របសម្រួលគោលនយោបាយ។ យើងគួរតែបង្កើតគំនិតអភិវឌ្ឍន៍ថ្មី តម្រង់ទៅរកការអភិវឌ្ឍដែលមានគុណភាពខ្ពស់ ផលិតភាពគុណភាពថ្មី និងសុវត្ថិភាពនៃការអភិវឌ្ឍ ហើយប្រើប្រាស់ការផ្សាយព័ត៌មានដែលមានគុណភាពខ្ពស់ដើម្បីលើកកម្ពស់ការអភិវឌ្ឍប្រកបដោយគុណភាពខ្ពស់ និងនិរន្តរភាពនៅក្នុងបណ្តាប្រទេសនៃសកលលោកភាគខាងត្បូង៕

ដោយ៖ យា ចិន្តាខន្តី