AKP កំពង់ស្ពឺ ថ្ងៃទី២៦ ខែ ឧសភា ឆ្នាំ ២០២៥--

បន្ទាប់ពីបើកការដ្ឋានសាងសង់ផ្លូវចូលទៅកាន់ភ្នំខ្នងផ្សារ ជាទីកម្សាន្តដ៏ល្បីឈ្មោះនៅក្នុងខេត្តកំពង់ស្ពឺដែលបានប្រព្រឹត្តទៅនៅភូមិតាំងបំពង់ ឃុំតាសាល ស្រុកឱរ៉ាល់ ខេត្តកំពង់ស្ពឺ កាលពីថ្ងៃទី១៦ ខែឧសភា ឆ្នាំ២០២៥ កន្លងទៅ ដែលមិនត្រឹមតែអំណោយផលយ៉ាងល្អក្នុងការធ្វើដំណើររបស់ពលរដ្ឋនោះទេ តែផ្លូវមួយខ្សែនេះក៏នឹងជួយបម្រើលើវិស័យទេសចរណ៍យ៉ាងសំខាន់ក្នុងការរកចំណូលសម្រាប់ពួកគាត់ទៀតផង។

ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថានបានថ្លែងថា ហេដ្ឋារចនាសម្ព័ន្ធទាំងនេះនឹងត្រូវផ្តល់ជូនសហគមន៍មូលដ្ឋានធ្វើការគ្រប់គ្រង ដើម្បីលើកកម្ពស់ជីវភាពគ្រួសារ និងប្រែក្លាយសហគមន៍ឱ្យទៅជាសហគ្រិន ដែលជាការប្តូរពីការពឹងផ្អែកលើការកាប់ឈើ និងបរបាញ់សត្វព្រៃខុសច្បាប់ មកចូលរួមចំណែកកាន់តែប្រសើរ ក្នុងការការពារ និងអភិរក្សធនធានធម្មជាតិ។ ឯកឧត្តមរដ្ឋមន្រ្ដីបានមានប្រសាសន៍ថា ក្រៅពីកសាងផ្លូវដ៏សំខាន់មួយនេះ រាជរដ្ឋាភិបាលកម្ពុជាក៏បានប្រកាសពីការកសាងហេដ្ឋារចនាសម្ព័ន្ធជាច្រើនទៀតដូចជាគម្រោងរៀបចំកន្លែង មណ្ឌលព័ត៌មាន មណ្ឌលសង្រ្គោះបន្ទាន់ ហាងកាហ្វេ គឺមិនបានប្រើអគ្គិសនីទេពោលគឺប្រើប្រព័ន្ធពន្លឺព្រះអាទិត្យដើម្បីមិនបង្កឱ្យប៉ះពាល់ដល់បរិស្ថាន ហើយបានផ្តល់ផលល្អដល់ប្រជាសហគមន៍ដោយមិនចាំបាច់ចំណាយថវិកាថែមទៀត។

តាមរយៈការបើកការដ្ឋានសាងសង់ផ្លូវនេះដែរ ប្រជាពលរដ្ឋ បានបង្ហាញការអបអរសាទរ និងសប្បាយចិត្តយ៉ាងខ្លាំង ដោយសង្ឃឹមជឿជាក់ថា នឹងជួយឱ្យទាំងការរស់នៅ និងជីវភាពល្អប្រសើរតាមរយៈមធ្យោបាយទំនាក់ទំនងកាន់តែប្រសើរមួយនេះឯង ដែលពួកគាត់ប្រាថ្នាចង់បានយូរណាស់មកហើយ។

អ្នកស្រី ឈៀង ថុន ប្រជាសហគមន៍តំបន់ការពារធម្មជាតិរលាក់កងជើងបានលើកឡើងដោយក្តីរីករាយពេលកំពុងឈរមើលគ្រឿងចក្រកំពុងចាប់ផ្តើមសាងសង់ផ្លូវមុខផ្ទះរបស់គាត់នេះថា ពិតជាធ្វើឱ្យអ្នកស្រីរំភើបណាស់ពីព្រោះថាចាប់ពីពេលនេះទៅអ្នកស្រី និងបងប្អូនក្នុងភូមិមានផ្លូវល្អធ្វើដំណើរហើយ។ ក្រៅពីអ្នកភូមិមានផ្លូវនេះដែរ អ្នកស្រីក៏សង្ឃឹមថា នឹងមានអ្នកទេសចរចូលមកកម្សាន្តនៅភ្នំខ្នងផ្សារច្រើនដែរ ដែលនេះជាការអំណោយផលល្អសម្រាប់សហគមន៍ ហើយអ្នកស្រីក៏អាចរកចំណូលសម្រាប់ជីវភាពគ្រួសារ។

ជាមួយគ្នានេះ អ្នកស្រី ផាន ស៊ឺន ស្រ្តីមួយរូបទៀតដែលរស់នៅក្នុងតំបន់នោះក៏បានបង្ហាញក្តីរីករាយថា អ្នកស្រុកដែលរស់នៅតំបន់ដាច់ស្រយាលធ្លាប់តែពឹងផ្អែកលើវិស័យកសិកម្មភាគច្រើន ពេលនេះអាចជួយឱ្យពួកគាត់អាចរកចំណូលមួយបន្ថែមទៀតគឺបម្រើលើវិស័យទេសចរណ៍ ពិសេសអ្នកស្រីជាអ្នកលក់ដូរនៅតាមដងផ្លូវកន្លែងនេះអាចជួយឱ្យរកចំណូលសម្រាប់គ្រួសារជារៀងរាល់ថ្ងៃ។ សម្រាប់ស្រ្តីរូបនេះនិយាយបញ្ជាក់ថា តំបន់ទេសចរណ៍ខ្នងផ្សារជាទីកន្លែងកម្សាន្តបែបធម្មជាតិដ៏ស្រស់ស្អាត ផ្តល់ក្តីសប្បាយរីករាយជាមួយទេសភាពព្រៃភ្នំ ទស្សនាថ្ងៃរះ ថ្ងៃលិច ស្តាប់សត្វយំ មានកន្លែងបោះតង់ ជាមួយអាកាសធាតុដ៏ត្រជាក់នាពេលរាត្រី។ អ្នកស្រីបានបន្ថែមថា៖ «តំបន់នេះគឺពិតជាបានទាក់ទាញដល់អ្នកទេសចរមិនថាកម្ពុជាទេ សូម្បីតែបរទេសតែងចូលកម្សាន្តឥតសូវដាច់សោះឡើយ»។

ចំណែកលោក ភិន គន់ ជាពលរដ្ឋមួយរូបទៀតបាននិយាយថា៖ «ពលរដ្ឋពិតជារីករាយខ្លាំងណាស់នៅពេលរាជរដ្ឋាភិបាលបានកសាងផ្លូវតំបន់នេះពីព្រោះថាម្នាក់ៗចង់បានផ្លូវខ្លាំងណាស់ពីព្រោះថាកាលណាមានផ្លូវធ្វើឱ្យ​មាន​អ្នកទេសចរ ហើយម្នាក់ៗមានប្រាក់ចំណូល។ សម្រាប់ពួកខ្ញុំឱ្យតែបានផ្លូវទោះពង្រីកផ្លូវប៉ុនណាក៏ពួកខ្ញុំមិនជំទាស់ដែរ មានតែការរីករាយសប្បាយចិត្ត»។

ពាក់ព័ន្ធនឹងការសាងសង់ផ្លូវចូលទៅកាន់តំបន់ភ្នំខ្នងផ្សារនេះដែរ អ្នកស្រី សៅ ស៊ឺន ជាសមាជិកសហគមន៍តំបន់ការពារធម្មជាតិរលាក់កងជើងបានប្រាប់ឱ្យដឹងថា នៅពេលផ្លូវស្អាតសង្ឃឹមថាអ្នកទេសចនឹងចូលកម្សាន្តកាន់តែច្រើនបន្ថែមទៀត ដែលពេលនោះហើយគឺជីវភាពប្រជាសហគមន៍ល្អប្រើសើរ ហើយនេះក៏ជាក្តីបំណងពលរដ្ឋតែងសង្ឃឹមទុកជាយូរមកហើយដែរ។

ចំពោះលោក ហ៊ុន សៅ ប្រធានសហគមន៍តំបន់ការពារធម្មជាតិរលាក់កងជើងបានលើកឡើងថា សម្រាប់ពលរដ្ឋពិតជារីករាយខ្លាំងណាស់ពីព្រោះថាផ្លូវប្រៀបដូចជាសរសៃឈាម ម្ល៉ោះហើយធ្វើឱ្យពួកគាត់អាចធ្វើដំណើរទៅកាន់កន្លែងដទៃទៀតមិនជួបការលំបាកដូចកាលពីមុនទៀត។ លោកបន្ដថា សម្រាប់អ្នកនៅតំបន់ដទៃទៀតក៏អាចទំនាក់ទំនងមកកាន់តំបន់ខ្នងផ្សារនេះឥតជួបការលំបាកទៀតឡើយ ពិសេសអ្នកទេសចរតែម្តងគេអាចធ្វើដំណើកម្សាន្តមកទីកន្លែងនេះកាន់តែច្រើនឡើង។

ក្នុងឱកាសនោះ ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថានបានគូសបញ្ជាក់ថា នាពេលនេះក្រសួងកំពុងសិក្សាពីការធ្វើផ្លូវចាក់បេតុងពីជើងភ្នំឡើងដល់ដំណាក់ដានព្រះ ដោយក្នុងនេះ នៅជើងភ្នំនឹងសាងសង់មណ្ឌលព័ត៌មានមួយកន្លែង មណ្ឌលសង្រ្គោះបន្ទាន់មួយ បន្ទប់ទឹក ច្រកផ្លូវត្រឹមត្រូវ មានចំណតរថយន្ត ចំណតម៉ូតូ ដោយទុកឱ្យសហគមន៍គ្រប់គ្រង និងរកចំណូលសម្រាប់សហគមន៍ផ្ទាល់នៅទីនោះតែម្តង។ ឯកឧត្ដមបញ្ជាក់ថា ក្រៅពីនេះក៏មានហាងកាហ្វេមួយកន្លែងទៀតដោយក្រសួងនឹងជួយទិញទាំងម៉ាស៊ីនកិនកាហ្វេ បង្រៀនវិធីសាស្រ្តឆុងកាហ្វេដល់ប្រជាសហគមន៍សម្រាប់រកចំណូលដោយខ្លួនឯង។

បើតាមឯកឧត្តមបណ្ឌិត អ៊ាង សុផល្លែត គម្រោងនេះ មានន័យលើសពីការសាងសង់ផ្លូវ និងសំណង់ស្ថាបត្យកម្ម ពីព្រោះស្ថាបត្យកម្មនេះ កើតចេញពីការប្តេជ្ញាចិត្តដ៏ខ្ពស់ និងពេញដោយក្តីស្រឡាញ់ គិតគូរពីសុខទុក្ខរបស់ប្រជាសហគមន៍តំបន់ការពារធម្មជាតិទេទឹកពុះ និងភ្នំខ្នងផ្សារ ពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងឱកាសបំពេញទស្សនកិច្ចនៅតំបន់ ភ្នំខ្នងផ្សារកាលពីថ្ងៃទី០៨ ខែមីនា ឆ្នាំ២០២៥ កន្លងទៅនេះ ដើម្បីទទួលយកនូវព័ត៌មានផ្ទាល់ពីសហគមន៍ និងពិនិត្យពីសក្តានុពលនៃតំបន់។

ឯកឧត្ដមរដ្ឋមន្រ្ដីក្រសួងបរិស្ថានបានបញ្ជាក់បន្ថែមថា៖ «ការចាប់ផ្តើមអនុវត្តគម្រោងនេះ គឺពិតជាចូលរួមបង្កើតអនាគតថ្មី ហើយប្រជាសហគមន៍មូលដ្ឋាន ក៏បានចូលរួមការពារនិងអភិរក្សធនធានធម្មជាតិ បានកាន់តែប្រសើរ តាមរយៈការអភិវឌ្ឍហេដ្ឋារចនាសម្ព័ន្ធ និងសម្បទាបម្រើឱ្យការទាក់ទាញទេសចរ នៃតំបន់ដែលមានសក្តានុពលគោលដៅលំហែបៃតង នៃឧទ្យានជាតិជួរភ្នំក្រវាញ ក្នុងភូមិសាស្ត្រខេត្តកំពង់ស្ពឺ និងខេត្តកោះកុង»។

សូមជម្រាបជូនថា ក្នុងពិធីសម្ពោធបើកការដ្ឋានសាងសង់ផ្លូវចូលទៅភ្នំខ្នងផ្សារ និងសាងសង់ហេដ្ឋារចនាសម្ព័ន្ធបម្រើឱ្យគោលដៅលម្ហែបៃតងតំបន់ភ្នំខ្នងផ្សារ នាពេលនេះ រួមមាន ផ្លូវក្រាលគ្រោះក្រហម (កាលថ្មម៉ិច) ប្រវែង ៧,២ គីឡូម៉ែត្រ ទទឹងប្រវែង៨ម៉ែត្រ ចាប់ពីផ្លូវលេខ៤៨.៤ ដល់ជើងភ្នំឡើងតំបន់ខ្នងផ្សារ  និងការបើកសម្ពោធផ្លូវឡើងភ្នំខ្នងផ្សារ និងការសម្ពោធបើកការសាងសង់ផ្លូវថ្មើជើងឡើងតំបន់ខ្នងផ្សារ ចាប់ពីចំណុចជើងភ្នំ ដល់ដំណាក់ដានព្រះ ចំងាយប្រមាណ ៤គីឡូម៉ែត្រ ដែលក្នុងនោះក្រសួងបរិស្ថាន មានគម្រោងរៀបចំកន្លែងសម្រាកជាដំណាក់ៗ ដែលមានដើមឈើហូបផ្លែ និងឈើព្រៃផ្តល់ម្លប់និងអាចអ្នកទេសចរណ៍ បានសម្រាកផង និងអាចទទួលទានផងដែរ ក្នុងនោះគម្រោងរបស់ក្រសួងបរិស្ថាន និងផ្តល់ជូនដល់អ្នកទេសចរណ៍លេងភ្នំខ្នងផ្សារ បានពិសាទឹកស្អាត ដែលចម្រោះចេញពីទឹកធម្មជាតិ ប្រភពពីលើភ្នំ ដល់កន្លែងសម្រាក ជាមួយការដាក់ស្លាកព័ត៌មានដែលបង្ហាញពីចម្ងាយផ្លូវ និងការបញ្ចេញថាមពលរបស់អ្នកឡើងភ្នំ នៅតាមកន្លែងសម្រាកនីមួយៗឆ្ពោះទៅភ្នំខ្នងផ្សារថែមទៀត៕

ដោយ៖ ដេប៉ូ និង រិទ្ធី