AKP ភ្នំពេញ ថ្ងៃទី២៦ ខែឧសភា ឆ្នាំ២០២៥

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានបានថ្លែងបញ្ជាក់ថា មហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មាន ឆ្នាំ២០២៥នេះ មិនមែនគ្រាន់តែជាការប្រកួតប្រជែងប៉ុណ្ណោះទេ ប៉ុន្ដែវាក៏ជាវេទិកាមួយសម្រាប់ ផ្តល់ឱកាសឱ្យសិស្សានុសិស្សបានបង្ហាញសមត្ថភាព និងបានជួបប្រាស្រ័យជាមួយមិត្តភក្តិថ្មីៗ ប្រកបដោយក្តីសប្បាយរីករាយ។ ការថ្លែងបញ្ជាក់របស់ឯកឧត្ដមរដ្ឋមន្រ្ដីបែបនេះ ក្នុងឱកាសអញ្ជើញជាអធិបតីបិទមហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មាន ឆ្នាំ២០២៥ ក្រោមប្រធានបទ «កុមារ៖ អនាគតយើង ការទទួលខុសត្រូវរបស់យើង» រួមជាមួយលោកជំទាវ ទុយ សិរីរតនៈ នេត្រ ភក្ត្រា ប្រធានកិត្តិយសសមាគមនារី     កម្ពុជា ដើម្បីសន្តិភាព និងអភិវឌ្ឍន៍ក្រសួងព័ត៌មាន នាព្រឹកថ្ងៃទី២៦ ខែឧសភា ឆ្នាំ២០២៥ នៅសាលចតុម្មុខមង្គល   ទីស្តីការក្រសួង។

ឯកឧត្តម នេត្រ ភក្ត្រា បានគូសបញ្ជាក់ថា មហោស្រពតន្ត្រី គឺជាព្រឹត្តិការណ៍មួយសម្រាប់ក្មួយៗកុមារដែលមានអាយុចន្លោះពី ៨ ទៅ ១៣ឆ្នាំ អាចស្វែងយល់អំពីចំណង់ចំណូលចិត្តសិល្បៈរបស់ខ្លួន និងអភិវឌ្ឍន៍ទំនុកចិត្តក្នុងការបញ្ចេញមតិរបស់ពួកគេតាមរយៈបទចម្រៀង។ ឯកឧត្តមជឿជាក់យ៉ាងមុតមាំលើឥទ្ធិពលនៃសិល្បៈក្នុងការបញ្ជ្រាបកាអប់រំយ៉ាងមានប្រសិទ្ធភាព។ ឯកឧត្តមរដ្ឋមន្ត្រីបានការកោតសរសើរ និងថ្លែងអំណរគុណចំពោះការគាំទ្រដ៏ធំធេងពីសំណាក់ លោកគ្រូ អ្នកគ្រូ មាតា បិតា អាណាព្យាបាល និងសាលារៀនដែលបានបណ្តុះបណ្តាលទេពកោសល្យសិល្បៈវ័យក្មេងទាំងនេះ និងលើកទឹកចិត្តពួកគេឱ្យសម្រេចបាននូវសក្តានុពល និងដើរតាមក្តីស្រមៃរបស់ពួកគេ។

ក្នុងឱកាសនោះ ឯកឧត្តមរដ្ឋមន្រ្ដីបានបន្ថែមថា នៅពេលដែលក្មួយៗសិស្សានុសិស្ស ចាកចេញពីលើឆាកនេះនៅថ្ងៃនេះ សូមយកទៅជាមួយនូវអនុស្សាវរីយ៍ នៃការសម្តែងរបស់ក្មួយៗ ក៏ដូចជាទំនុកចិត្ត ដែលមានក្នុងការបំផុសគំនិតអ្នកដទៃតាមរយៈ សំនៀង និងសិល្បៈរបស់ក្មួយៗ ដែលជាការចូលរួមចំណែកវិជ្ជមានដល់សង្គមជាតិ ។

តាមរបាយការណ៍របស់លោកជំទាវ នង ធូក អនុរដ្ឋលេខាធិការក្រសួងព័ត៌មានបានឱ្យដឹងថា មហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មាន ឆ្នាំ២០២៥ ក្រោមប្រធានបទ «កុមារ៖ អនាគតយើង ការទទួលខុសត្រូវរបស់យើង» រៀបចំឡើងជាគំនិតផ្តួចផ្តើមរបស់ថ្នាក់ដឹកនាំក្រសួងព័ត៌មាន ដែលមានគោលបំណងបញ្ជ្រាបការអប់រំដ៏មានប្រសិទ្ធភាពដល់កុមារតាមរយៈវិស័យ សិល្បៈតន្ត្រីនិងចំរៀង និងផ្តល់វេទិកាដ៏សំខាន់ សម្រាប់កុមារដែលមានអាយុ ពី៨ ដល់១៣ឆ្នាំ ដើម្បីបង្ហាញសមត្ថភាពច្រៀង និងសម្ដែង ព្រមទាំងជំរុញការអភិវឌ្ឍទេពកោសល្យសិល្បៈ និងភាពក្លាហាន ជឿជាក់របស់ពួកគេ។ លោកជំទាវបានបន្ដថា មហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មាន បានចូលរួមចំណែកយ៉ាងសំខាន់ដល់ការលើកស្ទួយវប្បធម៌ដ៏ល្អផូរផង់ និងរស់ រវើករបស់កម្ពុជា និងផ្តល់ការកម្សាន្តដល់កុមារផងដែរ។

សូមជម្រាបជូនថា សម្រាប់ម្ចាស់ពានរង្វាន់ មហោស្រពតន្ត្រី និងចម្រៀងកុមារពានរង្វាន់ក្រសួងព័ត៌មាន ឆ្នាំ២០២៥ បានទៅលើក្រុមកុមារមកពីសាលាបឋមសិក្សា ព្រះនរោត្តម  ទទួលបានថវិកា ១០លានរៀល, ចំណាត់ថ្នាក់លេខ២ បានទៅលើ សាលាបឋមសិក្សា វត្តរាជបូណ៌ ទទួលបានថវិកា ៦លានរៀល, លេខ ៣ សាលាបឋមសិក្សា វត្តកោះ ទទួលបានថវិកា ៣លានរៀល, លេខ៤ សាលាបឋមសិក្សា មីគីវ៉េ ទទួលថវិកា ២លានរៀល, លេខ៥ សាលាបឋមសិក្សា គៀនឃ្លាំង ទទួលបានថវិកា ២លានរៀល។ ជាមួយនឹងការទទួលបានថវិកា សម្រាប់ចំណាត់ថ្នាក់លេខ ១ដល់ លេខ៥ ក៏ទទួលបានពានរង្វាន់ និងប្រកាសនីយប័ត្រ ផងដែរ ៕

ដោយ៖ រិទ្ធី, រូបថត៖  ខឹម សុវណ្ណារ៉ា