AKP កំពង់ធំ ថ្ងៃទី២៦ ខែឧសភា ឆ្នាំ២០២៥-- 

លោក សាយ គឹមឡម អភិបាលស្រុកស្ទោង បានអំពាវនាវដល់ពុទ្ធបរិស័ទសប្បុរសជនសូមជួយជាសម្ភារថវិកា និងសម្រាប់កែប្រែអភិវឌ្ឍស្តូបតម្កល់អដ្ឋិធាតុប្រជាពលរដ្ឋដែលបានបាត់បង់ជីវិតនៅក្នុងរបបអាវខ្មៅយង់ឃ្នងនៅវត្តទួលព្រះធាតុឱ្យក្លាយទៅជាបូជនីយដ្ឋានប្រវត្តិសាស្រ្ត និងទេសចរណ៍សម្រាប់យុវជនជំនាន់ក្រោយបានដឹងបានឃើញនូវអំពើអមនុស្សធម៌របស់បនប្រល័យពូជសាសន៍ប៉ុលពត ក៏ដូចជាចូលរួមអភិវឌ្ឍវត្តអារាមផងដែរ ក្នុងឱកាសអញ្ជើញជាអធិបតីភាពក្នុងពិធីកាត់ខ្សែបូសម្ពោធដាក់ឱ្យប្រើប្រាស់សមិទ្ធផលនានានៅក្នុងវត្តទួលព្រះធាតុ ហៅវត្តទួលភ្លង នៅភូមិសាមក្អោក ឃុំទ្រា ស្រុកស្ទោង ខេត្តកំពង់ធំ នាព្រឹកថ្ងៃទី២៦ ខែឧសភា ឆ្នាំ២០២៥។

ក្នុងឱកាសនោះ លោក សាយ គឹមឡម បានកោតសរសើរខ្ពស់នូវស្មារតីរួបរួមសាមគ្គីក្នុងនាមជាពុទ្ធសាសនិកជិតឆ្ងាយបានចូលរួមបច្ច័យ សម្ភារ ស្មារតីក្នុងការសហការកសាងនូវសមិទ្ធផលនានានៅក្នុងអារាមដ៏កំសត់មួយនេះ ដែលជាការរួមចំណែកយ៉ាងធំធេងក្នុងការអភិវឌ្ឍ និងថែរក្សាពុទ្ធសាសនាឱ្យបានស្ថិតស្ថេរគង់វង្សជាពិសេសធ្វើវត្តអារាមនេះកាន់តែរីកចម្រើនជាលំដាប់ពីមួយថ្ងៃទៅមួយថ្ងៃ និងបានថ្លែងអំណរព្រះគុណព្រះគ្រូចៅអធិការ លោកអាចារ្យ គណៈកម្មការវត្ត ដែលបានស្វះស្វែង កៀរគរ មូលធនបច្ច័យពីទីជិតឆ្ងាយមិនថាយប់ថ្ងៃដោយមិនខ្លាចនឿយហត់សម្រាប់អភិវឌ្ឍវត្តនេះប្រកបដោយស្មារតីទទួលខុសត្រូវខ្ពស់ ព្រមទាំង មានសាមគ្គីភាពគ្នាខ្ពស់ជាពិសេសការប្រើប្រាស់បច្ច័យធនធានប្រកបដោយតម្លាភាព និងគណនេយ្យភាព។

ទន្ទឹមនឹងនេះលោកអភិបាលស្រុកបានថ្លែងអំណរគុណនិងកោតសរសើរជាអនេកដល់ញាតិញោមពុទ្ធបរិស័ទជិតឆ្ងាយដែលបានចូលរួមសហការទាំងបច្ច័យ ធនធាន សម្ភារ កម្លាំងកាយចិត្ត ស្មារតីសព្វបែបយ៉ាងសម្រាប់ចូលរួមកសាងអភិវឌ្ឍន៍នូវសមិទ្ធផលនានានៅក្នុងវត្តទួលព្រះធាតុនេះ ដែលជាការចូលរួមយ៉ាងធំធេងជាមួយរាជរដ្ឋាភិបាលនិងគណៈកម្មការអាចារ្យវត្តក៏ដូចជាការសន្សំនូវបុញ្ញនិធិ សម្រាប់ជាតិនេះនិងអនាគតជាតិក៏ដូចជាទ្រទ្រង់ពុទ្ធសាសនាឱ្យគ្រប់៥០០០ព្រះវស្សា។

លោកអភិបាលស្រុកស្ទោងបានអំពាវនាវដល់ពុទ្ធបរិស័ទព្រមទាំងសប្បុរសជននានា សូមជួយជាសម្ភារ ថវិកា និងស្មារតីសម្រាប់កែប្រែនិងអភិវឌ្ឍ "ស្តូបតម្កល់អដ្ឋិធាតុ" ប្រជាពលរដ្ឋខ្មែរដែលបានបាត់បង់ជីវិតក្នុងរបបអាវខ្មៅយង់ឃ្នង នៅក្នុងវត្តទួលប្រធាតុនេះក្លាយទៅជាបូជនីយដ្ឋានប្រវត្តិសាស្ត្រ និងទេសចរណ៍សម្រាប់យុវជនជំនាន់ក្រោយបានដឹងបាននិងឃើញនូវអំពើដ៏អមនុស្សធម៌របស់បនប្រល័យពូជសាសន៍ប៉ុលពតក៏ដូចជាចូលរួមអភិវឌ្ឍវត្តអារាមួយនេះផងដែរ។

សូមបញ្ជាក់ថា លោកអភិបាលស្រុកស្ទោងកាត់ខ្សែបូសម្ពោធដាក់ឱ្យប្រើប្រាស់សមិទ្ធផលនានានៅក្នុងឱកាសនេះរួមមាន៖ ស្រះទឹក របង ដងទង់ ព្រមទាំងហេដ្ឋារចនាសម្ព័ន្ធ និងសមិទ្ធផលនានាជាច្រើនទៀតមានតម្លៃជិត៥០ម៉ឺនដុល្លារ។ ទន្ទឹមនឹងនេះ លោកអភិបាលស្រុក និងសហការីបានចូលបុណ្យនូវបច្ច័យចំនួន៧២ម៉ឺនរៀល និងសប្បុរសចូលរួមបានចំនួន៣លាន៥៧ម៉ឺនរៀលផងដែរ៕

ដោយ ស៊ុម វណ្ណា