AKP ភ្នំពេញ ថ្ងៃទី២៦ ខែឧសភា ឆ្នាំ២០២៥

ឯកឧត្ដម ឧត្តមសេនីយ៍ឯក នាក់ យុទ្ធា អគ្គលេខាធិការរង នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានលើកឡើងថា អង្គការសហប្រជាជាតិទទួលបន្ទុកគ្រឿងញៀន និងឧក្រឹដ្ឋកម្ម(UNODC) រួមទាំងកម្ពុជា និងប្រទេសមហាអនុតំបន់ទន្លេមេគង្គបានធ្វើទស្សនកិច្ចរួមគ្នាដើម្បីស្វែងយល់ និងវាយតម្លៃពីការចរាចរ ជួញដូរគ្រឿងញៀន និងសារធាតុគីមីផ្សំពីត្រីកោណមាសចូលក្នុងតំបន់។ ការលើកឡើងបែបនេះ ក្នុងខណ:ដែលឯកឧត្ដម ឧត្ដមសេនីយ៍ឯកបានដឹកនាំក្រុមការងារអញ្ជើញចូលរួមដំណើរទស្សនកិច្ចសិក្សាស្វែងយល់ និងវាយតម្លៃអំពីស្ថានភាពនៃការចរាចរ ជួញដូរគ្រឿងញៀន និងសារធាតុគីមីផ្សំពីតំបន់ត្រីកោណមាសឆ្លងកាត់ព្រំដែនចូលមកកាន់ប្រទេសក្នុងតំបន់ ចាប់ពីថ្ងៃទី១៨-២៤ ខែឧសភា ឆ្នាំ២០២៥ ។

ឯកឧត្ដម ឧត្តមសេនីយ៍ឯក នាក់ យុទ្ធា  បានគូសបញ្ជាក់ថា ដំណើរទស្សនកិច្ចតាមតំបន់ព្រំដែនឡាវ     វៀតណាម និងចិន នេះដឹកនាំដោយលោក BENEDIKT HOFMANN តំណាងស្តីទីប្រចាំតំបន់របស់អង្គការសហប្រជាជាតិទទួលបន្ទុកគ្រឿងញៀន និងឧក្រឹដ្ឋកម្ម(UNODC) ប្រចាំតំបន់អាស៊ីអាគ្នេយ៍ និងប៉ាស៊ីហ្វិក ដែលមានសមាសភាពចូលរួមពីតំណាងស្ថាប័នត្រួតពិនិត្យគ្រឿងញៀននៃប្រទេស ចំនួន៥ រួមមាន កម្ពុជា ថៃ ឡាវ វៀតណាម ចិន និងក្រុមការងាររបស់ UNODC សរុបចំនួន ២៥រូប។

ឯកឧត្ដម ឧត្តមសេនីយ៍ឯកបានថ្លែងបញ្ជាក់ថា ដំណើរទស្សនកិច្ចនេះក្នុងគោលបំណងរួមមាន៖ ទី១.សិក្សាវាយតម្លៃការគំរាមកំហែង និងនិន្នាការនៃការជួញដូរគ្រឿងញៀនសំយោគនៅក្នុងតំបន់ព្រំដែនដែលបានជ្រើសរើស (តំបន់ងាយប្រឈម)។ ទី២.ដើម្បីពង្រឹងយន្តការសម្របសម្រួល និងចែករំលែកព័ត៌មានក្នុងក្របខ័ណ្ឌប្រទេសហត្ថលេខី នៃកិច្ចព្រមព្រៀង(Mekong MOU Countries)។ ទី៣.ចូលរួមជាមួយភ្នាក់ងារអនុវត្តន៍ច្បាប់ក្នុងតំបន់ ដើម្បីយល់ដឹងពីបញ្ហាប្រឈមនៃប្រតិបត្តិការ និងការអនុវត្តទទួលបានលទ្ធផលល្អ។ ទី៤.ដើម្បីកំណត់តំបន់អាទិភាព សម្រាប់កិច្ចសហប្រតិបត្តិការ ក្នុងតំបន់នាពេលអនាគត ក្នុងការប្រឆាំងការជួញដូរគ្រឿងញៀនទី៥.ការផ្តល់អនុសាសន៍ណែនាំសំខាន់ៗដើម្បីបង្កើនវិធានការត្រួតពិនិត្យគ្រឿងញៀនតាមព្រំដែន និងប្រតិបត្តិការដឹកនាំការស៊ើបការណ៍សម្ងាត់ (intelligence-led operations)៕

ដោយ៖ រិទ្ធី ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន