AKP ភ្នំពេញ ថ្ងៃទី២៦ ខែឧសភា ឆ្នាំ២០២៥ -- នាយករដ្ឋមន្ត្រីចិន លោកលី ឈាង (Li Qiang) បាននិយាយកាលពីថ្ងៃអាទិត្យថា ប្រទេសចិនបានត្រៀមខ្លួនរួចជាស្រេចក្នុងការធ្វើការជាមួយប្រទេសឥណ្ឌូនេស៊ីដើម្បីលើកកម្ពស់ការជឿទុកចិត្តគ្នាទៅវិញទៅមកផ្នែកនយោបាយ និងការសម្របសម្រួលជាយុទ្ធសាស្ត្ររវាងប្រទេសទាំងពីរឱ្យកាន់តែខ្ពស់ថែមទៀត។

លោក លី បានធ្វើការកត់សម្គាល់នេះ ខណៈពេលដែលជួបជាមួយប្រធានាធិបតីឥណ្ឌូនេស៊ី លោក ប្រាបូវូ ស៊ូប៊ីអានតូ (Prabowo Subianto)ក្នុងដំណើរទស្សនកិច្ចផ្លូវការរបស់លោកទៅកាន់ប្រជាជាតិអាស៊ីអាគ្នេយ៍។

ដំបូង លោកនាយករដ្ឋមន្ត្រីបានពាំនាំនូវការសួរសុខទុក្ខយ៉ាងស្និទ្ធស្នាលពីប្រធានាធិបតីចិន លោក ស៊ី ជីនពីង (Xi Jinping) ទៅកាន់លោក ប្រាបូវូ ដោយលោកបានកត់សម្គាល់ថា ប្រទេសចិន និងឥណ្ឌូនេស៊ីគឺជាអ្នកជិតខាងដ៏ល្អ និងជាដៃគូដ៏ល្អ។

លោក លី បានបន្ថែមថា ចាប់តាំងពីបង្កើតទំនាក់ទំនងការទូតកាលពី៧៥ឆ្នាំមុនមក ភាគីទាំងពីរបានគាំទ្រគ្នាទៅវិញទៅមក និងឈរក្បែរគ្នាហើយមិត្តភាពប្រពៃណីរបស់ពួកគេនៅតែរឹងមាំ និងជាប់ពាក់ព័ន្ធជានិច្ច។

លោក លី បាននិយាយថា ប្រទេសចិនមានឆន្ទៈក្នុងការធ្វើការជាមួយប្រទេសឥណ្ឌូនេស៊ី ដើម្បីប្រកាន់ខ្ជាប់នូវការបង្កើតទំនាក់ទំនងការទូត បន្តនូវមិត្តភាពជាប្រពៃណី និងលើកកម្ពស់ការរួបរួម និងកិច្ចសហប្រតិបត្តិការ។

លោកបានបន្ថែមថា ភាគីចិនក៏បានត្រៀមខ្លួនរួចជាស្រេចក្នុងការពង្រឹងកិច្ចសហប្រតិបត្តិការនៅក្នុង «សសរស្តម្ភទាំងប្រាំ» នៃវិស័យនយោបាយសេដ្ឋកិច្ច ប្រជាជនទៅប្រជាជន និងការផ្លាស់ប្តូរវប្បធម៌ កិច្ចការសមុទ្រ និងសន្តិសុខ រួមគ្នាដោះស្រាយហានិភ័យ និងបញ្ហាប្រឈម និងជំរុញការអភិវឌ្ឍរួមឱ្យកាន់តែប្រសើរឡើង។

លោកបានចង្អុលបង្ហាញថា ប្រទេសចិនមានឆន្ទៈក្នុងការធ្វើការជាមួយប្រទេសឥណ្ឌូនេស៊ី ដើម្បីបង្កើនយុទ្ធសាស្រ្តអភិវឌ្ឍន៍ និងធ្វើឱ្យស៊ីជម្រៅនូវកិច្ចសហប្រតិបត្តិការខ្សែក្រវ៉ាត់ និងផ្លូវដែលមានគុណភាពខ្ពស់ជាពិសេសតាមរយៈការបង្កើនប្រសិទ្ធភាព និងការពង្រឹងគម្រោងសំខាន់ៗ៕

ដោយ៖ មូល មិនា (ប្រភព៖ ស៊ីនហួ)