ÄKP ព្រះវិហារ ថ្ងៃទី២៦ ខែឧសភា ឆ្នាំ២០២៥ -- ឯកឧត្តម ប្រាក់ សុវណ្ណ ប្រធានក្រុមប្រឹក្សាខេត្តព្រះវិហារ និងលោកស្រី ស ចេង និងលោក មិន ស៊ីថា អភិបាលខេត្តស្តីទី កាលពីថ្ងៃទី២៥ ខែឧសភា ឆ្នាំ២០២៥ ដោយមានការចូលរួមពីថ្នាក់ដឹកនាំខេត្ត បានដឹកនាំមន្ត្រីរាជការ កម្លាំងប្រដាប់អាវុធ ព្រះសង្ឃ ប្រជាពលរដ្ឋលោកគ្រូអ្នកគ្រូ សិស្សានុសិស្ស បានចូលរួមដាំដើមត្នោតចំនួន ១០ម៉ឺនដើម នៅភូមិសែនតេជៈ ឃុំមរតក ស្រុកជាំក្សាន្ត ខេត្តព្រះវិហារ។

ឯកឧត្តម ប្រាក់ សុវណ្ណ បានមានប្រសាសន៍ថា គោលបំណងនៃការដាំដើមត្នោតនេះគឺជាផ្នែកចម្បងក្នុងការការពារ និងបន្សុទ្ធបរិមាណកាបូនក្នុងបរិយាកាស តាមរយៈការដាំដើមរុក្ខជាតិនានា ក៏ដូចជាដើមត្នោត ដែលជាដើមឈើស្នូលសម្រាប់សេដ្ឋកិច្ចជនបទ និងវប្បធម៌ប្រពៃណីរបស់ជាតិខ្មែរ។ ដើមត្នោតមិនត្រឹមតែមានតម្លៃសេដ្ឋកិច្ចប៉ុណ្ណោះទេ ប៉ុន្តែថែមទាំងជាផ្នែកមួយនៃអត្តសញ្ញាណជាតិផងដែរ។

ឯកឧត្តមបានមានប្រសាសន៍បញ្ជាក់ថា ការដាំដើមត្នោតនេះ គឺជាជំហានដ៏សំខាន់មួយនៃយុទ្ធសាស្រ្តអភិវឌ្ឍសេដ្ឋកិច្ចបៃតងរបស់ខេត្តព្រះវិហារ និងបង្ហាញពីការចូលរួមរបស់សាធារណជនក្នុងការអភិរក្សធនធានធម្មជាតិ ហើយក្រៅពីការដាំត្នោតនៅតំបន់សាធារណៈ ក៏មានការចែកជូនកូនត្នោតចំនួនមួយទៀត ដល់អង្គភាពពាក់ព័ន្ធ ដើម្បីយកទៅដាំបន្ថែមនៅតាមតំបន់ផ្សេងៗ ដើម្បីបន្តអភិវឌ្ឍ និងពង្រីកដែនដីបៃតងឱ្យកាន់តែធំទូលំទូលាយ៕

ដោយ ទិត ស្រ៊