AKP កំពង់ធំ ថ្ងៃទី២៥ ខែឧសភា ឆ្នាំ២០២៥-- លោកស្រី លំ គន្ធារី អភិបាលរងខេត្តកំពង់ធំ និងក្រុមការងារ នាព្រឹកថ្ងៃទី២៥ ខែឧសភា ឆ្នាំ២០២៥ បាននាំយកអំណោយមនុស្សធម៌ និងថវិកាទៅឧបត្ថម្ភដល់ក្រុមគ្រួសារសពកុមារពីរនាក់លង់ទឹកក្នុងរណ្តៅអាអិច កាលពីថ្ងៃទី២៤ ខែឧសភា ឆ្នាំ២០២៥នៅឃុំក្តីដូងស្រុកកំពង់ស្វាយ ខេត្តកំពង់ធំ។

ក្នុងឱកាសនោះ លោកស្រី លំ គន្ធារី បានថ្លែងនូវការសោកស្ដាយ និងសូមចូលរួមមរណទុក្ខយ៉ាងក្រៀមក្រំជាទីបំផុត ជាមួយគ្រួសារនៃសព ដែលទទួលមរណភាពដោយ លង់ទឹកក្នុងរណ្តៅអាអិចស្លាប់២នាក់ហើយគ្រួសារសពត្រូវតែតាំងចិត្តឱ្យបានរឹងមាំ ដើម្បីចិញ្ចឹមកូនដែលនៅតូចៗ ឱ្យពួកគាត់បានចូលរៀនដូចកុមារដទៃទៀតដែរ។ សូមបួងសួងឱ្យដួងវិញ្ញាណក្ខន្ធកុមារឈ្មោះ រ៉ុង ខេមរិន្ទ ភេទប្រុស អាយុ០៨ឆ្នាំ និងកុមារឈ្មោះ រិទ្ធ ម៉េងហៀង ភេទប្រុស អាយុ០៨ឆ្នាំ បានទៅកាន់សុគតិភពកុំបីឃ្លៀងឃ្លាតឡើយ។

លោកស្រីអភិបាលរងខេត្តបានផ្ដាំផ្ញើដល់បងប្អូនទាំងអស់ត្រូវមានការប្រុងប្រយ័ត្នខ្ពស់ចំពោះគ្រោះធម្មជាតិ និងណែនាំដល់ឪពុកម្ដាយ និងអាណាព្យាបាលសូមកុំឱ្យកុមារតូចៗចុះលេងទឹកស្រះអាចបណ្ដាលឱ្យបាត់បង់ជីវិតដូចកុមារ២នាក់នេះ។ សូមខិតខំប្រកបរបររកស៊ីប្រចាំថ្ងៃដើម្បីចូលរួមលើកកម្ពស់ជីវភាពរស់នៅប្រចាំថ្ងៃ ព្រមទាំងរស់នៅប្រកបដោយអនាម័យជាប់ជាប្រចាំគឺ "ផឹកស្អាត ហូបស្អាតនិងរស់នៅស្អាត" សម្រាកក្នុងមុង ដើម្បីចៀសផុតអំពីជំងឺគ្រុនឈាមដែលអាចកើតមានគ្រប់ពេលវេលា មិនថាមនុស្សចាស់ឬក្មេងឡើយ។

សូមបញ្ជាក់ថា អំណោយមនុស្សធម៌ និងថវិកាយកទៅប្រគល់ដល់គ្រួសារសពទាំង២គ្រួសារ ក្នុង១គ្រួសារទទួលបានអង្ករ៣០គីឡូក្រាម ទឹកសុទ្ធ៥កេស និងថវិកាមួយចំនួន៕

ដោយ ស៊ុម វណ្ណា