AKP ភ្នំពេញ ថ្ងៃទី២៥ ខែឧសភា ឆ្នាំ២០២៥​ --ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ សហការជាមួយមន្ទីរពេទ្យ Soon Chun Hyang (SCH) និងមជ្ឈមណ្ឌលទ្រទ្រង់ជនបរទេសក្រុងគីមហេរ បានរៀបចំកម្មវិធី “ពិនិត្យសុខភាពដោយឥតគិតថ្លៃជូន ដល់បងប្អូនពលករ និងប្រជាពលរដ្ឋខែ្មរនៅកូរ៉េ”។

កាលពីថ្ងៃទី២៤ ខែឧសភា ឆ្នាំ២០២៥ ស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ​ដោយមានកិច្ចសហការជាមួយមន្ទីរពេទ្យ Soon Chun Hyang (SCH) និងមជ្ឈមណ្ឌលទ្រទ្រង់ជនបរទេសក្រុងគីមហេរ   បានរៀបចំកម្មវិធី “ពិនិត្យសុខភាពដោយឥតគិតថ្លៃជូន បងប្អូនពលករ និងប្រជាពលរដ្ឋខែ្មរនៅកូរ៉េ”នៅមណ្ឌលសុខភាពគីមហេរ ក្រោមអធិបតីភាព លោកជំទាវ ជ្រឹង បុទុមរង្សី ឯកអគ្គរាជទូតនៃព្រះរាជាណាចក្រកម្ពុជាប្រចាំសាធារណរដ្ឋកូរ៉េ ឯកឧត្តម HONG TAE YONG អភិបាលក្រុងគីមហេរ លោក PARK BYOUNGWON ប្រធានក្រុមគ្រូពេទ្យស្ម័គ្រចិត្តនៃមន្ទីរពេទ្យ SCH អ្នកស្រី KANG SUN HEE អនុប្រធានមជ្ឈមណ្ឌលទ្រទ្រង់ជនបរទេសក្រុងគីមហេរ មន្ត្រីស្ថានទូត ក្រុមគ្រូពេទ្យស្ម័គ្រចិត្ត ក្រុមយុវជនស្ម័គ្រចិត្ត និងអ្នកចូលរួមប្រមាណជាង ១៥០នាក់ផងដែរ ។

ក្នុងសន្ទរកថាបើកកម្មវិធីនេះ លោកជំទាវឯកអគ្គរាជទូតបានសម្តែងការអរគុណចំពោះអាជ្ញាធរមូលដ្ឋាន ក្រុមគ្រូពេទ្រស្ម័គ្រចិត្តរបស់មន្ទីរពេទ្យ និងអ្នកពាក់ព័ន្ធ ដែលបានប្តេជ្ញាចិត្តយ៉ាងខ្លាំងចំពោះយុទ្ធនាការ ជំរុញការថែទាំសុខភាពសាធារណៈ ជាពិសេសសុខភាពរបស់ពលករបរទេស អោយកាន់តែកៀកប្រជាពលរដ្ឋ។ ស្របគ្នានេះ លោកជំទាវឯកអគ្គរាជទូតក៏បានអំពាវនាវឱ្យអាជ្ញាធរ ក៏ដូចជាមន្ទីរពេទ្យផ្សេងៗទៀត ចូលរួមយកចិត្តទុកដាក់គាំពារសុខុមាលភាពជូនប្រជាជន ជាពិសេសយកចិត្តទុកដាក់ចំពោះសុខុមាលភាពរបស់ប្រជាពលរដ្ឋខ្មែរដែលរស់នៅ និងធ្វើការនៅសាធារណរដ្ឋកូរ៉េនេះ ដែលពួកគាត់គឺជាកម្លាំងពលកម្មដ៏សំខាន់មួយក្នុងការចូលរួមជំរុញសង្វាក់ផលិតកម្ម និងបង្កើនសេដ្ឋកិច្ចសាធារណរដ្ឋកូរ៉េអោយកាន់តែរីកចំរើន។ 

ជាងនេះទៅទៀត លោកជំទាវក៏បានពាំនាំសេចក្តីនឹករលឹកពីសំណាក់ សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលតែងតែយកចិត្តទុកដាក់ចំពោះសុខទុក្ខរបស់បងប្អូនខ្មែររស់នៅសាធារណរដ្ឋកូរ៉េ ព្រមទាំងបានចែករំលែកពីការផ្តល់សេវាសាធារណៈរបស់ស្ថានឯកអគ្គរាជទូតផងដែរ។ ជាចុងក្រោយ លោកជំទាវក៏បានលើកទឹកចិត្តឱ្យបងប្អូនពលរដ្ឋខ្មែរ ចូលរួមថែរក្សាសុខភាពទាំងផ្លូវកាយ និងផ្លូវចិត្តទាំងអស់គ្នា ដោយត្រូវពិនិត្យ និងពិគ្រោះយោបល់ជាមួយគ្រូពេទ្យជាប្រចាំផងដែរ ។

ក្នុងឱកាសនោះ ឯកឧត្តមអភិបាលក្រុងគីមហេរ និងលោកប្រធានក្រុមគ្រូពេទ្យស្ម័គ្រចិត្តរបស់មន្ទីរពេទ្យ SCH បានសម្តែងនូវសេចក្តីរីករាយ និងប្តេជ្ញាចិត្តបន្តកិច្ចសហការជាមួយស្ថានទូត ដើម្បីជំរុញសកម្មភាពនេះតទៅមុខទៀត។

នៅក្នុងកម្មវិធីនេះ ក្រុមការងារគ្រូពេទ្យ Soon Chun Hyang និងក្រុម HWPL បានធ្វើការពិនិត្យសុខភាពដូចជា (១) ពិនិត្យបេះដូង (២)ធ្វើតេស្តឈាម  (៣)ពិនិត្យភ្នែក ត្រចៀក ច្រមុះ មាត់ បំពង់ក (៤)ពិនិត្យរោគស្ត្រី និងស្ត្រីមានផ្ទៃពោះ (៥)ពិគ្រោះយោបល់ខាងផ្នែកចិត្តសាស្រ្ត ព្រមទាំងបានផ្តល់ជូនថ្នាំ និងសម្ភារៈមួយចំនួនដែលទទួលបានពីសប្បុរសជននានា ជូនដល់អ្នកចូលរួមពិនិត្យប្រមាណជា ១០០នាក់ផងដែរ។

សូមបញ្ជាក់ថា កម្មវិធីនេះ ជាកម្មវិធីដែលស្ថានឯកអគ្គរាជទូតបានរៀបចំជារៀងរាល់ឆ្នាំ ដោយបានសហការជាមួយក្រុមការងារគ្រូពេទ្យ Soon Chun Hyang ដើម្បីចុះត្រួតពិនិត្យសុខភាពជូនបងប្អូនប្រជាពលរដ្ឋខ្មែរនៅតាមតំបន់នានានៃសាធារណរដ្ឋកូរ៉េ ក្នុងគោលបំណងជម្រុញការពិនិត្យសុខភាពឱ្យកាន់តែខិតជិតនឹងប្រជាពលរដ្ឋ។ ក្នុងឆ្នាំនេះដែរ ស្ថានឯកអគ្គរាជទូតគ្រោងនឹងរៀបចំ ២កន្លែងផ្សេងទៀតនៅសាធារណរដ្ឋកូរ៉េ៕

ដោយ៖ ប៊ុនរិទ្ធ