AKP ភ្នំពេញ ថ្ងៃទី២៥ ខែឧសភា ឆ្នាំ២០២៥-- ឯកឧត្តម វង ភិរុណ អនុរដ្ឋលេខាធិការក្រសួងអប់រំ យុវជន និងកីឡា បានលើកឡើងថា ការសិក្សាក្នុងសម័យនេះ និងសម័យមុនមានការខុសប្លែកគ្នាខ្លាំង ដោយជាក់ស្ដែងសម័យនេះ គឺមានសាលារៀនជំនាន់ថ្មីដែលបាននាំមកនូវការបង្រៀន និងរៀនបែបសតវត្សទី២១ ដោយផ្ដល់ឱកាសដល់ការអនុវត្តផ្នែកទ្រឹស្ដី និងការពិសោធន៍ជាក់ស្ដែង បានបញ្ចេញនូវចំណេះដឹង បំណិន និងទេពកោសល្យនានា ហើយចំពោះសមិទ្ធផលទាំងឡាយដែលប្អូនៗសិស្សានុសិស្សមាន គឺបង្ហាញពីការសិក្សាផ្ដោតលើមុខវិជ្ជាស្ទែម រួមមាន មុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម គណិតវិទ្យា និងការសិក្សាបែបគម្រោងដែលក្រសួងអប់រំ បាន និងកំពុងយកចិត្តដាក់យ៉ាងខ្លាំងដើម្បីឱ្យស្របនឹងបណ្តាប្រទេសជឿនលឿននានា។ ការលើកឡើងរបស់ឯកឧត្តម វង ភិរុណ ដូចនេះធ្វើឡើងក្នុងទិវាជួបឪពុកម្ដាយប្រចាំឆ្នាំរបស់សាលារៀនជំនាន់ថ្មីវិទ្យាល័យព្រែកលៀប កាលពីថ្ងៃទី២៤ ខែឧសភា ឆ្នាំ២០២៥។

ឯកឧត្តមអនុរដ្ឋលេខាធិការបានបង្ហាញការរីករាយជាខ្លាំង ដោយបានឃើញសិស្សានុសិស្សកម្ពុជាមានចំណេះដឹង ចំណេះធ្វើ និងបំណិនដោយផ្អែកលើការសិក្សាស្រាវជ្រាវ និងច្នៃប្រឌិតបង្កើតបានជាសមិទ្ធផលនានាដាក់តាំងបង្ហាញស្នាដៃរហូតដល់៤១២ស្នាដៃ ដើម្បីឱ្យឪពុកម្តាយ ឬអាណាព្យាបាលបានទស្សនានៅក្នុងទិវាជួបឪពុកម្ដាយរបស់សាលារៀនជំនាន់ថ្មីនៅវិទ្យាល័យព្រែកលៀបនាពេលនេះ ហើយថា កម្មវិធីនេះបានចូលរួមចំណែកយ៉ាងសំខាន់ក្នុងការជំរុញឱ្យសិស្សានុសិស្សខិតខំប្រែងរៀនសូត្រ និងមានឱកាសស្វែងរកទេពកោសល្យពិតប្រាកដរបស់ខ្លួនបាន ជាពិសេសទាញយកចំណាប់អារម្មណ៍ និងការចូលរួមរបស់មាតាបិតា សហគមន៍ និងដៃគូអភិវឌ្ឍន៍ឱ្យចូលរួមក្នុងការអភិវឌ្ឍសាលារៀន។

សូមជម្រាបថា កម្មវិធីទិវាជួបឪពុកម្តាយនេះគឺជាព្រឹត្តិការណ៍ធំប្រចាំឆ្នាំរបស់វិទ្យាល័យព្រែកលៀប ដោយមានការតាំងបង្ហាញស្នាដៃរបស់សិស្សដែលបានមកពីការសិក្សាស្រាវជ្រាវ ការងារគម្រោង ការងារក្លិប និងការច្នៃប្រឌិតផ្សេងៗ ដែលបានបង្ហាញជូនដល់អ្នកចូលរួម ជាពិសេសឪពុកម្តាយ និងអាណាព្យាបាលសិស្ស ដែលគោលបំណងនៃការរៀបចំកម្មវិធីនេះឡើងគឺដើម្បីឱ្យឪពុកម្តាយ និងអាណាព្យាបាលបានមកកាន់សាលារៀនឃើញពីលទ្ធផលនៃការខិតខំប្រឹងប្រែងរបស់កូនៗ ក៍ដូចជាឃើញនូវវឌ្ឍនភាពរបស់សាលារៀនផងដែរ៕

ដោយ៖ ចាន់ សុភឿន (ប្រភព៖ ក្រសួងអប់រំ)